सरासरी चेतानी
13
तीसर हार मय तुमचो लगे एयंसे; आउर जसन पवितर सास्तर ने लिखलोर आसे, काई गोट चो फासला दुय नोहले तीन लोग चो गवई ले चे होयदे।†
2 जेबे मय दुसर हार तुमचो संगे रले, तेबे मय तुमके चेतानी देउन रले कि फेर मय ईलोने हुनमन के नी छांडे। एदांय लापी रउन हुन लोगमन के जोनमन आगे पाप करु रला आउर दुसर सपाय लोगमन के फेर ले चेतायंसे।
3 कसनबलले मय किरिस्त बाटले गोटेयायंसे कि नाई बलुन तुमी गवई मांगसास। तुमी जोन गवई डगरायसास हुन गवई तुमके मिरेदे। हुन निमल नोआय, मानतर जिदलदांय हुन तुमके सुदरायदे, हुदलदांय तुमी हुनचो सकत के दखासे।
4 हुनचो निमल ने कुरूस ने चेगाला, मानतर महापरभु चो सकत ले जीव आसे। एदांय आमी बले हुनचो असन निमल आसुं, मानतर महापरभु चो सकत ले हुनचो संगे जीउंदे आउर तुमी एके जानासे।
5 तुमी बिसवास ने आसास कि नाई आपने के जाचा-परखा। काय, तुमी नी जानास कि जीसु किरिस्त तुमचो मन ने आसे? नोहले तुमी आपलो जचई ने फोकाहा होलास।
6 मानतर मोके आसा आसे, तुमी जानासे कि आमी फोकाहा नोआंव।
7 तुमी काई अडरा बुता नी करा बलते, आमी महापरभु ले पारथना करुंसे। एईकाजे नाई कि आमी चोखा दखा देउं, मानतर एईकाजे कि तुमी भलई करा, भले आमी फोकाहा होउं।
8 कसनबलले आमी सत चो बिरुद काई करुक नी सकुं, मानतर सत काजे ची करुक सकुं।
9 कसनबलले आमी निमल, आउर तुमी सकत बीता होलोने आमी हरिक होउ आंव, आउर आमी पारथना करुआंव कि तुमी सिद होआ।
10 मय तुमचो लगे ईलोने परभु मोके दिलो हक के बेरपेला बाहारुक नी पड़ो; जोन हक तुमके नसातो काजे नाई मानतर भलई काजे दिलोसे। एईकाजे मय तुमचो ले लापी रउन ए गोट के लिखेंसे।
सरासरी जुहार
11 एईकाजे ए भाईमन, हरिक ने राहा, सिद बनते जाहा; ढाढ़ुस करा, गोटकी सोर ने राहा, मिलुन-मिसुन राहा, मया आउर अस्तिर चो महापरभु तुमचो संगे रयदे।
12 गोटोक-दुसर के पवितर चूमा ले जुहार करा।
13 सपाय पवितर लोग तुमके जुहार बलसोत।
14 परभु जीसु किरिस्त चो दया आउर महापरभु चो मया आउर पवितर आत्मा चो संगी तुमी सपाय संगे रओ।