पउलुस बाटले सपाय के जुहार
16
मय तुमके, आमचो बईन आउर किंखिरिया सहर चो मंडली-सेविका* फीबे काजे गुहारेंसे
2 कि जसन महापरभु चो पवितर लोगमन के आपलो लोग मानतोर आय, उसने हुन बईन के बले आपलो माना। हुनके काई बले लागेदे, तुमी हुनके दियास, कसनबलले हुन खुबे लोगमन के आउर मोके बले साहरा करते रये।
3 किरिस्त जीसु चो सेवा-बुता करतोने मोचो संगी पिरस्किला आउर अकविला के मोचो बाटले जुहार।
4 हुनमन मोचो जीव बचातो काजे छेकी होउन रला, एकलाय मय ची नाई मानतर बिजातीमन चो सपाय मंडलीमन बले हुनमन के धन-धन करसोत।
5 हुनमन चो घरे बसतो मंडली के बले जुहार।
आसिया ने किरिस्त के पईल पतेयालो मोचो मया चो भाई इपनितुस के जुहार।
6 तुमचो काजे खुबे मसागत करलो मरियम के मोचो जुहार।
7 मोचो कुटुम चो अंदरनीकुस आउर जूनियास के मोचो जुहार। हुनमन मोचो संगे जयल घरे रला आउर पठालो-लोगमन ने नंगत नाव कमालासे आउर मोचो ले आगे किरिस्त के पतेयालासे।
8 परभु ने मोचो मीत अमपलियातुस के मोचो बाटले जुहार।
9 किरिस्त ने आमचो संगे सेवा-बुता करतो उरबानुस आउर मोचो मीत इस्तुखुस के जुहार।
10 किरिस्त ने चोखा, अपिलेस के
आउर अरिस्तुबुलुस चो घर-लोग के बले मोचो जुहार।
11 मोचो कुटुम चो हिरोदियोन के जुहार।
नरकिस्सुस चो घर-लोग जोन परभु के मानसोत, हुनमन के मोचो जुहार।
12 परभु काजे खुबे मसागत करु बीतीमन तुरफेना आउर तुरफोसा के मोचो जुहार।
परभु ने खुबे मसागत करु बीती, मोचो मया चो बईन परसिस के जुहार।
13 परभु बाछलो रूफुस आउर हुनचो आया जोन मोचो बले आया असन आय, दुनो के मोचो जुहार।
14 असुंकिरतुस, फिलगोन, हिरमेस, पतरुबास, हिरमास आउर हुनमन संग चो भाईमन के मोचो जुहार।
15 फिलुलुगुस, जूलिया*, नेरयुस आउर हुनचो बईन आउर उलुमपास आउर हुनमन संग चो सपाय पवितर लोगमन के मोचो जुहार।
16 गोटोक-दुसर के पवितर चूमा ले जुहार करा। सपाय किरिस्त मंडलीमन बाटले तुमके जुहार।
सरासरी ने चेतानी
17 एदांय ए मोचो भाईमन, मय तुमके गुहारेंसे, तुमके दिलो सिखिया चो चेगा-उतरा करुन भिने करतो बललोने तुमचो बिसवास के नसातो लोगमन के परखुन, हुनमन ले बाचुन राहा।
18 कसनबलले असन लोगमन आमचो परभु जीसु किरिस्त चो सेवा नाई, मानतर आपलेई पेट-सेवा करसोत, आउर आपलो फोबानी गोटमन ले सोज लोगमन के फुसियायसोत।
19 तुमचो हुकुम मानतो गोट के सबु लोगमन जानला, एईकाजे मय तुमचो ले हरिक आंसे, मानतर मय मन करेंसे कि तुमी भलई बुता काजे बुद बीतामन असन आउर अडरा बुता करुक मुरे नी जाने असन राहा।
20 अस्तिर करु महापरभु झटके तुमचो ले सयतान के रमंदाउन हरायदे। आमचो परभु जीसु किरिस्त चो दया तुमके मिरते रओ।
21 मोचो संगे सेवा-बुता करतो बीता तीमुथियुस आउर मोचो कुटुम चो लूकियुस, जासोन आउर सोसिपतरुस बाटले तुमके जुहार।
22 पउलुस काजे ए चिटी के लिखतो बीता तिरतियुस बाटले तुमके परभु ने जुहार।
23 मोके आउर पतेयातो मंडली लोगमन के सगा-मान करतो बीता गयुस बाटले तुमके जुहार। सहर चो भंडारी इरासतुस आउर आमचो भाई कवारतुस बाटले तुमके जुहार।
24 आमचो परभु जीसु किरिस्त चो दया तुमके मिरते रओ। आमीन।
महापरभु चो जय-जय
25 महापरभु चो जय-जय हो। अगमजानीमन लिखलो पवितर सास्तर आउर जीसु किरिस्त चो सिखिया बाटले एदांय सपाय जात चो लोगमन हुन जुग-जुग ले लुकलो भेद के जानला कि हुनमन पतेयातो बाटले जुग-जुग चो महापरभु चो हुकुम के मानोत।
26 मानतर एदांय, जुग-जुग चो महापरभु चो हुकुम हिसाब ले, मय सपाय जातमन के सुनालो नंगत खबर आउर जीसु किरिस्त सांगलो बचन बाटले, तुमी सपाय के बिसवास ने चमकट करुक सकें।
27 हुनी गोटकी ची खुबे बुदंती महापरभु चो, जीसु किरिस्त बाटले जुग-जुग काजे मयमा होओ। आमीन।