12
सिखातो काजे दिलो डंड के मन करु, गियान पाउक मन करुआय,मानतर दागा दिले रीस होउ बीता, मूरक आय।
2 भला लोग ले जहोवा हरिक होउआय,
मानतर अडरा उआट करुमन के डंड देउआय।
3 उबढंगरी बुता ले कोनी मनुक बरसक रउक नी सकुआय,
धरमकारी चो चेर केबई उखनी नी होउआय।
4 धारनिक बायले आपलो मनुक चो मुकुट आय,
मानतर हुनके लाज पड़ातो बायले हुनचो काजे बोसा-अंगुर बेमार असन आय।
5 धरमकारी चो बिचार गोटकी कटार आय,
मानतर दुसट चो सला, ठगा-फारसी रउआय।
6 दुसट चो गोट, लोगमन काजे मोरना चो फांदा आय,
मानतर सोज लोग चो गोट ले लोग छंडाय होउआत।
7 दुसट, चेर संगे उखनी होयदे,
मानतर धरमकारी चो थर-लर अमदेया रयदे।
8 मनुक आपलो बुद किरता मान पायसे,
मानतर कपटी के लोगमन घिनियायसोत।
9 कमेया संगाउ नानी जात चो मनुक,
ढोंग मारुन बासी रोटी खाउ बीता ले नंगत आय*।
10 धरमकारी आपलो पसु चो बले धियान देउआय,
मानतर दुसट केबई जीव नी दुखुआय।
11 आपलो भुंय-बाड़ी के कमाउ बीता पेट-भर खाउआय,
मानतर जोन फोकाहा गोटमन ने उनारु रयसे, हुन मूरक आय†।
12 दुसट लोग झीका-उड़मा करलो धन चो लालच ने रउआत,
मानतर धरमकारी चो चेर खुबे फर धरुआय।
13 अडरा मनुक आपलेई टोंड चो ओधरम किरता फांदा ने पड़ुआय,
मानतर धरमकारी बिपती ले बाचुआय।
14 लोग आपलो टोंड चो गोट ले भलई पाउआत†,
आउर जसन बुता उसने पलटा पाउआत।
15 मूरक के आपलेई बाट सरसरा लागुआय,
मानतर बुद बीता नंगत सला धरुआय।
16 मूरक आपलो रीस तूरते दखाउआय,
मानतर बुद बीता लाज पड़ले बले नी दखाये।
17 धरमाती, सत गवई देउआय,
मानतर फंदी, फंद गवई देउआय।
18 नी बिचारुन गोटेयातो गोट, रट-रटनांय पाउआय
मानतर बुद बीता चो गोट, चेंग-चेंगा करुआय।
19 सत गोट, अमदेया काजे रउआय,
मानतर फंद गोट, डंडकी ची काजे रउआय।
20 अडरा उआट करु चो मने कपट रउआय,
मानतर अस्तिर चो सला देउ, हरिक ने रउआय।
21 धरमकारी के काई नोकसान नी होउआय,
मानतर दुसट उपरे बरन-बरन चो बिपती पड़ुआय।
22 जहोवा फंदीमन के घिनियाउआय,
मानतर पतेयातो लाईक लोगमन ले हुन हरिक होउआय।
23 बुद बीता आपलो बुद चो गुमान नी करुआय,
मानतर भकवा, फोकाहा ढोंग मारते बुलुआय।
24 खुबे मसागत करु, राज करुआय,
मानतर ठगरा के, कमेया-बुता करुक पड़ुआय।
25 फिकिर करले, लोग झुलुन-आटुन जाउआत,
मानतर अस्तिर चो गोट ले, लोगमन हरिक होउआत।
26 धरमकारी, घर-लग चो लोग के नंगत बाट दखाउआय,
मानतर दुसट आपलेई बाट के भूलकुआय।
27 ठगरा मनुक, काई नी कमाउआय,
मानतर मसागत करु, खुबे धन-माल कमाउआय।
28 सत-धरम जीव चो बाट आय,
हुन बाट ने मोरना नीआय।