139
1 Tlakəu, a gwabiya ɗa təka
ya kwa zəndə ɗa təka.
2 Kwa zəndə kə sakanda ya ngyatə ana sakanda ya hya'ati;
tsəu naɗə ka la'a jigadəma ɗa.
3 Kwa la'a ɗa ka sakanda ya kwa ma'i
ana ma ya kwa ɓəlsar ku ki.
Kwa zəndə kə kala sənda ya kwa məra.
4 Manda təvi ya ndəra,
a wurtə kə zəndə sənda ya kwa na.
5 A dzə ka mada təwa bari;
Ka fətə chaka nə papa'akur tə kəra ya.
6 Chul ngəna zəndə sər məngəl cha na'a,
a ndiya tə zəndə ɗa.
7 A bar ya kwa ma'i ta ɗa tsa shanguɗə ngha?
A bar yo whi ta ɗa tsaka?
8 Ma ya ma'i gi huɗa məlləm, a kinda ka;
ma ya ɓatlətə mbwar piya ɗa ku hwa, a kinda ka.
9 Ma ya fəl ta ɗa ya dəɗiya zədər pəchi,
ndara ya ngya ta ɗa təwa təɗər pəchi naɗəu,
10 hinda ka ka kwa nəuna naya,
hinda ka ka kwa vala ɗa.
11 Ma cha ya kwa nda nau gəditsi kutlə ka cha mbunda ɗa,
ndara vi mbəlmbəl nda dzə ɗa cha sha ka vu'i,
12 kəl ja, mada kutlə ma'a da cha kutlə nənghə wa;
ya vu'i ma'a kwa mbəla nənghə wi puchi,
aka kutləu ana puchi sə zhang cha nəngha.
13 Nakə tə ɓatlə kala sənda dzə ɗa;
nakə ngə daɓtə ɗa ku ta Ama ɗa.
14 Ya kwa falngha aka naka sər ləvər ka;
dəhə sənda ka kwa məra taɗə cha, ya sər məngəlləu.
A zəndə təya nga na dəhə ɗəfwa ya.
15 Gangar dza ya da mbumbunyi tsakə wa
sakanda nja ɓatlə ɗa tə mbwa ɗəwaɗəwa.
Sakanda ya kwa ha ku kutlər ta Ama ɗa,
16 a la'a ɗa tə ka təvi nja ya ɗa.
Dəhə hanyi nda nja na'a
tsəfətsəfə nyi cha ku likatkatə ngha
təvi kala zhang kənda tə ghəya ɗa.
17 Hyelləu, dza'u cha na'a ya zəndəbiya jigadəma ngha
a da ɓəlkənyi da wa!
18 A da ya kwa nau jigabiya nda wa,
a ndiya tə shishi'ua na ɗang.
ma sakanda ya hya'atə ti,
tsəu tanyi kə tsa'a naya.