88
1 Yawa Hyel Tlakəu, ndər dləuya ɗa,
vu'i ana puchi yo tiwi amangha.
2 Ngwa pətlənya ɗa da shil da ka;
səndzi hima da tiwi ɗa.
3 Aku ɓwaɓwatu naya gagaɗa
pya ya shiltə ləhə dzər wha.
4 Njo jiga ɗa ku huɗa nji nda kaɗa tah;
A ɗatəya wi ndə kəla dunama.
5 Nja sənda ɗa ku pama nji kuɗəkuɗa,
wi nji nda nja tsəya ngə ya tə piya ku wha,
nda atsəu ko ɗənghatə na nda səkə wa,
nji inda vala ngha ɗati naɗə tsanda.
6 Ka vakəu ɗa go whu nda ndzəɗaku,
aku wha nda ndzəɗaku ya na kutlə dərgədləu.
7 Huɗətla ngha tədəɓə təkəra ya;
zhaliya ɗa tə ka ana mandza ngha.
8 A gədlənda təkə bazhi ɗa i
ka mərtə ɗa ka sər həyati nənda.
nja patəɗa a lakur mbəɗə da tsa ya wa;
9 lya ya ɗatə zhimtərə ana ɓwaɓwatu.
Tlakəu, kala pəchi yo nga ngha;
yo hatə nghə cha ya gi ku pətlənya.
10 Kwa mər kə sə shinshini nə nji kuɗəkuɗə ya?
Nji inda kuɗa kwa mbar hya'ati ka nda falə nghə ya?
11 Kwa ndər nja təkəra nyida nghə ku wha;
ndara jirikurngha tə mbwanda tə sə wa?
12 Kwa nau nja zəndəbiya sə shinshini nghə tə mbwar kutləu;
ndara tlər tsangkur ngha ku hə'i njikə mambəlləu?
13 Tlakəu, yo nga ngha aka vala;
kala mbudla yo pətlənya nəngha.
14 Mya gwa'atə ka gyaɗa Tlakəu
ka mbunda huɗəmaka tsa ya?
15 Tsəu ya zər tlakala ya ngya kəla yiying, yo nda tah;
A sa təya ɓwaɓwatu na nəuma ngha, a həɗa təya.
16 Huɗətla ngha zhaltəɗa ti;
ləvər ngha kuɗəyatə dzaya.
17 Dəhə ɓupuchi nda ɓandə ɗa wi ngə tə madagulɓa;
mada təwa bari nda mbuya ɗa.
18 Ka fa'anda bazhi ɗa i ana nji inda kwa nyida ɗa;
kutla ngə bazhi ngyaɗa sakana.