Miya usaku
65
1 Yawa Hyelləu, tsatsa'a cha nə ea, ea falə ngha aku Sihiyona, ya a nənghə ea kwa nyabiya səmfəla kəea. 2 Yawa nakə nda kwa ngatə pətlənya kə ea, a dakə dəhə nji kwa shili. 3 Sakanda səpəla'a kə ea tə zhaliya ea, ka farna bikə kə ea. 4 Njir papa'akur ngə nji'inda ka tabiya ka nda ngya ku mbwa karti ngha! Eo nyi ana sə mənakə inda ku ki ngha, ana papa'akur Mbwa'alə karti ngha. 5 Ka wum nəea təwa nə ea dunamar kura. Njir dunəya dəhə ana ma'a nji inda naɗə biyatə ya dəl dəgal dləukərtə naka. 6 Ka chiya ma ana gyalkurngha, ka chari dunamar gyalkur ngha. 7 Ka bəgəya ghəhi nə dəl dəgal i, ana ghəhi nə mandza, ətsəu ka bəgəya mwali nə nji. 8 Nji nda na ngya naɗəu kwa ləvər sər muniya ngha; fwata tə mbwanda pəchi kwa zədə tə ana mbwanda cha kwa təɗa ka shilna hirgyaɗi. 9 Ko chari nyida nghə nə dunəya ko shil na par; ka mərtə nyi sakəda ka nənyi kuɓu. Ka nyandə dlələm i ana ɓiti; ka mərtə hə'i cha biyandi sə tsətsa. Janə ənda ka ɓatlə ti: 10 ka sətə par shiltə mbwanda zwazwanyi ngə ka ləɓətə nda na ɓiti; ka mərtə hə'i kuɓətə ana par likuliku (shikushiku) ngə ka mərtə taɗər sə tsətsa nda ha. 11 Aka mənakəkur nghə ja Hyel, ea uya fwakəu papa'a! mada bar ma'i ka, ko uya sər cha chaɓə. 12 Sar a nyitə na biri sər kətəng; dəgəl i a nyitə na hirgyaɗi. 13 Babal i a haɗiyatə dza ana biri kətəng; dakə i a nyitə ana sə zwazwa, ndo na miya na kurakə ana hirgyaɗi.