32
1 Ndə papa'akur cha
ndə nda nja farna bikənyi,
ndə nda nja haɗənda səpəla'anyi.
2 Ndə papa'akur nga
ndə nda Tlakə nda kwa jiga səpəla'anyi wa
ndə nda shanguɗə nə shakər da ku cha wa.
3 Ma ya da'ata ɗa ɗiyiu,
ɗəhir dza ya kwa həɗa tanyi
aka tiwi nda kwa məra pa'a pəchi.
4 Aka vu'i na puchi
cha kə nə ɓu tədəɓə təkəra ya;
dunama ɗa tutə ti
wi ndəkə bijr vitəkwa.
5 Aka ənga a natənghə təya səpəla'a ɗa
a da ya mbunda bikə ɗa wa.
Ya na, <<Yo nabiya
bikəɗa nə Tlakəu>>
ka farna səpəla'a ɗa.
6 Ka əngə ja ngwa dəhə ndər mər sə mənakə ɗa pətlənya nəngha
ku sakanda nja kwa uya ngha;
vəlvəl ku sakanda madagulɓa ɓiti kwa hya'atə ti
da nda kwa həyaɗa nyi wa.
7 Nakə ngə mbwar mbu ɗa;
ko kanda ɗa tsa ɓwaɓwatu
ko ɓandə ɗa na miyar dləuya.
8 Yo chatə ngha, ya dlədləɓə tənghə lakur nda ko kina nəuwa;
Yo dəkətənghə dəma ya yo ɓəlatəngha.
9 Ngwa ka da ɗa wi taku ndara sang wa,
nda kəla na ngabiya
kəl nda lindzam ana dəka njo gəlatə nda
əngə wa a ndo shili da kə wa.
10 Ɗəng nji kəmangər nda tuku nda sa ɓwaɓwatu,
Amma nyidar Tlakə nda kəla wura
kwa ɓandə ndə nda kwa dləukər na cha.
11 Məra ma hirgyaɗi na ta chaməu, nahi nji tsang;
na ma miya, dəhə hi nji nda ɗəfwanda ta'ita'inyi!