Ɓwanya inda Agur tə Pəa
30
1 Sə'inda Tlakə tə nar nyi nə Agur zər Jakeh,Agur tə na, <<A tsəu Hyel da tsa'a na ya wa,
a tsəu Hyel da tsa'a na ya wa, ya jan ya həɗa ti.
2 <<A ndəɗə təya kala ndə na kəkəngkur,
a da ya na chul ngabiya nda ndə kwa kina uya wa.
3 A da ya uya dəma wa,
ya a səda ya zəndəbiya təkəra Hyel wa.
4 Wa ngə ndə nda taa gi huɗamələm ga səya?
Wa taa gəzəya gyang ku cha cha?
Wa ta mbau ɓiti ku lukutə nya?
Wa nga fiya ɓələr dunəya?
Wa tləmə nya? Ya wa tləmər zər nya?
Dəkar ɗa macha kwa zəndə ka!
5 A gəzhi da ku dəhə sənda Hyel tə pə wa,
nacha ləgə cha anə nji inda tə shili da cha ga uya mbəɗa.
6 Ngwa ka tsakəri vanya sə təkəra ɓwanya nyi wa,
pa'a əngə wa cho təɗə himya ka, cho chabiya əndandər tlagəzhi ka.
7 Tlakəu, sənda tsa'a mətlə nda ya gədi tsaka,
ngwaka da katə ɗa wa, na'a nda təvi ya tah:
8 Hənda tar jiri ana tlaguzhi naɗə tsa ya.
Ngwa ka da mərtə ndə ɗaliɗali ndara ndər gəna wa,
kəlnda ka na'a sərsumə məlməl na sənda yo kina gwa'a.
9 Tsa ya da ba'a uya sə ualəu ya kəpalə zəndə nghə,
ya na, <Wa ngə Tlakə nga?>
tsa ma ya ɗa ɗaliɗalinyi tsəu ya ki həl,
ya təɗəkənyi kuzhin nə tləmər Hyel ɗa.
10 Ngwa ka da ngəl mava anə tlakənyi wa,
tsa mava nda da ba'a ngəl ngha, ya tuku ko kya.
11 Alenya nji da kwa ngəl adan nda,
ya a da ndo fal aman nda wa,
12 Alenya nji da kwa la'a wi nji chichi nda ya a da əngə nda wa.
13 Alenya nji kwa ndzam alenya nji hiɗahida, ndo la'a kənənda wi vanya səu. 14 Hiranda wi katsakər, ani ndo kuɗə nji ɗaliɗali ana njir gwa'a. 15 Nguli huɓərsə da tsa'a mətlə, tləmən nda <Na'a, na'a> Sə da i'i makərəu nda a da ndo nyi ni wa, sə fwaɗəu inda a da ndo na a nji nda ti wa. 16 Na nda ingə, hwa, mala kəla ya, hə'i, nda a da kwa nyi na ɓiti wa, ana hu'u, nda pa'a kwa na a nji ti. 17 Li nda kwa ndzam həyatəvi, nda pa'a kwa la'a səlir ama, salak kwa chakubiya, kwadəga tsəu kwa ɗənya. 18 Sə da makər ndara fwaɗəu, inda tə ɗa ka sər məngəl na'a, inda pa'a ya nau ngabiya. 19 ənda dadapə kwa təra biya tə gyang, ma'ir pwabu tə fafa, ma'i param tə dəl, ana ma'i tlakala ana kwapəlekəu. 20 Jan sənda mala kasali kwa məra, macha wurandə kasalikur cho waɗa cho na a da ya mər səɗimi wa. 21 Alenya sə da makər ndara fwaɗə nda kwa nənyi ləvər nə duniya, nda a da cho nau susu'uti wa, 22 mava nda tə ɗa ka təl, ndə kəkəng nda tə uya sərsumə bwaɓəu, 23 mala kyakyar nda tə uya sal, ana kwatəra nda tə dləuya sal tsa amar ki nyi. 24 Sə da fwaɗə tə duniya, a da nda wawa'a wa, kəl ja, dəma tsanda gagaɗa. 25 A dunama da tsa məngali wa, dəhə ka ənga, ndo ɗəwanda sərsuma ka bijir hyapəchi. 26 A dunamar coney da i'i wa, dəhə ka ənga ndo hər ki kənda tə fafa. 27 A təl da tsa ha'i wa, dəhə ka ənga ndo ma'i kənda ku zotamin. 28 A chi tanyi njo səya gali gecko, dəhə ka ənga ma'a ku ki təl cho ngya. 29 Səda i'i makər ndara fwaɗə inda kwa bu kərnənda mando ma'i.