3
1 Kəl ngə ɓwanyar Tlakə tə ɓəla shilda Yunana nə mətləkunyi:2 <<Ma'i a yi Nineveh məlləm dəgal nga, ka yi bəzəya nyi mafakə naə ya nənghə nga.>>
3 Ngə Yunana tə dləukəri na ɓwanya Tlakə ga təra yi Nineveh. Nineveh məlləm cha nda 'ualləu, kwa hətə hanyi makərə təvi njo ɓandi. 4 Pishir Yunana tə gwa ku məlləm nda, ngə bəzəya nyi nə dlama nji: <<Hanyi fwaɗəkumnyi tə həyadzə ənya njo zhazhanda Nineveh!>>
5 Ngə njir Nineveh tə nənyi jiri nə mafakə Hyel, ghəya tə nji wawa'a ba'a nə shiɗəɗənyi, nda bəzəya ənda njo səm dzən, ngə nda handzi guzhalguzhal ga na chari nda a tubi tə nda.
6 Manda mafakə nda tə həya təl Nineveh, ngə cha hya'ati ku dzəga nyi, ga səɗənda lukutu təlkur nyi, ga mbuya kərnyi na guzhalguzhal ga ngya səya tanyi ku bərbər. 7 Təma ngə biyandi tsaubar ku Nineveh: <<Janə bar hya'atə tsa təl ka njira wawa'a patlanyi: Ngwa kala ndəa səm madami wa, dəhə nji, tla ana kətəng, dəhə katə nji tsa səma ana sa. 8 Dəhə nji ana sər shishi tuku nda handzi guzhalguzhal. Ngwa kala ndəa gədi Hyel kuskusu. Ngw nda ngyar ɗimikur kənda ana pu'ikur. 9 Wa zəndəa? Hyel kwa nau bəlatə jigadəmanyi, ku tuhuɗənyi ba cha sha cha ngyari huɗətlanyi tsaka a məno kuɗə wa.>>
10 Manda Hyel tə la'a sənda nda məra, ənda nda sha ga ngyar mər ɗimikur, ngə changatə tuhuɗə, ngə a cha ɓəla shilna ɓwaɓwatə təkəra nda wi nda cha na wa.