1
1 1 Nǝn ngǝ mǝtakǝr nda Tlakǝ ndǝr gyalkur tǝ chabiya nyi nǝ Obadiya tǝkǝra hǝ'i Edom.
Nǝuma tǝkǝra Edom
Tlakǝ tǝ sǝ chama nyi yada jul nji, ngǝ mǝna ngatǝ mafakǝ nyi bǝra, "Kala ndǝ mbambiya dza! mǝn tsǝmǝtǝ lǝvalǝva kǝmǝn, mǝna pah Edom. 2 "Ngǝ Tlakǝ tǝ nar nyi nǝ Edom, "Yo mǝrtǝ kushu aku huɗa aleny jul nji, njo hǝyatǝ kǝ gagaɗa. 3 Hǝkǝr nghǝ shandǝ ɗǝ kǝr, ko ngya ku ɓangtili a kyatǝ mǝa; ki nghǝ kyatǝ mǝa nda dzǝgamǝ i, aka ǝnga ko na nǝ kǝrngha; wa kwa nau hǝyaɗa sǝya hu'ea? 4 Mada ngǝ ko fǝl biya huɗamǝllǝm wi ngǝ tǝ Abǝlǝm, kinghǝ tsǝu naɗǝ kyatǝ sasǝlga, hya'atǝ kinda ya kwa tǝɗiyangha sǝya. 5 "Ma njir hǝl tǝ shili vu'i, sǝnda ndo i na cha ndo hǝtǝ. Ma nji kwa tsǝmǝ yayar anaɓ, wa'atanyi ndo ngyar mǝhǝya nya.Kǝl ja, njir dawa nghǝ gǝlǝbiya nghǝ tǝ swanghǝu. 6 Nya ndǝla Isuwa, nja fa'abiya tǝ gǝna dǝhǝu. 7 "Nji inda hyo mba nya kǝ'iri shandǝ nghǝ tǝ kǝr; gǝdlǝbiya nghǝ tǝ nda ku hǝ'i ngha. Nji inda ku piyarɗufu kǝ'i ka, sakana a kwasǝnya nghǝ tǝ nda na pah. Bazhinghǝ i nda ko sǝm sǝursum ka nda, a ngǝyanghǝ tǝ nda lǝbam; ndo na nǝngha, 'Aman dǝhǝ dǝmanyi nda ja? 8 "Pishinda yo mǝrtǝ nyi nǝuma nǝ Edom, yo zhazhǝnda njir dǝmanyi, ana dǝhǝ dǝma kǝnda. 9 Lǝvǝra kwa sǝya njir pa kwalkwala nǝ Timina, ya njo tsǝya kala lǝvalǝva vu Edom.
Sǝ ndo gwa'atǝ njo mǝrtǝ nyi nǝuma nǝ Edom
10 "Aka ka fa'aya ana ka tsǝya zamǝngha, nya ndǝla Yakubu, njo zhazhǝnda nghǝ, ya njo fǝunghǝ ku kuzhi ba'anawa. 11 Ka ta'i tanghǝ sǝngha, pishinda njir dawa tǝ huɓunda nyaki nyi. Ka ɗa wi zhang ka ku huɗa nda, nda fa'abiya gǝna nyi, nda ɓǝlshiu tǝkǝra Urshalima. 12 "A da ɗa mǝnakǝ ko mǝr hirgyaɗi aka ɓwaɓwa tǝ uya zǝmǝnghǝ wa. A da mǝnakǝ ko mǝr hirgyaɗi aka nja zhazhinda njir Yahuda wa. A da ɗa tsatsa ko gyaɗǝ nda pishir ɓwaɓwatǝ kǝnda wa. 13 A da ki ko nda gwa ku nyavi na'a na nji pishinda mwandzhi tǝ sǝya tǝkǝra nda wa, A da mǝnakǝ ko mǝr hirgyaɗi aka ɓwaɓwatǝ nda zamǝnghǝ kwa wa. A da ki ko fa'atǝ gǝna nyi, pishinda tǝmachi tǝ shilia tǝkǝra cha wa. 14 A da ko nda ta'i ku mǝtǝkǝr laku, ko tsa nji inda kwa gwa hwi nda wa. A da ko nda sǝya nji nda mbǝɗǝtanda, ko nǝnya njir dawa aku bijir ɓwaɓwatǝ wa. Nja zhazhinda Edom, nja hǝrtǝ Israila 15 Biji nda naya Tlakǝu kwa mǝrtǝnyi nǝuma nǝ jul nji dǝhǝ ɗatǝ lǝhǝu. Nakǝ Edom, sǝnda ka mǝrti, na cha njo mǝrtǝngha. Sǝnda ka kalata ti, kwa ɓǝla yatǝ kǝra ka. 16 Wi nda hya dasǝnya nji ɗa kyatǝ mǝ ɗa da karti, ǝngǝ tsǝu naka ana jul nji inda tǝ ɓandǝ nghǝ kwa dasǝnya ɓwaɓwatǝ nda ya kwa pǝa sǝyatǝ kǝra hi. Vǝl, nahi jul nji i hyo sa, hyo dasǝnya, ya hyo ɗa wi a hi ta ɗa pa'a na ngya wa. Israila tǝ kwasa 17 Kǝl ja, a kyo mǝ Sihiyona njo uya nji inda tǝ mbǝɗa, ya kwa ɗa mbwa karti.Njir Yakubu tsǝu kwa fa'abiya ki sǝkǝnda. 18 Ki Yakubu kwa ɗa ka hu'u, ki Yusufu tsǝu kwa ɗa wi kyara hu'u; ki Isuwa njo drǝɓǝnda, ya njo nǝnyi hu'u ba nginda. A nya ndǝla Isuwa da kwa mbǝɗǝ mada zhang wa. Naya Tlakǝu ngǝ tǝ na. 19 Njir Israila nda vu Negeb ka ngya vu kǝram Edom. Nda na ngya tǝ babal Yahuda kwa hǝtǝ hǝ'i Filistiya. Israila tsǝu kwa hǝtǝ Ifraimu ana Samariya. Njir Banyami tsǝu kwa hǝtǝ Gileyad. 20 Lǝvalǝva nǝ Israila inda ku mavakur, kwa ɓǝl shili, ndǝ hǝtǝ hǝ'i Kan'ana ana Zarefat. Njir mǝr mavakur nda hya'atǝ vu Urshalima nda na ngya vu Sefarad kwa hǝtǝ Negeb. 21 Nji inda kwa mbǝɗandi, ndo gyo kǝram Sihiyona a vu Urshalima, ndo sǝm tǝlkur tǝkǝra kǝram Edom. Ana Tlakǝ na kǝrnyi kwa ɗa ka Tǝl.