12
1 Əsəkəu, ɓwanyar Hyel Tlakə tə shil daya:
2 nakə ja zər ndəu, ana ngyaka ku pama njir tləmwali. Tə nda na li ya a ndo la'a wa tə nda na himi ya a ndo ngat wa, aka na nda njir tlə mwali nda.
3 "Aka ənga, zər ndəu, fa'a kar ngha ka təra ki mər mihiɓkur, ya ana pichi ko ma'i, wi nda ko ɓatləya ndo la'a nghə nda ko təra kyatə hə'i mihiɓkur ngha. Kə'i ka ba nda zənbiya bada ngə na nda njir tləmwali nda səkənda.
4 Ana pichi, mando dzama, fa'abiya kar ngha ka ma'i ki mər mihiɓkur. Ətsəu atə bijir akəu, mando dzama ka təra biya wi ngə tə njir ma'i ki mɨr mihiɓkur.
5 Ma ndo dzama, ka viviɗəbiya kau ku dza bangu ka həbiya kar nghə təwari.
6 Hətə kar nghə ka dlakəya tə patləka ka ndo dzama ko təra ku kutla. Ka mbuya huɗmaka tsaka da la'a hə'i, aka yo mərtə ba'ada naka a ku ki njir Isra'ila.
7 Əngə tanyi ya məra winda nja tsauɗabar. Atə pichi ya fa'abiya karɗa aka ma'i ki mər mihiɓkur. Ətsəu atə pichir akəu ya viviɗbiyaka'u nachayaku dza bangu ya fa'abiya karɗaatə kutla,ya hətiatə patləkayayo təra ndo dzama.
8 Umbudla, ngə mafakə Hyel tə shil na'a.
9 Zər ndəu, a njir tləmwali ki njir Isra'ila inda da yiu ngha ənda min ko mər ma?
10 " Ka nar nda, jan sə Hyel ndər gyalkur tə na; Mafakə na anə njir nyavi təl təl nda ku Urshalima ana dəhə njir ki Isra'ila nda tanda.'
11 Ka nar nda, 'naya sər ba'ada ya nəhi.' "Wingə ya mər nga əngə tanyi tsəu njo mər tənda. Ndo təra ki mər mavakur.
12 "Njir nyavi təl təl ku pama nda kwa pətə karnyi tə patləkacha aku kutla kwa təra, njo viviɗbiya ka'u ku dza bangu akacha biya kwa. Cho mbuya huɗmacha tsa cha da la'a hə'i.
13 Yo hyanda hiɗi ɗa yo səya nyi ni na ləbam ɗa; Yo shilnacha vu Babila hə'i njir Kaldiya, ya ada cho la'a wa ana ənga a hinda cho tah.
14 Yo winda dəhə nji'inda kə'i cha tə gyang- zəwa təlkurnyi-ya yo gədlənda na katsakər təstəsa.
15 " Ndo zəndi ənda naya ngə Hyel Tlakəu, aku bijinda ya winda nda kyatə hə'i i ga farna nda ku pama nji pampaməu.
16 Amma yo kanda kushiu ku pama nda tsa katsakər, huɓwa and təmachi, aka ma nda kyatə hə'i mavakur ndo zəbiya chulkə ngya hiɗa hiɗa i i. Ana ənga ndo zəndi ənda naya ngə Hyel Tlakəu.
17 Ətsəu, mafakə Hyel Tlakə tə shil na'a.
18 " Zəe ndəu, ka ləvəra ma ko səm sər səma, ka dzədzi mako sa ɓiti.
19 Ka na nə njir hə'ina, jan sə nda Hyel ndər gyakur tə na təkəra nji nda kwa ngya ku Urshalima and atə hə'i njir Isra'ila: Ndo səm sər səm ana dza ndo dzə dzi ndo sha ɓiti ana ləvəra, aka dəhə sə nda ku hə'i njir Isra'ila njo fa'abiya ana sə nda njir tləmwali nda na ngya kwa mər.
20 Mələm ingə nji na ngya kwa inga ndo ɗaka mbwarki ana tsəu hə'i kənda o ɗaka sə ɓwatanyi. Ana ənga ndo zəndi ənda naya ngə Hyel Tlakəu.'"
21 Əsəkəu mafakə Tlakəu tə shil na'a.
22 "Zər ndəu, mingə ɓwanya ba'ada ndahi ni atə hə'i njir Isra'ila: Hanyi kwa tərabiya a mətakər zang do nyabiya dzə wa?'
23 Ka nar nda, "jan sənda Hyel ndər gyalkur təna: Yo ta'ində chulkə ɓwanya ba'ada nga, ya ada njo ɓəla pə chulkən na ba'ada avu Isra'ila wa.' "kanar nda biji ɗati ləhəu nda dəhə sənda ku shanguɗəu kwa nyabiya dza!"
24 Aka ada njo tsaktə pəsər shakər nə nji wa ya ada njo tsaktə ndzam gəzə gəzə ku pama njir Isra'ila wa.
25 Amma naya Tlakəu yo na ya o nyabiya dzə ada na ɗəbiji wa. Aka aku biji kəhi nahi ki njir tləmwali, yo nyabiya dəhə sənda ya na, Tlakə ngə təna!"
26 Mafakə Tlakəu tə shil na'a:
27 "Zər ndəu, Ki njir Isra'ila kwa səngə cho nangə ya kwa hətə biji 'waləu təvi o nyabiya dza.'
28 "Aka ənga ka narnda, "Jan sənda Hyel ndər gyalkur təna: Dəhə sənda yana kwa nyabiya dza, Hyel ndər gyalkur təna!"