20
1 A ku bijinda shiləkə tə səya Hezekiah kushu cho nda gəla ta.
Ngə ndər mətakər Ishaya zər Amoz tə yada cha ga narnyi, <<Janə sənda Tlakə tə na: Tsəlpəhitə kingha, ngam ko ta; a ko mbə wa.>>
2 Ngə Hezkiah tə shandə huɗəma cha biyatəwa dza bangu ga pətlənya nə Tlakəu, 3 << Cha na, Tlakəu, ɗunghatə ənda ya ma'i amangha ku jirkur ana ta ya zhang, a mərtəya sənda durdur a tə lya ka.>> Hezekiah tə tiwi 'ual'ualu.
4 Təvi Ishaya o ngyar adar patla nda, ngə Tlakəu tə narnyi, 5 <<Ɓəl ka yi narnyi nə Hezekiah, gau nə nji ɗa, <<ənda janə sənda Tlakəu, Hyel nə Adanyi Dauda tə na: A ngatə ya pətlənya ngha ga la'a sələm ngha; yo mbandə ngha. Pishir hanyi makərkunyi ghəya ənya, go ma'i gyo mbwa'alə Tlakəu. 6 Yo tsakətə nghə fa kwabətufu. Yo dləuya nghə ana mələm na ku cha təl njir Assyria. Yo tsanda mələm na ka ngam naya təkər ɗa ana kadakaliya ɗa Dauda.>>
7 Təma ngə Ishaya tə na, <<ɓwagu hyali kanda.>> Ngə nda mərtə ga ɓəstə a tə sə mbamba nda, ngə cha mbəa.
8 Ngə Hezekiah tə jau Ishaya, <<Mi ngə sənda chari ənda Tlakə kwa mbandə ɗa, ənda yo nau ma'i a gyo mbwa'alə Tlakə pishir hanyi makərkunyighəya tə pəchinya?>>
9 Ngə Ishaya tə ɓəlakənyi, <<Janə ba'adar Tlaƙə a nəngha, nda Tlakə na kərnyi kwa mərtə ngha wi nda cha mər alkawal: Ko i shanguɗa whi biyama təkə hi kumma zəma, a ko i cha ma'i biya hi təkə hi kumma?>>
10 Ngə Hezekiah tə na, <<Sə kusu cha shanguɗa ma'i a biyama təkə hi kumma,>> <<atsa a biya hi təkə hi kumma.>>
11 Təma ngə Ishaya ndər mətakər tə pətlənya nə Tlakəu, ngə Tlakə tə shandə shanguɗa nda biya hi təkə kumma tə ndəɗiya lakur ma'i təl Ahazi. 12 Aku bəji nda, Merodak Baladan zər Baladan təl Babila tə ngatə ənda Hezekiya da yiying wa, ngə cha sətə nyi kainau ana ga'a. 13 Hezekiya tə dləutsə changhabal inda ga char nda dəhə sə inda ku məɗəwa nyi, ka azurfa, bəjingha ka kar yaji ana mal, ana dəhə kar pah nyi ana dəhə sə inda ku məɗəwa nyi. A vanya sə da nda ku məɗəwa nyi ndara kala mbwa ku ki nyi nda pa'a cha char nda wa. 14 Ngə Ishaya ndər mətakər tə yada Hezekiya ga yi jau nyi bəra, <<Mi nji inga na? Aman hya'atə nda?>> Ngə Hezekiya tə wauma, <<Hya'atə tə vanya hə'i naɗəu, hya'atə vu Babila.>> 15 Ngə ndər mətakər tə jawa, <<Mi nda la'a tə patla ngha?>> Ngə Hezekiya tə wuma, <<La'atə nda dəhə sə inda tə patla ɗa, a vanya sə da nda ku huɗa gəna ɗa da nda pa'a ya char nda wa.>> 16 Ngə Ishaya tə nar nyi nə Hezekiya, <<Janə sə nda Tlakə tə na: 17 Kəpal da wa, bəji kwa shili, nda dəhə sə inda tə patla ngha, ana dəhə sə inda ada ngha piya ku məɗəwa tsa'a tə pəchi nə nya na, njo fa'abiya yi Babila. A vanya sə do həyadzə wa, ənghwandə Tlakəu. 18 Njo fa'atə alenya nyandəlakə tsə'u, inda hi mashi zhang kə'iri, njo ki tasiya nda ka nda mər tlər tə patla təl Babila.>> 19 Ngə Hezekiya tə wuma, <<Ɓwanya Tlakə ngə ka pəbiya nga mənakəu.>> Aka co har ənda piyarɗufə da ku ngya nyi. 20 Həyadzər sə inda Hezekiya tə mər ku bəjir təlkur nyi, dəhə sə inda cha uya, ana ənda cha ɓatlətə dəl dihi, ana lakur ɓiti nda cha kəya ka səgwa na ɓiti ku ta mələm, nja tsəfəbiya ku likatəkatə labar ka təl ka təl nə Yahuda. 21 Hezekiya tə tah, ngə zər Manasa tə dləutsə cha cha ga ɗa ka təl.