Ga''a aka Hər Mbwa'ala
29
1 Ngə təl Dauda tə nar nyi nə dlama nji, <<Zər ɗa Saloman nda Hyel tə tabiya, zər nga, a sə da cho zənda gwadagu wa. Ya jan tlər ngə 'aulə gagaɗa, aka Mbwa'alə na a da mbwar ngya ndə ngə, kəl ja, mbwar ngya Hyel nga. 2 A mər təya tlər dəhə sənda tsa ya ga uya, bəjingha aka tlər bəjingha, azurfa ka tlər azurfa, brone aka tlər nda njo mər ndza,, lyang aka tlər lyang, ana wua aka tlər nda njo mər na wua, ətsəu onyx aka ɓatlə tokwez, hangu kala pampaməu ana kala hangu gumaguma ana marbəl, dəhə sə'i nga a uya tə 'walə gagaɗa. 3 Matsa sə'inə ya tsəmtə ina, yo nənyi bəjingha ana azurfa nda tsa ya, aka tlər ki Hyel ɗa, aka yo nyida ki Hyel ɗa. 4 Jan ya shiltə na ton gharəu nə bəjingha tsorəu ,ana azurfa tsorəu kwa ndiya ton fwaɗəkumənyi ka ɓatlə dza bagu ki Hyel, 5 ana tlər nda njo mər na bəjingha ana azurfa, ana dəhə tlər inda njir tlər chi kwa məra. Sakan ja, wa ngə kwa dləukər ka cha dzəvəya kərnyi ənya nə Tlaka?>>6 Ngə njirawawa'a nə kala nyavi, gau inda təkəra jul i'i, gau inda təkəra ləvaləva dəbəu dəbəu ana nə gharəu gharəu, ana nji'inda təkəra tlər təl tə shili na ga'a ana chi wunghəu. 7 Nda shili na ga'a aka tlər mbwala nda, nda shili bəjingha ton 170, ana azurfa nda kwa ndəɗə ton 340, ana bronze kwa ɗa ton 620, ana lyang inda kwa ndəɗə ton 3,400. 8 Nji;inda na hangəu daɗədaɗə tə shili ku məɗəwa Hyel təwa cha Yehiyel ku nyavi Gashon ku nyandəla Lawi. 9 Ngə nji tə mər hirgyaɗi nda nda la'a chul ga'a nda nja tsəmətə ana chi wunghəu anə Tlakə. Təl Dauda ma'a tə mər hirgyaɗi gagaɗa.
Dauda tə Fal Hyel
10 Ngə Dauda tə fal Tlakə biyamar dəhə dlama nji, cho na, <<Falə ngya nəngha, Tlakəu, Ada nya adan ea, Isra'ila, ba'aba'anawa. 11 Tlakəu, dəgalkur ana gyalkur nənghə inga, fala ana səli ba'a mənakəkur, aka dəhə səu ki huɗamələm ana dunəya nənghə nga. Tlakəu, nənghə ngə təlkur, a hətənghə ttunji səli matsa dəhə səu. 12 Gəna ana səli a tsakə biya nda, nakə ngə təl təkəra kala səu. Gyalkur ana dunama da tsa ka, nda ko nənyi səli ana dunama nə dəhə səu. 13 Sakan ja Tlakəu, eo usaku ngha, eo hətənyi səli nə tləmə ngha.
14 <<Kəl ja, naya wa ya, ya ka wa ingə nji ɗa, nda eo nau shili na, ga'a ana chi wung wi na? A tsakə dəhə səu tə biya, ya sənda tə biya ku cha kə tanyi ngə ea ɓəlandə ngha. 15 Mihiɓi tanyi na ea biya mangha, tang wi nda tə ka jival kə ea. Hanyi kə ea tə dunəya wi shanguɗa cha, a fəkər da wa. 16 Yawa Tlakəu, Hyel kə ea, dəhə sə'inə ea tsəmtə 'ualə ka nja hərtə nyi mbwa'alə ka tləmə nghə nda karti, ku cha kə biya cha, ya dəhə sə nənghə nga. 17 Hyel ɗa, a zəndətə ya ko ndzam ɗəfu. Jan ya shili tə na dəhə sə'ina ana ta zhang. Ya a zəndətə ya ənda ana ikur kənda nə nji nghə inə tə shili na ga'a nəngha. 18 Yawa Tlakəu, Hyel kə'i ka jival kə ea Ibrahim, Ishaku ana Isra'ila, chiu chul nəna sə ku ɗəfwa nji nghə ba'anawa, ana ka mərtə ɗəfwa nda kəriwa nə ngha. 19 Ətsəu ka mərtə ɗəfwa Saloman zər ɗa cha ɗa kəriwa nə ngha ana dəhə ɗəfwa cha ga cha ɓəlatə tsaubar, requirements ana gadlagadla ngha, ana cha mər kala sə ka cha hərtə mbwa'alə mənakə, nda akarə ngə ea tsəm sə'ina.>>
20 Ngə Dauda tə nar nyi nə dlama nji, <<Falə ma Hyel Tlakən hi.>> Ngə dəhə nda tə fal Tlakəu, Hyel nə jival kənda, ndə uzhi ga piya hu'i amar Tlakəu ana təl.
Nja Mbanda nyi Kər Saloman
21 Vanya zəkəu ngə nda handa təmachi nə Tlakəu, hatəmachi nə nginda, gyal tla 1,000, gam 1,000, shili kətəng 1,000 tsa'a na hatəmachi nə sa, ana alenya hatəmachi bwaɓə aka dəhə Isra'ila. 22 Nda səma ga sa ana hirgyaɗi gagaɗa biyamar Tlakə pishinda.
Ngə nda ɓəla mbanda nyi kər təlkur nə Saloman zər Dauda səkəu, nda dzəvəya nyi biyamar Tlakə ka cha ɗa ka təl ana Zadok tsəu cho ɗa ka pərist. 23 Ngə Saloman tə ngya tə dzəga təlkur nda Tlakə tə fiya, atəvəra ada nyi Dauda. Cha uya tsaka, ya dəhə Isra'ila kwa nəu nya cha. 24 Dəhə gau ana nji kwalkwal, ana dəhə nguil shili Dauda tə na ndo ɗa kəriwa nə Saloman.
25 Tlakə mərtə Saloman na səli gagaɗa amar dəhə Isra'ila, ga mərtə dəhə njir Isra'ila kwa la'a səli nyi, nda a vanya təl da nja taa la'a səli nyi wi nə Saloman wa.
Tər Dauda
26 Dauda zər Jesi tə səm təlkur təkəra dəhə Isra'ila. 27 Cha səm təlkur təkəra Isra'ila, fa fwaɗəkumənyi, fa məɗəfə vu Hebron ana makərkumənyi parnya makər vu Urshalima. 28 Ndə halhal cha gagaɗə ma cha tah, cha ngatə məsəɗakəkur ngya, gəna ana səli. Zər nyi Saloman tə ɗa ka təl a hinyi.