فصلِ شوزدَهُم
جم کدونِ کومَک بَلدِه ایماندارای ضرُورتمَند
1 آلی دَ بارِه جم کدونِ کومَک بَلدِه مُقَدَّسِین: امُو رقم که دَ جماعت_های ایماندارای غلاتیه هِدایَت دَدُم، شُمو ام امُو رقم کُنِید. 2 دَ روزِ اوّلِ هر هفته،a هر کُدَم شُمو یگ هدیه دَ مُطابِقِ عاید خُو جدا کده پس-انداز کُنِید تا دَ وختِ اَمَدون مه دَ پَیسه جم کدو ضرُورَت نَشُنه. 3 و غَیتِیکه ما بِرَسُم، کسای ره که شُمو تایِید کُنِید، قد خط_ها رَیی مُونُم تا هدیِه شُمو ره دَ اورُشَلیم بُبره. 4 و اگه صَلاح شُد که ما ام بورُم، اوخته اُونا قد ازمه یگجای موره.
نقشِه پولُس بَلدِه سَفرِ آینده
5 وختِیکه از ولایتِ مَقدونیه تیر شُدُم، دَ پیشِ ازشُمو مییُم؛ چُون قَصد دَرُم که از مَقدونیه تیر شُنُم 6 و اِمکان دَره که قد شُمو بُمنُم و حتیٰ زِمِستو ره دَ اُونجی تیر کنُم تا شُمو مَره دَ هر جایی که بورُم کومَک کده رَیی کُنِید. 7 اِم دفعه نَمیخایُم که شُمو ره دَ سرِ راه بِنگرُم، چُون اُمِیدوار اَستُم که یگ مُدَت ره قد شُمو بُمنُم اگه مَولا اِجازه بِدیه. 8 مگم تا وختِ «عِیدِ روزِ پِنجاهُم» دَ اِفِسُس مُومنُم، 9 چراکه یگ درگِه کٹه و تاثِیرگُذار بَلدِه خِدمت مه واز شُده، ولے مُخالِفا ام کَلو اَسته.
10 اگه تِیموتائوس دَ پیش شُمو مییه، توخ کُنِید که دَ مینکل شُمو بِدُونِ ترس بُود-و-باش کُنه، چُون اُو ام دَ کارِ مَولا مَشغُول اَسته، امُو رقم که ما اَستُم. 11 پس هیچ کس اُو ره خار-و-حقِیر حِساب نَکُنه. اُو ره دَ صُلح-و-سلامَتی سُون راهِ شی رَیی کُنِید تا پیشِ ازمه بییه، چُون ما قد دِیگه بِرارو چِیم دَ راهِ ازُو اَستُم.b 12 دَ بارِه بِرار مو اَپولُس، ما اُو ره کَلو تشوِیق کدُم که قد دِیگه بِرارو دَ پیش شُمو بییه، لیکِن هیچ راضی نَشُد که دَ امزی زمان بییه؛ مگم وختِیکه فرصت پَیدا کُنه، اُو مییه.
13 هُوشیار بَشِید، دَ ایمان خُو قایم-و-اُستوار بُمنِید، قَوی و مردِ جان خُو بَشِید. 14 بیلِید که تمامِ کارای شُمو قد مُحَبَت قَتی بَشه.
15 اَی بِرارو، شُمو مِیدَنِید که خانَوارِ اِستیفان اوّلِین کسای بُود که از ولایتِ اَخَیاc ایمان اَوُرد و خودون ره بَلدِه خِدمتِ مُقَدَّسِین وَقف کد. پس از شُمو خاهِش مُونُم 16 که شُمو امزی رقم مردُما اِطاعَت کُنِید و ام از هر کسی که قد ازوا کار و زَحمت مُونه. 17 از اَمَدونِ اِستیفان و فورتُوناتُس و اَخَئِیکاس خوش شُدُم، چراکه کمبُودی شُمو ره اُونا پُوره کد؛ 18 چُون اُونا روحِ ازمه و ازشُمو ره تازه کد. پس امی رقم آدما ره بِنَخشِید.
سلام_های آخِری
19 جماعت_های ایماندارای ولایتِ آسیا،d دَز شُمو سلام مِیرسَنه؛ اَکِیلا و پرِسکِلاe قد جماعتِ ایماندارای که دَ خانِه ازوا اَسته، ام بَلدِه شُمو دَ نامِ مَولا سلام_های گرم رَیی مُونه. 20 تمامِ بِرارو دَز شُمو سلام رَیی مُونه. یگدِیگِه خُو ره قد رُوی ماخی مُقَدَّسانه سلام بُگِید.