فصلِ شَشُم
فَیصَلِه دعوا_ها دَ مینکلِ بِرارونِ ایماندار
1 وختِیکه کُدَم کس از مینکل شُمو دَ خِلافِ دِیگِه شُمو دعوا دَشته بَشه، چِطور اُو جُراَت مُوکُنه که دعوای خُو ره دَ محکمه پیشِ قاضی_های بےاِنصاف بُبره، نَه دَ پیشِ مُقَدَّسِین؟ 2 آیا شُمو نَمِیدنِید که مُقَدَّسِین دَ آخِر زمان دُنیا ره قضاوَت مُوکُنه؟ پس اگه دُنیا باید دَ وسِیلِه ازشُمو قضاوَت شُنه، آیا شُمو لیاقتِ ازی ره نَدرِید که دَ بارِه قضیه_های ریزه فَیصَله کُنِید؟ 3 آیا شُمو نَمِیدنِید که مو دَ آخِر زمان ملایکه_ها ره قضاوَت مُوکُنی؟ اگه مُوکُنی، قضیه_های روزمَره هیچ چِیز نِیَسته. 4 پس وختِیکه قضیه_های روزمَره دَرِید، آیا کسای ره بحَیثِ قاضی تعیِین مُونِید که دَ نظرِ جماعتِ ایماندارا خار-و-حقِیر حِساب مُوشه؟ 5 ما اِی ره مُوگُم تا شُمو شرمِنده شُنِید. آیا دَ مینکل شُمو یگ آدمِ دانا ام وجُود نَدره که بِتنه دَ بَینِ بِرارونِ ایماندار فَیصَله کُنه؟ 6 بَلکِه یگ بِرار دَ ضِدِ دِیگه بِرار دَ محکمه موره و اُو ام دَ پیشِ بےایمانا. 7 دَ حقِیقت دَشتونِ امی رقم دعوا_ها قد یگدِیگه بَلدِه شُمو یگ شِکست اَسته. چرا ازی کده ظُلم ره قبُول نَمُونِید؟ چرا ازی کده نَمیلِید که بازی بُخورِید؟ 8 برعکس خودون شُمو ظُلم مُونِید و بازی مِیدِید؛ اُو ام بِرارونِ ایماندار ره! 9 آیا شُمو نَمِیدنِید که بدکارا وارِثِ پادشاهی خُدا نَمُوشه؟ خود ره بازی نَدِید، چراکه فاسِقا، بُت‌پرَستا، زِناکارا، باچه‌بےرِیشا، لواطگرا، 10 دُزا، طمعکارا، شرابخورا، بَد زِبونا و زورگِیرا وارِثِ پادشاهی خُدا نَمُوشه. 11 بعضی ازشُمو امی رقم آدما بُودِید، مگم غُسل دَده شُده مُقَدَّس شُدِید و دَ نامِ مَولا عیسیٰ مسیح و دَ وسِیلِه روحِ خُدای مو عادِل شُدِید.
جِسم بَلدِه عِبادتِ خُدا اَسته
12 تمامِ چِیزا بَلدِه مه رَوا اَسته، مگم تمامِ چِیزا فایده‌مند نِیَسته. تمامِ چِیزا بَلدِه مه رَوا اَسته، مگم نَمیلُم که یَگو چِیز دَ بَلِه مه حاکِم شُنه. 13 خوراک بَلدِه کَوره اَسته و شِکم بَلدِه خوراک، مگم خُدا ام اِی ره و ام اُو ره نابُود مُونه. جِسمِ اِنسان بَلدِه زِناکاری نِیَسته، بَلکِه بَلدِه مَولا اَسته و مَولا بَلدِه جِسم. 14 خُدا قد قُدرت خُو مَولا عیسیٰ ره دُوباره زِنده کد و مو ره ام دَ آخِر زمان زِنده مُوکُنه. 15 آیا شُمو نَمِیدنِید که جِسم_های شُمو اَعضای جِسمِ مسیح اَسته؟ پس آیا رَوا اَسته که اَعضای جِسمِ مسیح ره گِرِفته اَعضای جِسمِ فاحِشه جور کنُم؟ هرگِز نَه! 16 آیا شُمو نَمِیدنِید که هر کسی که قد فاحِشه یگجای شُنه، قد ازُو یگ جِسم مُوشه؟ چُون کِتابِ مُقَدَّس مُوگیه: ”هر دُوی شی یگ جِسم مُوشه.“ 17 لیکِن کسی که قد مَولا یگجای شُنه، روحِ شی قد روحِ ازُو یگ مُوشه. 18 از زِناکاری دُور دُوتا کُنِید. هر گُناهِ دِیگه ره که اِنسان انجام مِیدیه بُرو از جِسم شی اَسته، مگم زِناکار دَ ضِدِ جِسم خُو گُناه مُوکُنه. 19 آیا شُمو نَمِیدنِید که جِسم شُمو جایگاهِ روح اُلقُدس اَسته که دَز شُمو وجُود دَره که اُو ره از خُدا یافتِید و شُمو دِیگه صاحِبِ جِسم خُو نِیَستِید، 20 چُون شُمو دَ یگ قِیمَت خرِیده شُدِید؟ امزی خاطر خُدا ره قد جِسم خُو بُزُرگی-و-جلال بِدِید.