فصلِ پوزدَهُم
زِندگی کدو بَلدِه خوشی دِیگرو
1 مو که قَوی اَستی، باید ناتَوانی_های مردُمای ضعِیف ره تَحَمُل کُنی و دَ پُشتِ خوشی خودون خُو نَگردی. 2 هر کُدَم مو باید همسایِه خُو ره بَلدِه خُوبی شی خوش کُنی تا باعِثِ آبادی شی شُنی. 3 چُون مسیح ام پُشتِ خوشی خود خُو نَمِیگشت، بَلکِه امُو رقم که نوِشته شُده: ”تَوهِینِ کسای که تُو ره تَوهِینِ مُونه، دَ بَلِه ازمه قرار گِرِفته.“ 4 چُون هر چِیزی که دَ گُذشته نوِشته شُده، بَلدِه تعلِیمِ ازمو نوِشته شُده تا دَ وسِیلِه پایداری و تشوِیقی که نوِشته_های مُقَدَّس مُوبَخشه اُمِیدوار بَشی. 5 خُدای که عطا کُنِندِه بُردباری و دِلگرمی اَسته، شُمو ره قُوَت بِدیه تا مُطابِقِ خاستِ مسیح عیسیٰ قد یگدِیگِه خُو همدِل-و-همفِکر بَشِید 6 و یگ-دِل و یگ-زِبو شُده خُدا ره که آتِه مَولای مو عیسیٰ مسیح اَسته، حمد-و-ثنا بُگِید.
7 پس یگدِیگِه خُو ره قبُول کُنِید، امُو رقم که مسیح شُمو ره بَلدِه بُزُرگی-و-جلالِ خُدا قبُول کد. 8 چُون ما دَز شُمو مُوگیُم که مسیح بخاطرِ حقِیقتِ خُدا خِدمتگارِ یهُودیاa شُد تا وعده_های ره که دَ بابه‌کَلونا دَده شُدُد، تصدِیق کُنه، 9 و تا مردُمای غَیرِ یهُود خُدا ره بخاطرِ رَحمت شی حمد-و-ثنا بُگیه. امُو رقم که نوِشته شُده:
”امزی خاطر تُو ره دَ مینکلِ مردُمای غَیرِ یهُود اِقرار مُونُم
و بَلدِه نام تُو سرُود میخانُم.“
10 و بسم مُوگیه:
”اَی مردُمای غَیرِ یهُود، قد قَومِ ازُو خوشی کُنِید.“
11 و بسم:
”اَی پگِ مِلَّت_ها، خُداوند ره سِتایش کُنِید،
اَی تمامِ قَوم_ها، اُو ره حمد-و-ثنا بُگِید.“
12 و اِشَعیا ام مُوگیه:
”رِیشِه یسّی مییه،
امُو که باله مُوشه تا دَ بَلِه مِلَّت_ها حُکمرانی کُنه
و مِلَّت_ها دَزُو اُمِید مُوکُنه.“
13 خُدای که سرچشمِه اُمِید اَسته، شُمو ره قد خوشی کامِل و آرامِش دَ ایمان پُر کُنه تا دَ وسِیلِه قُدرتِ روح اُلقُدس از اُمِید لَبریز شُنِید.
پولُس، خِدمتگارِ مردُمای غَیرِ یهُود
14 اَی بِرارون مه، خود مه دَ بارِه شُمو اِطمِینان دَرُم که شُمو پُر از نیکی اَستِید و از هر عِلم پُر شُدِید و مِیتنِید که یگدِیگِه خُو ره نصِیحَت کُنِید. 15 باوجُودِ ازی، ما غَدر جُراَت کده دَ بارِه بعضی مطلب_ها دَ عِنوانِ یادآوَری دَز شُمو نوِشته کدُم، بخاطرِ فَیضی که خُدا دَز مه بخشِیده 16 تا خِدمتگارِ مسیح عیسیٰ بَلدِه مردُمای غَیرِ یهُود بَشُم و وظِیفِه پیشوایی اِعلان کدونِ خوشخبری خُدا ره انجام بِدیُم و تا مردُمای غَیرِ یهُود یگ هدیِه قابِلِ قبُول بَشه که دَ وسِیلِه روح اُلقُدس تقدِیس شُده. 17 پس دَ وسِیلِه مسیح عیسیٰ دَ بَلِه کارای خُو که دَ خِدمتِ خُدا انجام مِیدیُم، اِفتخار مُونُم. 18 چُون ما جُراَت نَمُونُم که از کُدَم چِیزی دِیگه توره بُگُم بغَیر از چِیزی که مسیح از طرِیقِ ازمه انجام دَد تا اُو اِطاعَتِ مردُمای غَیرِ یهُود ره دَ دِست بیره، دَ وسِیلِه گُفتار و کِردارِ ازمه، 19 دَ وسِیلِه قُدرتِ مُعجزه_ها و چِیزای عجِیب و دَ وسِیلِه قُدرتِ روحِ خُدا، دَ اندازِه که از اورُشَلیم شُروع کده تا منطقِه اِلیریکُوم خوشخبری مسیح ره بطَورِ کامِل اِعلان کدُم. 20 امزی خاطر شور-و-شَوق دَرُم که خوشخبری ره دَ جایی اِعلان کنُم که نامِ مسیح هنوز دَ اُونجی گِرِفته نَشُده، تا دَ بَلِه پای‌سنگِ یَگو کسِ دِیگه آباد نَکنُم، 21 بَلکِه امُو رقم که نوِشته شُده:
”بَلدِه کسای که دَ بارِه ازُو گُفته نَشُده، اُونا مِینگره
و کسای که نَشِنِیده، پَی مُوبره.“
22 امی دَلِیل بارها مانِع اَمَدون مه دَ پیشِ ازشُمو شُد.
تصمِیمِ پولُس بَلدِه دِیدونِ ایماندارای رُوم
23 لیکِن آلی چُون دَ امزی منطقه_ها دِیگه جای بَلدِه خِدمت مه نَمَنده و غَدر سال_ها ام اَسته که دَ شَوقِ اَمَدو دَ پیشِ ازشُمو اَستُم، 24 هر وختِیکه سُون اسپانیا سَفر کدُم، دَ پیش شُمو مییُم. اَرے، اُمِیدوار اَستُم که دَ غَیتِ تیر شُدو از منطقِه شُمو، شُمو ره مُلاقات کنُم و غَیتِیکه از دِیدون شُمو برخوردار شُدُم، دَ کومَکِ ازشُمو دَ سَفر خُو اِدامه بِدیُم. 25 لیکِن فِعلاً سُون اورُشَلیم رَیی اَستُم تا مُقَدَّسِین ره دَ اُونجی خِدمت کنُم. 26 چُون ایماندارای مَقدونیه و اَخَیاb دَ خوشی خُو بَلدِه غرِیبای که دَ مینکلِ مُقَدَّسِینِ اورُشَلیم اَسته یگ کومَک رَیی کده. 27 اُونا دَ رضای خودگون خُو امی کار ره کد؛ دَ حقِیقت، اُونا دَیندارِ یهُودیا اَسته، چُون اگه مردُمای غَیرِ یهُود دَ بَرکت_های روحانی یهُودیا شرِیک شُده، بَلدِه ازوا ام لازِم اَسته که قد چِیزای مادی خُو یهُودیا ره خِدمت کُنه. 28 پس وختِیکه امی کار ره انجام دَدُم و اِطمِینان پَیدا کدُم که امی کومَک دَزوا رَسِیده، اوخته از راهِ منطقِه شُمو سُون اِسپانیا مورُم؛ 29 و ما مِیدَنُم وختِیکه پیش شُمو مییُم، ما قد بَرکت_های بےاندازِه مسیح مییُم.
30 اَی بِرارو، ما دَ نامِ عیسیٰ مسیح و دَ وسِیلِه مُحَبَتِ روح اُلقُدس از شُمو خاهِش مُونُم که شُمو دَ پیشِ خُدا دَ حقِ ازمه قد ازمه قتی سخت دُعا کُنِید. 31 دُعا کُنِید که ما از دِستِ بےایمانای منطقِه یهُودیه نِجات پَیدا کنُم و خِدمت مه دَ اورُشَلیم قابِلِ قبُولِ مُقَدَّسِین بَشه 32 تا دَ خاست-و-اِرادِه خُدا قد خوشی دَ پیش شُمو بییُم و قد شُمو یگجای تازه شُنُم. 33 خُدای که سرچشمِه صُلح-و-سلامَتی اَسته، قد پگ شُمو بَشه، آمین.