متیٰ 1

اِنجِیلِ عیسیٰ مسیح دَ مُطابِقِ متیٰ

فصلِ اوّل

پُشت نامِه عیسیٰ مسیح

‏1 پُشت نامِه عیسیٰ مسیح، اَولادِه داوُود، اَولادِه اِبراهِیم:

‏2 اِبراهِیم آتِه اِسحاق، اِسحاق آتِه یعقُوب و یعقُوب آتِه یهُودا و بِرارونِ ازُو بُود؛ ‏3 یهُودا آتِه فارِص و زارِح از تامار شُد. فارِص آتِه حَصرون، حَصرون آتِه ارام، ‏4 ارام آتِه عمِیناداب، عمِیناداب آتِه نَحشون، نَحشون آتِه سَلمون، ‏5 و سَلمون آتِه بوعَز از راحاب شُد. بوعَز آتِه عوبید از رُوت شُد. عوبید آتِه یسّی ‏6 و یسّی آتِه داوُود پادشاه بُود.

داوُود آتِه سُلَیمان از خاتُونِ اوریا شُد. ‏7 سُلَیمان آتِه رِحُبعام، رِحُبعام آتِه اَبیا، اَبیا آتِه آسا، ‏8 آسا آتِه یهوشافاط، یهوشافاط آتِه یورام، یورام آتِه عُزیا، ‏9 عُزیا آتِه یوتام، یوتام آتِه آحاز، آحاز آتِه حِزقیا، ‏10 حِزقیا آتِه مَنَسّی، مَنَسّی آتِه آمون و آمون آتِه یوشیا بُود. ‏11 یوشیا آتِه یِکُنیا و بِرارونِ ازُو شُد دَ زمانی که یهُودیا دَ بابُل بُرده شُد.

‏12 بعد از اسِیر شُدو دَ بابُل: یِکُنیا آتِه شِئَلتِیئیل و شِئَلتِیئیل آتِه زِروبابِل ‏13 و زِروبابِل آتِه اَبِیهُود و اَبِیهُود آتِه ایلیاقِیم و ایلیاقِیم آتِه عازور ‏14 و عازور آتِه صادوق و صادوق آتِه یاکِیم و یاکِیم آتِه ایلِیهُود ‏15 و ایلِیهُود آتِه اِلعازار و اِلعازار آتِه مَتان و مَتان آتِه یعقُوب ‏16 و یعقُوب آتِه یوسُف شُد و یوسُف شُوی مریَم بُود و مریَم عیسیٰ ره که لَقَب شی «مسیح» بُود، دَ دُنیا اَوُرد.

‏17 پس تمامِ نسل_ها از اِبراهِیم تا داوُود چارده نسل و از داوُود تا بُرده شُدونِ یهُودیا دَ بابُل چارده نسل و از بُرده شُدو دَ بابُل تا مسیح چارده نسل اَسته.

تَوَلُدِ عیسیٰ مسیح

‏18 تَوَلُدِ عیسیٰ مسیح اینی رقم واقِع شُد: وختِیکه مریَم آبِه عیسیٰ خوستِه یوسُف بُود، پیش ازی که هر دُوی شی یگجای شُنه، اُو دَ وسِیلِه روح اُلقُدس حامِله شُد. ‏19 خوستِه شی یوسُف، ازی که آدمِ دُرُستکار بُود و نَمیخاست اُو ره رَسوا کُنه، قَصد کد که اُو ره خَپ-و-چُپ ایله بِدیه. ‏20 وختِیکه اُو هنوز دَزی باره فِکر مُوکد، ملایکِه خُداوند دَ عالمِ خاو دَزُو ظاهِر شُده گُفت: ”اَی یوسُف اَولادِه داوُود، از گِرِفتونِ مریَم بحَیثِ خاتُون خُو ترس نَخور، چُون نِلغِه که دَ کَورِه شی دَ وجُود اَمَده از روح اُلقُدس اَسته. ‏21 اُو یگ باچه دَ دُنیا میره و تُو نام شی ره عیسیٰ بیل، چُون اُو قَوم خُو ره از گُناه_های شی نِجات مِیدیه.“ ‏22 پگِ امزی چِیزا واقِع شُد تا تورِه که خُداوند دَ وسِیلِه پَیغمبر گُفتُد، پُوره شُنه:

‏23 ”اینه، یگ دُخترِ خانه حامِله مُوشه و یگ باچه دَ دُنیا میره

و نام شی ره «عِمانُوئیل» میله،“

که معنای شی «خُدا قد از مو» اَسته. ‏24 وختِیکه یوسُف از خاو بیدار شُد، اُو امُو رقم کد که ملایکِه خُداوند دَزُو اَمر کدُد: اُو مریَم ره بحَیثِ خاتُون خُو گِرِفت. ‏25 مگم اُو قد شی یگجای نَشُد تا وختِیکه مریَم باچِه خُو ره دَ دُنیا اَوُرد؛ و یوسُف نامِ ازُو ره عیسیٰ ایشت.