زبُور 136

شُکرگُزاری بخاطرِ رَحمتِ خُداوند

خُداوند ره شُکر-و-سِپاس بُگِید، چراکه اُو نیکو یَه

و رَحمت شی اَبَدی اَسته.

‏2 خُدای خُدایو ره شُکر-و-سِپاس بُگِید،

چراکه رَحمت شی اَبَدی اَسته.

‏3 رَب-اُلارباب ره شُکر-و-سِپاس بُگِید،

چراکه رَحمت شی اَبَدی اَسته.

‏4 تنها امُو ره که کارای عجِیبِ بُزُرگ مُونه،

چراکه رَحمت شی اَبَدی اَسته؛

‏5 امُو ره که قد حِکمت خُو آسمونا ره خَلق کد،

چراکه رَحمت شی اَبَدی اَسته؛

‏6 امُو ره که زمی ره دَ بَلِه آوھا اَوار کد،

چراکه رَحمت شی اَبَدی اَسته؛

‏7 امُو ره که روشَنی های کٹه دَ وجُود اَوُرد،

چراکه رَحمت شی اَبَدی اَسته؛

‏8 آفتَو ره بَلدِه حُکمرانی دَ بَلِه روز،

چراکه رَحمت شی اَبَدی اَسته؛

‏9 ماهتَو و سِتاره ها ره بَلدِه حُکمرانی دَ بَلِه شاو،

چراکه رَحمت شی اَبَدی اَسته؛

‏10 امُو ره که اوّلباری های مِصر ره زَد،

چراکه رَحمت شی اَبَدی اَسته؛

‏11 و بَنی اسرائیل ره از مینکلِ ازوا بُرو اَوُرد،

چراکه رَحمت شی اَبَدی اَسته؛

‏12 قد دِستِ قَوی و بازُوی دِراز،

چراکه رَحمت شی اَبَدی اَسته؛

‏13 امُو ره که دریای سُرخ ره دُو شَق کد،

چراکه رَحمت شی اَبَدی اَسته؛

‏14 و بَنی اسرائیل ره از مینکل شی تیر کد،

چراکه رَحمت شی اَبَدی اَسته؛

‏15 لیکِن فِرعَون و لشکر شی ره دَ دریای سُرخ پورته کد،

چراکه رَحمت شی اَبَدی اَسته.

‏16 امُو ره که قَوم خُو ره دَ بیابو رَھبری کد،

چراکه رَحمت شی اَبَدی اَسته؛

‏17 امُو ره که پادشایونِ بُزُرگ ره زَد،

چراکه رَحمت شی اَبَدی اَسته؛

‏18 امُو ره که پادشایونِ قُدرتمَند ره کُشت،

چراکه رَحمت شی اَبَدی اَسته؛

‏19 سِیحون پادشاهِ اَموریا ره،

چراکه رَحمت شی اَبَدی اَسته؛

‏20 و عُوج پادشاهِ باشان ره،

چراکه رَحمت شی اَبَدی اَسته؛

‏21 و سرزمِینِ ازوا ره دَ میراث دَد،

چراکه رَحمت شی اَبَدی اَسته؛

‏22 دَ عِنوانِ میراث بَلدِه خِدمتگار خُو اِسرائیل،

چراکه رَحمت شی اَبَدی اَسته؛

‏23 امُو ره که دَ غَیتِ خاری-و-ذِلَت مو، مو ره دَ یاد اَوُرد،

چراکه رَحمت شی اَبَدی اَسته؛

‏24 و مو ره از چنگِ دُشمنای مو خلاص کد،

چراکه رَحمت شی اَبَدی اَسته؛

‏25 امُو ره که بَلدِه پگِ جاندارا روزی مِیدیه،

چراکه رَحمت شی اَبَدی اَسته.

‏26 خُدای آسمونا ره شُکر-و-سِپاس بُگِید،

چراکه رَحمت شی اَبَدی اَسته.