دَ سِتایشِ کارای بُزُرگِ خُداوند
135
حمد-و-ثنا دَ خُداوند!نامِ خُداوند ره سِتایش کُنِید.
اَی خِدمتگارای خُداوند، سِتایش کُنِید،
2 شُمو کسای که دَ خانِه خُداوند بَلدِه خِدمت ایسته مُوشِید،
دَ حَولی های خانِه خُدای مو.
3 خُداوند ره سِتایش کُنِید، چراکه خُداوند نیکو اَسته؛
دَ نامِ ازُو سرُود بِخانِید، چراکه دِلپَسند اَسته،
4 چراکه خُداوند یعقُوب ره بَلدِه خُو اِنتِخاب کده،
اِسرائیل ره دَ عِنوانِ مُلکیَتِ خاص خُو.
5 ما مِیدَنُم که خُداوند بُزُرگ اَسته،
خُداوند مو باله‌تَر از تمامِ خُدایو.
6 هر چِیزی که خُداوند خاست-و-اِراده کُنه، اُو ره انجام مِیدیه،
دَ آسمو و دَ زمی،
دَ دریا ها و دَ پگِ غَوُجی های دریا ها.
7 اُو آوُرھا ره از آخِرای زمِی باله مُونه،
اُو آتِشَک ها-و-گُرگُردراغ ره بَلدِه بارِش دَ وجُود میره
و باد ره از خزانه های خُو بُر مُونه.
8 اُو اوّلباری های مِصر ره کُشت،
ام از اِنسانا و ام از حَیوانا ره.
9 اُو علامَت ها و کارای عجِیب ره دَ مَنِه تُو رَیی کد، اَی مِصر،
دَ ضِدِ فِرعَون و تمامِ خِدمتگارای شی.
10 اُو مِلَّت های کَلو ره زَد
و پادشایونِ قُدرتمَند ره کُشت:
11 سِیحون پادشاهِ اَموری ها ره،
عوج پادشاهِ باشان ره
و پگِ پادشایونِa کِنعان ره.
12 اُو سرزمِینِ ازوا ره دَ عِنوانِ میراث دَد،
دَ عِنوانِ میراث دَ قَوم خُو اِسرائیل.
13 اَی خُداوند، نام تُو تا اَبَد باقی اَسته،
و یاد تُو، اَی خُداوند، نسل اَندر نسل،
14 چراکه خُداوند دَ دادِ قَوم خُو مِیرَسه
و دَ خِدمتگارای خُو دِلسوزی مُونه.
15 بُت‌های مِلَّت ها طِلّا و نُقره اَسته
و کارِ دِستای اِنسان.
16 اُونا دان دَره، ولے توره گُفته نَمِیتنه،
چِیم دَره، ولے دِیده نَمِیتنه؛
17 گوش دَره، ولے شِنِیده نَمِیتنه،
و نَفَس ام دَ دانِ ازوا وجُود نَدره.
18 کسای که اُونا ره جور مُونه رقمِ ازوا اَسته
و ام هر کس که دَزوا تَوَکُل مُونه.
19 اَی خانَوارِ اِسرائیل، خُداوند ره سِتایش کُنِید؛
اَی خانَوارِ ھارُون، خُداوند ره سِتایش کُنِید؛
20 اَی خانَوارِ لاوی، خُداوند ره سِتایش کُنِید؛
اَی کسای که از خُداوند ترس دَرِید، خُداوند ره سِتایش کُنِید.
21 خُداوند ره از صَهیون حمد-و-ثنا باد،
امُو ره که دَ اورُشَلیم بُود-و-باش دَره.
حمد-و-ثنا دَ خُداوند!