فصلِ پوزدَهُم
اَبیام پادشاهِ یهُودا مُوشه
1 دَ سالِ هژدَهُمِ پادشاهی یرُبعام باچِه نِباط، اَبیام دَ بَلِه یهُودا پادشاه شُد. 2 اَبیام سِه سال دَ اورُشَلیم پادشاهی کد و نامِ آبِه شی مَعکه دُخترِ اَبشالوم بُود. 3 اُو تمامِ گُناه های ره کد که آتِه شی پیش ازُو مُوکد؛ دِل ازُو دَ خُداوند، خُدای شی راست-و-صادِق نَبُود، رقمی که از بابه‌کَلون شی داوُود بُود. 4 باوجودِ ازی ام خُداوند، خُدای شی بخاطرِ داوُود بَلدِه ازُو یگ چِراغa دَ اورُشَلیم دَد تا تَختِ باچِه شی ره بعد ازُو برقرار کنه و اورُشَلیم ره اُستوار کنه. 5 چُون داوُود چِیزی ره که دَ نظرِ خُداوند دُرُست بُود، انجام دَد و از چِیزای که دَز شی اَمر کد، دَ تمامِ روزای عُمر خُو سرپیچی نَکد، بغَیر از مَوضوعِ اوریای حِتی. 6 جنگی که دَ مینکلِ رِحَبعام و یرُبعام شُروع شُدُد دَ تمامِ روزای زِندگی اَبیام اِدامه دَشت. 7 باقی کارای اَبیام و چِیزای که کد دَ کِتابِ تَوارِیخِ پادشایونِ یهُودا نوِشته یَه. دَ مینکلِ اَبیام و یرُبعام ام جنگ بُود. 8 اَبیام فَوت کده قد بابه‌کَلونای خُو خاو کد و دَ شارِ داوُود دَفن شُد و باچِه شی آسا دَ جای ازُو پادشاه شُد.
آسا پادشاهِ یهُودا مُوشه
9 دَ سالِ بِیستُمِ پادشاهی یرُبعام پادشاهِ اِسرائیل، آسا دَ بَلِه یهُودا پادشاه شُد 10 و چِل و یگ سال دَ اورُشَلیم پادشاهی کد. نامِ آجِه ازُو مَعکه دُخترِ اَبشالوم بُود. 11 آسا چِیزی ره که دَ نظرِ خُداوند دُرُست بُود، رقمِ بابه‌کَلون خُو داوُود انجام دَد. 12 اُو لواطگرای بُتخانه ها ره از مُلک بُر کد و بُت‌های ره که بابه‌کَلونای شی جور کدُد دُور پورته کد. 13 اُو آجِه خُو مَعکه ره ام از مَلِکه بُودو برطرف کد، چراکه اُو یگ بُتِ نفرَت اَنگیز دَ شکلِ اَشیره جور کدُد. آسا بُتِ ازُو ره مَیده کد و بُرده دَ دَرِّه قِدرون سوختَند. 14 اگرچِه عِبادت‌گاه های جای های بِلند بیرو نَشُد، لیکِن دِلِ آسا دَ تمامِ روزای زِندگی شی دَ خُداوند راست-و-صادِق بُود. 15 اُو چِیزای ره که آتِه شی وَقف کدُد و چِیزای ره که خود شی وَقف کدُد، یعنی نُقره، طِلّا و ظرفا ره دَ خانِه خُداوند اَوُرد.
16 دَ مینکلِ آسا پادشاهِ یهُودا و بَعشا پادشاهِ اِسرائیل، دَ تمامِ روزای پادشاهی ازوا جنگ بُود. 17 بَعشا پادشاهِ اِسرائیل دَ بَلِه یهُودا اَمد و رامه ره مُستَحکم جور کد تا کس ره نَیله که دَ پیشِ آسا پادشاهِ یهُودا رفت و اَمد کنه. 18 اوخته آسا پادشاه تمامِ نُقره و طِلّای ره که دَ خزانه های خانِه خُداوند و خزانه های خانِه پادشاه باقی مَندُد گِرِفته دَ دِستِ خِدمتگارای خُو دَد و اُونا ره دَ پیشِ بِن هَدَد باچِه طَبرِمون نوسِه حِزیون، پادشاهِ ارام که دَ دَمِشق زِندگی مُوکد، رَیی کده گُفت: 19 ”بیل که دَ مینکلِ ازمه و ازتُو یگ عهد-و-پَیمان بَشه، رقمی که دَ مینکلِ آتِه ازمه و آتِه ازتُو بُود. اینه، ما دَز تُو یگ تُحفِه نُقره و طِلّا رَیی مُونُم؛ پس عهد-و-پَیمان خُو ره قد بَعشا پادشاهِ اِسرائیل مَیده کُو تا اُو از نزدِیک مه بوره.“ 20 بِن هَدَد قد آسا پادشاه موافِقت کد و قومَندانای لشکر خُو ره دَ خِلافِ شارای اِسرائیل رَیی کده عِیون، دان، آبِل بَیت-مَعکه و تمامِ منطقِه کِنِروت ره قد پگِ سرزمِین نَفتالی تَصَرُف کد. 21 وختی بَعشا اِی توره ره شِنِید، اُو از مُستَحکم جور کدونِ رامه دِست کشِید و رفته دَ تِرصه جای-دَ-جای شُد. 22 اوخته آسا پادشاه دَ تمامِ یهُودا یگ اِعلان کد که هیچ کس ازی اَمر بُرو نَبُود: اِعلان اِی بُود که مردُم سنگا و چیوای ره که بَعشا بَلدِه مُستَحکم جور کدونِ رامه اَوُردُد باله کده بُبره و آسا پادشاه جِبعِ بِنیامِین و مِصفه ره قد ازوا مُستَحکم جور کد. 23 باقی تمامِ کارای آسا، قُدرت شی، تمامِ چِیزای که اُو انجام دَد و شارای ره که اُو مُستَحکم جور کد دَ کِتابِ تَوارِیخِ پادشایونِ یهُودا نوِشته یَه. مُتاسِفانه پایای آسا دَ زمانِ پِیری شی عَیبی شُدُد. 24 آسا فَوت کده قد بابه‌کَلونای خُو خاو کد و پالُوی ازوا دَ شارِ بابه‌کَلون خُو داوُود دَفن شُد و باچِه شی یهوشافاط دَ جای ازُو پادشاه شُد.
ناداب پادشاهِ اِسرائیل مُوشه
25 دَ سالِ دوّمِ پادشاهی آسا پادشاهِ یهُودا، ناداب باچِه یرُبعام دَ بَلِه اِسرائیل پادشاه شُد و دُو سال دَ بَلِه اِسرائیل پادشاهی کد. 26 اُو چِیزی ره که دَ نظرِ خُداوند بَد بُود انجام دَد و دَ راهِ آتِه خُو رفته دَ گُناهی اِدامه دَد که آتِه ازُو باعِث شُد مردُمِ اِسرائیل گُناه کنه.
27 بَعشا باچِه اَخیا که از خانَوارِ یسّاکار بُود، دَ خِلافِ ناداب نقشه کشِید و بَعشا اُو ره دَ منطقِه جِبِتون که دَ فَلَسطِینیا تعلُق دَشت زَده کُشت؛ اِی کار دَ غَیتی شُد که ناداب و تمامِ اِسرائیل جِبِتون ره محاصِره کدُد. 28 پس دَ سالِ سوّمِ پادشاهی آسا پادشاهِ یهُودا، بَعشا ناداب ره کُشت و دَ جای شی پادشاه شُد. 29 امی که بَعشا پادشاه شُد، اُو پگِ خانَوارِ یرُبعام ره کُشت؛ اُو یگ نفر ره ام از خانَوارِ یرُبعام زِنده نَه ایشت، بَلکِه پگ شی ره نابُود کد. اِی کار دَ مُطابِقِ کلامِ خُداوند شُد که دَ وسِیلِه اَخیای شِیلونی گُفتُد؛ 30 اَرے، اِی بخاطرِ گُناه های شُد که ام خودِ یرُبعام مُرتکِب شُدُد و ام باعِث شُدُد که اِسرائیل گُناه کنه و دَ وسِیلِه ازوا قارِ خُداوند، خُدای اِسرائیل ره باله بیره.
31 باقی کارای ناداب و پگِ چِیزای که انجام دَد، دَ کِتابِ تَوارِیخِ پادشایونِ اِسرائیل نوِشته یَه. 32 دَ بَینِ آسا پادشاهِ یهُودا و بَعشا پادشاهِ اِسرائیل، دَ تمامِ روزای پادشاهی ازوا جنگ بُود.
پادشاهی بَعشا دَ اِسرائیل