فصلِ هفتُم
1 پس مردُمِ قِریَت-یعارِیم اَمَده صندُوقِ خُداوند ره گِرِفت و اُو ره دَ خانِه اَبِیناداب که دَ بَلِه تِپه بُود بُرد و باچِه شی اِلعازار ره تقدِیس کد تا از صندُوقِ خُداوند نِگاهوانی کنه.
سموئیل قاضی اِسرائیل
2 از روزی که صندُوق دَ قِریَت-یعارِیم جای-دَ-جای شُد، غَدر وخت تیر شُد، یعنی بِیست سال؛ و تمامِ خانَوارِ اِسرائیل از پُشتِ خُداوند کوٹیو مُوکد. 3 و سموئیل دَ پگِ خانَوارِ اِسرائیل گُفت: ”اگه قد تمامِ دِل سُون خُداوند پس بیِید و خُدایونِ بیگَنه و بُت های عَشتاروت ره از مینکل خُو دُور کده دِل های خُو ره بَلدِه خُداوند آماده کُنِید و تنها اُو ره عِبادت کنِید، اوخته اُو شُمو ره از دِستِ فَلَسطِینیا خلاص مُونه.“ 4 پس بَنی اِسرائیل بُت های بَعل و عَشتاروت ره از مینکل خُو دُور کد و تنها خُداوند ره عِبادت کد.
5 اوخته سموئیل گُفت: ”پگِ اِسرائیل ره دَ مِصفه جَم کنِید تا ما بَلدِه شُمو دَ پیشِ خُداوند دُعا کنُم.“ 6 و اُونا دَ مِصفه جَم شُد و از چاه آو کشِید و آو ره دَ حُضُورِ خُداوند شیو کده دَ امزُو روز روزه گِرِفت و دَ اُونجی گُفت: ”مو دَ ضِدِ خُداوند گُناه کدے.“ دَ امزی رقم سموئیل بَنی اِسرائیل ره دَ مِصفه رهبری کد.
7 وختی فَلَسطِینیا شِنِید که بَنی اِسرائیل دَ مِصفه جَم شُده، حُکمرانای فَلَسطِینیا دَ خِلافِ اِسرائیلیا اَمَد. وختِیکه بَنی اِسرائیل اِی توره ره شِنِید، از فَلَسطِینیا ترس خورد. 8 اوخته بَنی اِسرائیل دَ سموئیل گُفت: ”دَ پیشِ خُداوند، خُدای مو بَلدِه مو ناله-و-فریاد کدو ره بَند نَکُو تا اُو مو ره از دِستِ فَلَسطِینیا نِجات بِدیه.“ 9 پس سموئیل یگ بارِه شِیرخور ره گِرِفته دَ عِنوانِ قُربانی سوختَنی کامِل دَ خُداوند تقدِیم کد و بعد ازُو بَلدِه اِسرائیل دَ پیشِ خُداوند ناله-و-فریاد کد و خُداوند دُعای شی ره قبُول کد. 10 دَ حالِیکه سموئیل قُربانی سوختَنی ره تقدِیم مُوکد، فَلَسطِینیا نزدِیک اَمَد تا دَ بَلِه اِسرائیل حَمله کنه؛ لیکِن دَ امزُو روز خُداوند دَ خِلافِ فَلَسطِینیا دَ آوازِ غَدر بِلند گُرگُردراغ کده اُونا ره دَ گَلگَلمیری اَندخت و اُونا دَ پیشِ اِسرائیل شِکست خورد. 11 و مَردای اِسرائیل از مِصفه بُر شُده فَلَسطِینیا ره دُمبال کد و اُونا ره تا تَیلونِ بَیت-کار زَد.
12 اوخته سموئیل یگ سنگ ره گِرِفته دَ مینکلِ مِصفه و شِن قرار دَد و اُو ره ایبن-عِزِرa نام کده گُفت: ”تا آلی ره خُداوند دَز مو کومَک کده!“ 13 دَ امزی رقم فَلَسطِینیا شِکست خورد و دِیگه دَ مُلکِ اِسرائیل داخِل نَشُد، چراکه دِستِ خُداوند دَ تمامِ روزهای زِندگی سموئیل دَ خِلافِ فَلَسطِینیا سخت باله بُود. 14 شارای ره که فَلَسطِینیا از اِسرائیل گِرِفتُد، از عِقرون تا جَت پس دَ دِستِ اِسرائیلیا اُفتَد؛ و اِسرائیلیا منطقای گِرد-و-بَر ره ام از دِستِ فَلَسطِینیا آزاد کد. و دَ مینکلِ اِسرائیل و اَموریا صُلح برقرار شُد.
15 سموئیل دَ تمامِ روزای عُمر خُو اِسرائیل ره رهبری-و-قضاوَت کد. 16 اُو ھر سال رفته دَ بَیت-ئیل، جِلجال و مِصفه مِیگشت و دَ پگِ امزی جای ها بَنی اِسرائیل ره قَضاوَت مُوکد. 17 بعد ازُو پس دَ رامه میمَد، چُون خانِه شی دَ امُونجی بُود و دَ اُونجی بَنی اِسرائیل ره ام قَضاوَت مُوکد و دَ امزُو جای بَلدِه خُداوند یگ قُربانگاه آباد کد.