فصلِ هشتُم
مَسَح کدونِ هارُون و باچه های شی بَلدِه وظِیفِه پیشوایی
1 خُداوند قد مُوسیٰ گپ زَده گُفت: 2 ”هارُون و باچه های شی ره قد کالا های پیشوایی، روغونِ مَسَح، نَرگاوِ قُربانی گُناه، دُو قُوچ و یگ ٹُکری نانِ فطِیر گِرِفته بیَر 3 و پگِ جماعت ره دَ دانِ درگِه خَیمِه مُلاقات جَم کُو.“ 4 پس مُوسیٰ امُو رقم کد که خُداوند دَزشی اَمر کدُد و جماعت دَ دانِ درگِه خَیمِه مُلاقات جَم شُد. 5 اوخته مُوسیٰ دَ جماعت گُفت: ”اینی کاری اَسته که خُداوند اَمر کده و باید انجام دَده شُنه.“ 6 پس مُوسیٰ هارُون و باچه های شی ره پیش اَوُرد و اُونا ره قد آو غُسل دَد. 7 بعد ازُو پیرو ره دَ جانِ هارُون کد و کمربسته ره دَ کمر شی بسته کده چَپَن ره دَز شی پوشَند و ایفودa ره دَ بَلِه پگِ ازوا دَزشی دَد و بَندِ ایفود ره دَ بَلِه شی بسته کده ایفود ره دَ وسِیلِه بَند دَ جانِ ازُو سخت کد. 8 بعد ازُو سِینه-بَند ره دَ بَلِه سِینِه هارُون بسته کد و اُورِیم و تُمِیمb ره دَ مَنِه سِینه-بَند ایشت. 9 دَ آخِر، لُنگی ره دَ سر شی دَد و دَ پیشِ رُوی لُنگی، نشانِ طِلّایی نِیم‌تاجِ مُقَدَّس ره نَصب کد، امُو رقم که خُداوند دَ مُوسیٰ اَمر کدُد. 10 اوخته مُوسیٰ روغونِ مَسَح ره گِرِفت و خَیمِه مُقَدَّس و تمامِ چِیزای ره که دَ مَنِه شی بُود مَسَح کده تقدِیس کد. 11 اُو یگ مِقدار روغونِ مَسَح ره هفت دفعه دَ بَلِه قُربانگاه پاش دَد و قُربانگاه و تمامِ اَسباب شی ره قد لَگَند و پایِه شی مَسَح کد تا اُونا ره تقدِیس کنه. 12 بعد ازُو یگ مِقدار روغونِ مَسَح ره دَ سرِ هارُون شیو کده اُو ره مَسَح کد تا اُو ره ام تقدِیس کنه. 13 و مُوسیٰ باچه های هارُون ره پیش اَوُرده پیرونا ره دَزوا پوشَند، کمربَند ها ره دَ کمرِ ازوا بسته کد و کوله ها ره دَ سرِ ازوا ایشت، امُو رقم که خُداوند دَ مُوسیٰ اَمر کدُد. 14 بعد ازُو مُوسیٰ نَرگاوِ قُربانی گُناه ره پیش اَوُرد و هارُون و باچه های شی دَ سرِ نَرگاوِ قُربانی گُناه دِست کشِید. 15 اوخته مُوسیٰ نَرگاو ره حلال کد و از خُون شی گِرِفته قد کِلک خُو دَ شاخای چار شِنگِ قُربانگاه مَلِید و قُربانگاه ره پاک کد و باقی‌مَندِه خُون ره دَ بیخِ قُربانگاه شیو کده اُو ره تقدِیس کد تا دَ بَلِه شی کِفاره کنه. 16 بعد ازُو مُوسیٰ تمامِ چربی ره که دَ بَلِه حِصّه های داخِلی بُود قد جِگرگوشه و دُو گُرده و چربی ازوا گِرِفت و دَ بَلِه قُربانگاه سوختَند. 17 مگم پوست و گوشت و سرگِینِ نَرگاو ره بُرو از خَیمه‌گاه دَ آتِش سوختَند، امُو رقم که خُداوند دَ مُوسیٰ اَمر کدُد. 18 بعد ازُو مُوسیٰ قُوچِ قُربانی سوختَنی ره پیش اَوُرد و هارُون و باچه های شی دَ سرِ ازُو دِست کشِید. 19 و مُوسیٰ اُو ره حلال کد و خُون شی ره دَ چاردَورِ قُربانگاه پاش دَد. 20 وختِیکه قُوچ دَ حِصّه های مُختلِف ٹوٹه ٹوٹه شُد، مُوسیٰ کَله و ٹوٹه ها ره قد چربی شی سوختَند. 21 و غَیتِیکه حِصّه های داخِلی و پَیچه های شی قد آو شُشته شُد، مُوسیٰ تمامِ قُوچ ره دَ بَلِه قُربانگاه سوختَند. اِی یگ قُربانی سوختَنی دَ عِنوانِ خوشبُوی مَورِدِ پِسَندِ خُداوند بُود، یگ هدیِه خاص بَلدِه خُداوند، امُو رقم که خُداوند دَ مُوسیٰ اَمر کدُد. 22 و مُوسیٰ قُوچِ دوّم ره یعنی قُوچِ مَراسِمِ تعیِین-و-تقدِیس پیشوایو ره نزدِیک اَوُرد و هارُون و باچه های شی دَ سرِ ازُو ام دِست کشِید. 23 اوخته مُوسیٰ اُو ره حلال کد و یگ مِقدار خُون شی ره گِرِفته دَ نَرمی گوشِ راست و دَ شَستِ دِستِ راست و دَ شَستِ پای راستِ هارُون مَلِید. 24 بعد ازُو مُوسیٰ باچه های هارُون ره نزدِیک اَوُرده یگ مِقدار خُون ره دَ نَرمی گوشِ راستِ ازوا و دَ شَستِ دِستِ راستِ ازوا و دَ شَستِ پای راستِ ازوا مَلِید و باقی‌مَندِه خُون ره دَ چاردَورِ قُربانگاه پاش دَد. 25 بعد ازُو چربی، دُمبه، تمامِ چربی بَلِه حِصّه های داخِلی، جِگرگوشه و هر دُو گُرده ره قد چربی ازوا و رانِ راست گِرِفت 26 و از مَنِه ٹُکری نانِ فطِیر که دَ حُضُورِ خُداوند بُود، یگ ٹِکی فطِیر و یگ نانِ روغَنی و یگ نانِ تُنُگ-و-کَکرَک ره گِرِفت و اُونا ره دَ بَلِه چربی و رانِ راست ایشت. 27 و مُوسیٰ پگِ ازوا ره دَ بَلِه دِستای هارُون و دَ بَلِه دِستای باچه های شی ایشت و اُونا امُو چِیزا ره دَ عِنوانِ هدیِه بِلند کدَنی دَ حُضُورِ خُداوند بِلند کد. 28 اوخته مُوسیٰ اُونا ره از دِستای ازوا گِرِفت و دَ بَلِه قُربانگاه دَ سرِ قُربانی سوختَنی ایشته دَر دَد. اِی قُربانی مَراسِمِ تعیِین-و-تقدِیسِ پیشوایو دَ عِنوانِ خوشبُوی مَورِدِ پِسَند بُود، یگ هدیِه خاص بَلدِه خُداوند. 29 بعد ازُو مُوسیٰ سِینِه قُوچ ره گِرِفت و اُو ره دَ عِنوانِ هدیِه بِلند کدَنی دَ حُضُورِ خُداوند بِلند کد؛ امی حِصّه از قُوچِ قُربانی مَراسِمِ تعیِین کدونِ پیشوایو تقسِیمِ مُوسیٰ بُود، امُو رقم که خُداوند دَ مُوسیٰ اَمرِ کدُد. 30 دَ آخِر، مُوسیٰ یگ مِقدار روغونِ مَسَح و یگ مِقدار خُونی ره که دَ بَلِه قُربانگاه بُود گِرِفت و دَ بَلِه هارُون و کالا های شی و دَ بَلِه باچه های شی و کالا های ازوا پاش دَد. دَ امزی رقم هارُون ره قد کالا های شی و باچه های شی ره قد کالا های ازوا تقدِیس کد.
31 اوخته مُوسیٰ دَ هارُون و باچه های شی گُفت: ”گوشت ره دَ دانِ درگِه خَیمِه مُلاقات جوش بِدِید و قد نانی که دَ مَنِه ٹُکری قُربانی مَراسِمِ تعیِین-و-تقدِیسِ پیشوایو اَسته، دَ امُونجی بُخورِید، امُو رقم که ما اَمر کده گُفتُمc: ’هارُون و باچه های شی اُو ره بُخوره.‘ 32 و باقی‌مَندِه گوشت و نان ره دَ آتِش بُسوزَنِید. 33 شُمو از دانِ خَیمِه مُلاقات بَلدِه هفت روز بُرو نَرَوِید تا روزی که دَورونِ تعیِین شُدون شُمو پُوره شُنه، چُون هفت روز دَربَر مِیگِیره که شُمو تعیِین شُنِید. 34 امُو رقم که اِمروز انجام دَده شُد، خُداوند اَمر کده که انجام دَده شُنه تا بَلدِه شُمو کِفاره شُنه. 35 پس شُمو بَلدِه هفت شاو و روز دَ دانِ درگِه خَیمِه مُلاقات بُمنِید و چِیزی ره که خُداوند اَمر کده دَ جای بیرِید؛ نَشُنه که بُمُرِید، چُون امی رقم دَز مه اَمر شُده.“ 36 پس هارُون و باچه های شی پگِ چِیزای ره که خُداوند دَ وسِیلِه مُوسیٰ اَمر کدُد، دَ جای اَوُرد.