فصلِ چارُم
قُربانی گُناه
1 خُداوند بسم قد مُوسیٰ گپ زَده گُفت: 2 ”قد بَنی اِسرائیل نقل کده بُگی که، ’اگه یَگو کس نافامِیده دَ بارِه کُدَم احکامِ خُداوند گُناه کنه و چِیزای که نَباید انجام دَده شُنه، یکی ازوا ره انجام بِدیه، اینی مُقرَرات اَسته:
3 اگه پیشوای که مَسَح شُدهa گُناه کنه و قَوم ره مُجرِم جور کُنه، اُو باید بَلدِه گُناهِ خُو یگ نَرگاوِ بےعَیب ره دَ عِنوانِ قُربانی گُناه دَ خُداوند تقدِیم کنه. 4 اُو امُو نَرگاو ره دَ دانِ خَیمِه مُلاقات دَ حُضُورِ خُداوند بیره و دِست خُو ره دَ سرِ نَرگاو کش کُنه و اُو ره دَ حُضُورِ خُداوند حلال کنه. 5 اوخته پیشوای مَسَح شُده یگ مِقدار خُونِ امزُو نَرگاو ره گِرِفته دَ خَیمِه مُلاقات بیره 6 و پیشوا کِلک خُو ره دَ خُون غوٹه کده یگ مِقدار خُون ره دَ حُضُورِ خُداوند دَ پیشِ رُوی پرده دَ جای مُقَدَّس هفت دفعه پاش بِدیه. 7 پیشوا یگ مِقدارِ امزُو خُون ره دَ شاخای قُربانگاهِ بُخورb که دَ حُضُورِ خُداوند دَ مَنِه خَیمِه مُلاقات اَسته بُمَله و باقی‌مَندِه خُونِ نَرگاو ره دَ بیخِ قُربانگاهِ قُربانی سوختَنی که دَ دانِ درگِه خَیمِه مُلاقات اَسته، شیو کنه. 8 پیشوا تمامِ چربی نَرگاوِ قُربانی گُناه ره جدا کُنه، یعنی چربی که حِصّه های داخِلی ره مُوپوشَنه و تمامِ چربی ره که دَ گِردوبَرِ حِصّه های داخِلی اَسته، 9 هر دُو گُرده ره قد چربی رُوی ازوا که دَ نزدِیکِ پُشتِ کمر اَسته و جِگرگوشه ره که قد گُرده ها گِرِفته مُوشه؛ 10 امُو رقمِیکه چربی نَرگاوِ قُربانی سلامَتی جدا مُوشه. بعد ازُو پیشوا اُونا ره دَ بَلِه قُربانگاهِ قُربانی سوختَنی بُسوزَنه. 11 لیکِن پوستِ نَرگاو و تمامِ گوشت شی ره قد کَلّه و پَیچه و تمامِ حِصّه های داخِلی و سرگِین شی، 12 یعنی تمامِ باقی‌مَندِه نَرگاو ره باید بُرو از خَیمه‌گاه دَ یگ جای پاک، دَ جایی که خگِشترِ قُربانگاه پورته مُوشه، بُبره و اُو ره دَ بَلِه آتِشِ هیزُم دَر بِدیه؛ اَرے، دَ جایی که خگِشتر پورته مُوشه، دَ اُونجی دَر دَده شُنه.
13 و اگه پگِ جماعتِ اِسرائیل خطا کُنه و امُو خطا از نظرِ جماعت پوشِیده بَشه، یعنی اُونا یکی از کارای ره انجام بِدیه که مُطابِقِ احکامِ خُداوند نَباید انجام دَده شُنه و اُونا مُجرِم شُنه، 14 وختی خطای که اُونا کده بَرمَلا مُوشه، جماعت باید یگ نَرگاو ره دَ عِنوانِ قُربانی گُناه بیره و اُو ره دَ پیشِ خَیمِه مُلاقات تقدِیم کنه. 15 و رِیش سفیدای جماعت دَ حُضُورِ خُداوند دِستای خُو ره دَ سرِ نَرگاو کش کُنه و اُو ره دَ حُضُورِ خُداوند حلال کنه. 16 اوخته پیشوای مَسَح شُده، یگ مِقدار خُونِ امزُو نَرگاو ره دَ خَیمِه مُلاقات بیره 17 و پیشوا کِلک خُو ره دَ خُون غوٹه کده امزُو خُون هفت دفعه دَ حُضُورِ خُداوند دَ پیشِ رُوی پردهc پاش بِدیه. 18 پیشوا یگ مِقدارِ امزُو خُون ره دَ شاخای قُربانگاهِ بُخور که دَ مَنِه خَیمه دَ حُضُورِ خُداوند اَسته، بُمَله و باقی‌مَندِه خُون ره دَ بیخِ قُربانگاهِ قُربانی سوختَنی که دَ دانِ خَیمِه مُلاقات اَسته، شیو کنه. 19 و تمامِ چربی شی ره گِرِفته دَ بَلِه قُربانگاه بُسوزَنه. 20 اُو امُو کار ره قد امزی نَرگاو کُنه که قد نَرگاوِ قُربانی گُناه کدُد؛ اَرے عَینِ کار ره قد امزی نَرگاو کنه. دَ امزی رقم پیشوا بَلدِه ازوا کِفاره مُونه و اُونا بخشِیده مُوشه. 21 بعد ازُو امُو نَرگاوِ قُربانی شُده ره از خَیمه‌گاه بُرو بُبره و اُو ره دَر بِدیه، امُو رقم که نَرگاوِ اوّل ره دَر دَد. اِی یگ قُربانی گُناه بَلدِه جماعت اَسته.
22 اگه یگ رهبر گُناه کنه و نافامِیده یکی از کارای ره انجام بِدیه که مُطابِقِ تمامِ احکامِ خُداوند، خُدای شی نَباید انجام دَده شُنه و اُو مُجرِم شُنه، 23 وختی گُناهی ره که کده بَلدِه شی بَرمَلا شُنه، اُو باید یگ ٹَکِه بےعَیب ره دَ عِنوانِ قُربانی خُو بیره 24 و دِست خُو ره دَ سرِ ٹَکه کش کده اُو ره دَ امزُو جای حلال کُنه که قُربانی سوختَنی ره دَ حُضُورِ خُداوند حلال مُونه. اِی یگ قُربانی گُناه اَسته. 25 و پیشوا یگ مِقدار خُونِ قُربانی گُناه ره قد کِلک خُو گِرِفته دَ شاخای قُربانگاهِ قُربانی سوختَنی بُمَله و باقی‌مَندِه خُون ره دَ بیخِ قُربانگاهِ قُربانی سوختَنی شیو کنه. 26 و پگِ چربی ازُو ره رقمِ چربی قُربانی سلامَتی دَ بَلِه قُربانگاه بُسوزَنه. دَمزی رقم پیشوا بَلدِه گُناهِ امزُو رهبر کِفاره مُونه و اُو بخشِیده مُوشه.
27 اگه یگ نفر از مردُمِ عام نافامِیده گُناه کنه و یکی از کارای ره انجام بِدیه که مُطابِقِ احکامِ خُداوند نَباید انجام دَده شُنه، اُو مُجرِم مُوشه. 28 وختی گُناهی ره که کده بَلدِه شی بَرمَلا مُوشه، اُو باید یگ بُزِ مادِه بےعَیب ره دَ عِنوانِ قُربانی خُو بَلدِه گُناهی که کده بیره 29 و دِست خُو ره دَ سرِ قُربانی گُناه کش کده اُو ره دَمزُو جای حلال کنه که قُربانی سوختَنی ره حلال مُونه. 30 و پیشوا یگ مِقدار خُونِ بُز ره قد کِلک خُو گِرِفته دَ شاخای قُربانگاهِ قُربانی سوختَنی بُمَله و باقی‌مَندِه خُون ره دَ بیخِ قُربانگاه شیو کنه. 31 اُو تمامِ چربی شی ره جدا کنه، امُو رقم که چربی قُربانی سلامَتی جدا مُوشه. و پیشوا اُو ره دَ بَلِه قُربانگاه دَ عِنوانِ خوشبُوی مَورِدِ پِسَندِ خُداوند بُسوزَنه. دَمزی رقم پیشوا بَلدِه امزُو نفر کِفاره مُونه و اُو بخشِیده مُوشه.
32 اگه اُو نفر یگ گوسپو ره بَلدِه قُربانی خُو دَ عِنوانِ قُربانی گُناه میره، اُو یگ میشِ بےعَیب ره بیره 33 و دِست خُو ره دَ سرِ قُربانی گُناه کش کُنه و اُو ره دَ عِنوانِ قُربانی گُناه دَمزُو جای حلال کُنه که قُربانی سوختَنی ره حلال مُونه. 34 و پیشوا یگ مِقدار خُونِ قُربانی گُناه ره قد کِلک خُو گِرِفته دَ شاخای قُربانگاهِ قُربانی سوختَنی بُمَله و باقی‌مَندِه خُون شی ره دَ بیخِ قُربانگاه شیو کنه. 35 اُو تمامِ چربی ازُو ره جدا کنه، امُو رقم که چربی گوسپونِ قُربانی سلامَتی جدا مُوشه؛ و پیشوا اُو ره دَ بَلِه قُربانگاه دَ سرِ هدیه‌های خاصِ خُداوند بُسوزَنه. دَ امزی طرِیق پیشوا بَلدِه ازُو نفر بخاطرِ گُناهی که کده، کِفاره مُونه و اُو بخشِیده مُوشه.