خرُوج 37

جور کدونِ صندُوق

بعد ازُو بِصَلئیل صندُوق ره از چیوِ اَکاسی جور کد که دِرازی شی دُو و نِیم توغَی، بَر شی یگ و نِیم توغَی و بِلندی شی ام یگ و نِیم توغَی بُود. ‏2 مَنِه شی و برُون شی ره قد رُوی‌کَشِ طِلّای خالِص پوشَند و دَ گِرداگِرد شی یگ چُفتی طِلّایی جور کد. ‏3 اُو چار حَلقِه طِلّایی تَیار کده اُونا ره دَ چار پایِه صندُوق سخت کد، یعنی دُو حلقه دَ یگ طرف شی و دُو حلقه دَ دِیگه طرف شی. ‏4 بعد ازُو دُو دِستَک‌چیوِ دِراز از دِرختِ اَکاسی جور کد و اُونا ره قد رُوی‌کَشِ طِلّایی پوشَند ‏5 و امُو دِستَک‌چیوها ره دَ مَنِه حلقه ها دَ دُو بَغلِ صندُوق تیر کد. اُونا بَلدِه بُردونِ صندُوق بُود. ‏6 اُو «جای کِفاره» یعنی سرپوشِ صندُوق ره از طِلّای خالِص جور کد که دِرازی شی دُو و نِیم توغَی و بَر شی یگ و نِیم توغَی بُود. ‏7 اوخته اُو دُو مُجَسمِه کِرُوبی ره دَ هر دُو سرِ جای کِفاره از طِلّای چکُش کاری شُده جور کد. ‏8 یگ کِرُوبی دَ یگ سرِ جای کِفاره و دِیگِه شی دَ دِیگه سرِ جای کِفاره بُود. هر دُوی شی ره قد جای کِفاره از یگ پرچه طِلّا جور کد. ‏9 بال های کِرُوبیا دَ بَلِه جای کِفاره واز شُده دَ بَلِه ازُو سایه کدُد. رُوی های ازوا طرفِ یگدِیگه و نظر های شی طرفِ جای کِفاره بُود.

جور کدونِ میزِ نان مُقَدَّس

‏10 اُو میز ره ام از چیوِ اَکاسی جور کد که دِرازی شی دُو توغَی، بَر شی یگ توغَی و بِلندی شی یگ و نِیم توغَی بُود. ‏11 اُو میز ره قد طِلّای خالِص پوشَند و دَ گِرداگِرد شی یگ چُفتی طِلّایی جور کد. ‏12 و یگ لَبَکی دَ اندازِه چار ناخُو دَ گِرد شی جور کده امُو لَبَکی طِلّایی ره باله‌تَر از چُفتی دَ گِرداگِردِ میز گِرِفت. ‏13 اُو چار حلقِه طِلّایی بَلدِه میز ریختَند و حلقه ها ره دَ چار شِنگِ میز، یعنی دَ پایه های شی سخت کد. ‏14 حلقه ها نزدِیکِ لَبَکی بُود و مِثلِ خانه بَلدِه دِستَک‌چیو های دِراز دَ وختِ بُردونِ میز اِستِعمال مُوشُد. ‏15 اُو دِستَک‌چیو های دِراز ره بَلدِه بُردونِ میز از دِرختِ اَکاسی جور کد و اُونا ره قد رُوی‌کَشِ طِلّایی پوشَند. ‏16 اُو امچُنان ظرفای ره که دَ بَلِه میز ایشته مُوشُد از طِلّای خالِص جور کد، یعنی قاب ها و کاسه ها، و جام ها و پیله های ره که بَلدِه ریختَندونِ هدیه های وُچی کدَنی اِستِعمال مُوشُد.

جور کدونِ چِراغدان

‏17 اُو چِراغدان ره از طِلّای خالِص و چکُش کاری شُده، جور کد. امُو چِراغدان، پایه و شاخه های شی، قد کاسه های گُل، پُنڈُوق ها و بَلگای گُل پگ شی از یگ پرچه بُود. ‏18 از دُو بَغلِ چِراغدان شَش شاخه بُر شُدُد: سِه شاخه از یگ طرف شی و سِه شاخه از دِیگه طرف شی. ‏19 سِه کاسِه گُلِ بادامی قد پُنڈُوق و بَلگِ گُل دَ شاخِه طرفِ راست و سِه کاسِه گُلِ بادامی قد پُنڈُوق و بَلگِ گُل دَ شاخِه طرفِ چَپ بُود. امُو شَش شاخه که از چِراغدان بُر شُدُد عَینِ چِیز بُود. ‏20 و دَ خودِ پایِه چِراغدان چار کاسِه گُلِ بادامی قد پُنڈُوق ها و بَلگای گُل شکل دَده شُدُد. ‏21 یگ پُنڈُوق دَ زیرِ دُو شاخِه اوّل که از دُو بغلِ چِراغدان بُر شُدُد، یگ پُنڈُوق دَ زیرِ دُو شاخِه دوّم و یگ پُنڈُوق دَ زیرِ دُو شاخِه سِوّم، یعنی دَ زیرِ هر شَش شاخِه که از چِراغدان بُر شُدُد پُنڈُوق بُود. ‏22 شاخه ها و پُنڈُوق ها پگ شی از یگ پرچه طِلّای خالِص و چکُش کاری شُده بُود. ‏23 بعد ازُو هفت چِراغ قد چِراغ گُلگَرَک ها و پطنُوس های شی از طِلّای خالِص جور کد. ‏24 اُو چِراغدان و تمامِ اَسباب شی ره از یگ وَزنه طِلّای خالِص جور کد.

جور کدونِ قُربانگاهِ بُخورِ خوشبُوی

‏25 بعد ازُو قُربانگاهِ بُخور ره از چیوِ اَکاسی دَ شکلِ چار کُنج جور کد که یگ توغَی دِرازی، یگ توغَی بَر و دُو توغَی بِلندی دَشت و شاخای شی قد خود شی از یگ چیو بُود. ‏26 سر، چارطرف و شاخای شی ره قد طِلّای خالِص پوشَند و دَ گِرداگِرد شی یگ چُفتی طِلّایی جور کد. ‏27 و دَ دُو طرفِ قُربانگاه دَ زیرِ چُفتی طِلّایی، دَ هر دُو گوشِه شی دُو حلقِه طِلّایی تَیار کد که اُونا جای بَلدِه دِستَک‌چیو های دِراز بُود و قد دِستَک‌چیو ها که قد دِستَک‌چیو ها قُربانگاه بُرده مُوشُد. ‏28 امُو دِستَک‌چیو های دِراز ره از دِرختِ اَکاسی تَیار کد و اُونا ره قد رُوی‌کَشِ طِلّایی پوشَند. ‏29 بعد ازُو روغونِ مُقَدَّسِ مَسَح و بُخورِ خالِصِ خوشبُوی ره دَ وسِیلِه یگ عَطرساز جور کد.