36
بِصَلئیل و اَهولیاب و پگِ اُستاد های که خُداوند دَزوا بَلدِه جور کدونِ جایگاهِ مُقَدَّس اِستِعداد و قابِلیَت دَده، خِدمت کنه و تمامِ کارا ره دَ مُطابِقِ اَمرِ خُداوند انجام بِدیه.“شُروعِ کارِ جایگاهِ مُقَدَّس
2 پس مُوسیٰ بِصَلئیل و اَهولیاب و دِیگه آدمای قابِل ره کُوی کد، یعنی کسای ره که خُداوند بَلدِه ازوا مهارت و دانایی دَده بُود و دَ دِل شی شور-و-شَوق پَیدا شُدُد که نزدِیک اَمَده کار ره انجام بِدیه. 3 اُونا تمامِ هدیه‌های ره که بَنی اِسرائیل بَلدِه خِدمت و جور کدونِ جایگاهِ مُقَدَّس اَوُرده بُود، از دِستِ مُوسیٰ گِرِفت و مردُم هر صَباح دَ رضایَتِ خود خُو هدیه‌های دِیگه دَ پیشِ ازُو اَوُرده رَیی بُود. 4 پس تمامِ اُستاد های که مَشغُولِ کارِ جایگاهِ مُقَدَّس بُود، از سرِ کارای خُو دَ دِیرِ مُوسیٰ اَمَد 5 و دَزُو گُفت: ”مردُم بَلدِه انجام دَدونِ کاری که خُداوند اَمر کده، از ضرُورَت کده کَلو مَواد میره.“ 6 اوخته مُوسیٰ حُکم دَد و اِی حُکم دَ تمامِ خَیمه‌گاه اِعلان شُد که مُوگُفت: ”مردَکو و خاتُونو بَلدِه هدیه‌های جایگاهِ مُقَدَّس دِیگه هیچ کار نَکُنه.“ پس قَوم از اَوُردونِ هدیه ها قُوی شُد، 7 چراکه هدیه‌های مَوجُود بَلدِه جور کدونِ جایگاه کِفایَت مُوکد و از حَدّ ام کَلو بُود.
تَرتِیبِ کار
8 تمامِ آدمای ماهِر و دانا که دَ کار مَشغُول بُود، بَلدِه جایگاه دَه دانه پردِه کتانِ نَرم و مَیده بافت ره قد چُوغ های لاجوَردی، اَرغَوانی و سُرخ رَنگ جور کد و دَ رُوی پگ شی عکسِ کِرُوبی ها دَ وسِیلِه دِست‌دوزِ لایق گُلدوزی شُد. 9 دِرازی هر پرده بِیست و هشت توغَی و بَر شی چار توغَی بُود و تمامِ پرده ها یگ اندازه بُود. 10 اُونا پَنج پرده ره قد یگدِیگِه شی کوک کده یگ پرچه جور کد و پَنج پردِه دِیگه ره ام قد یگدِیگِه شی کوک کده یگ پرچِه دِیگه. 11 دَ لبِ پردِه آخِرِ پَنج پردِه اوّل اُونا بُتَونی ها از تارِ لاجوَردی رَنگ دوخت و دَ پَنج پردِه دوّم ام امی رقم کد. 12 بعد ازُو اُونا پِنجاه دانه بُتَونی دَ لبِ یگ تَخته و پِنجاه دانه بُتَونی دَ لبِ دِیگه تَخته جور کد، پِنجاه پِنجاه بُتَونی که رُوی دَ رُوی یگدِیگه بُود. 13 اُونا امچُنان پِنجاه چنگَکِ طِلّایی تَیار کد و دَ وسِیلِه ازوا پَنج پردِه اوّل ره قد پَنج پردِه دوّم وَصل کد و پرده های جایگاه مِثلِ یگ پَرچِه جور شُد.
14 بعد ازُو اُونا چند پرده از مُوی بُز بافت تا یگ خَیمه دَ بَلِه جایگاهِ مُقَدَّس بَشه. جُملِه پرده ها یازده بُود. 15 دِرازی هر پرده سی توغَی و بَر شی چار توغَی بُود؛ امُو یازده پرده یگ اندازه بُود. 16 اُونا پَنج پرده ره دَ یگدِیگِه شی کوک کده یگ پرچه جور کد و شَش پردِه دِیگه ره ام یگ پرچِه دِیگه. 17 بعد ازُو اُونا پِنجاه بُتَونی دَ لبِ پردِه آخِرِ یگ پرچه و پِنجاه بُتَونی دَ لبِ پردِه آخِرِ پرچِه دِیگه جور کد. 18 اُونا بَلدِه یگجای کدونِ خَیمه پِنجاه چنگَکِ برونزی ام جور کد تاکه خَیمه یگ پرچه بَشه. 19 بعد ازُو اُونا بَلدِه خَیمه از پوستِ سُرخ شُدِه قُوچ یگ پوش جور کد و دَ بَلِه ازُو یگ پوشِ دِیگه از پوستِ نَرم-و-قِیمَتی.
20 بعد ازُو اُونا چیو های چارتراش ره از دِرختِ اَکاسی بَلدِه دیوالای جایگاه جور کد و اُونا ره شِیخکی ایسته کد. 21 دِرازی هر چیوِ چارتراش دَه توغَی و بَر شی یگ و نِیم توغَی بُود. 22 هر چیوِ چارتراش دُو دانه زِبونَک دَشت که دَ چیوِ چارتراشِ پالُوی خُو جُفت مُوشُد. و اُونا تمامِ چیو های چارتراشِ جایگاه ره دَ امزی طرِیقه تَیار کد. 23 اُونا امزُو چیو های چارتراش بِیست دانِه شی ره بَلدِه طرفِ جنُوبِ جایگاه جور کد 24 و بَلدِه تَینه حِصِّه امزُو بِیست چیوِ چارتراش چِل پایِه نُقره‌یی ام تَیار کد؛ دَ زیرِ هر چیوِ چارتراش دُو پایه بَلدِه امزُو دُو زِبونَک بُود و دُو پایه دَ زیرِ چیوِ چارتراشِ پالُوی شی بَلدِه دُو زِبونَکِ ازُو. 25 بَلدِه طرفِ دوّمِ جایگاه، یعنی طرفِ شمال شی، اُونا بِیست چیوِ چارتراش جور کد 26 قد چِل پایِه نُقره‌یی، یعنی دُو پایه دَ زیرِ یگ چیوِ چارتراش و دُو پایه دَ زیرِ چیوِ چارتراشی که دَ پالُوی شی بُود. 27 بَلدِه پُشتِ جایگاه، طرفِ غَرب اُونا شَش چیوِ چارتراش جور کد. 28 اُونا امچُنان دُو چیوِ چارتراش بَلدِه هر کُنجِ پَسنه حِصِّه جایگاه جور کد. 29 امی دُو چیوِ چارتراشِ کُنج از زیر تا باله دَ یگدِیگِه خُو چسپِیده بُود و دَ مَنِه یگ حلقه سخت شُدُد. دُو چیوِ کُنجِ دِیگه ام دَ امزی رقم جور شُدُد. 30 پس دَ اُو طرف هشت چیوِ چارتراش قد شونزده پایِه نُقره‌یی بُود: دُو پایه دَ تَی هر چیوِ چارتراش.
31 علاوِه ازی اُونا پُشت‌بَند ها ره از چیوِ دِرختِ اَکاسی تَیار کد، یعنی پَنج پُشت‌بَند بَلدِه چیو های چارتراشِ یگ طرفِ جایگاه، 32 و پَنج پُشت‌بَند بَلدِه چیو های چارتراشِ دِیگه طرفِ جایگاه و پَنج پُشت‌بَند بَلدِه چیو های چارتراش که طرفِ غَرب دَ پَسنه حِصِّه جایگاه یَه. 33 پُشت‌بَندی که دَ غولِ چیو های چارتراش بُود، از سر تا آخِرِ دیوالِ خَیمه تیر شُدُد. 34 بعد ازُو اُونا پگِ چیو های چارتراش ره قد رُوی‌کَشِ طِلّایی پوشَند و بَلدِه محکم گِرِفتونِ پُشت‌بَند ها اُونا حلقه های طِلّایی جور کد و پُشت‌بَند ها ره ام قد رُوی‌کَشِ طِلّایی پوشَند.
35 اُونا پردِه داخِلِ خَیمه ره از کتانِ نَرم و مَیده بافت قد چُوغ های لاجوَردی، اَرغَوانی و سُرخ رَنگ جور کد و عکسِ کِرُوبی ها ره دَ وسِیلِه دِست‌دوزِ لایق دَ رُوی پرده گُلدوزی کد. 36 بعد ازُو اُونا چار ستُون از چیوِ اَکاسی بَلدِه امزُو پرده جور کد و اُونا ره قد رُوی‌کَشِ طِلّایی پوشَنده بَلدِه شی چنگَک های طِلّایی و چار پایِه نُقره‌یی تَیار کد. 37 اوخته یگ پرده بَلدِه دَروازِه خَیمه از چُوغ های لاجوَردی، اَرغَوانی و سُرخ رَنگ و از کتانِ نَرم و مَیده بافت دَ وسِیلِه یگ گُلدوزِ لایق جور کد. 38 و بَلدِه امزی پرده اُونا پَنج ستُون ره قد چَنگک های شی جور کد و سرِ ستُون‌ها و تِیرِ سرِ ستُون‌ها ره قد رُوی‌کَشِ طِلّایی پوشَند و پَنج پایِه شی ره ام از برونز تَیار کد.