فصلِ بِیست و شَشُم
خَیمِه عِبادت
1 ”جایگاه ره قد دَه دانه پردِه کتانِ نَرم و مَیده بافت و قد چُوغ های لاجوَردی، اَرغَوانی و سُرخ رَنگ جور کُو. دَ رُوی پگ شی عکسِ کِرُوبی ها ره دَ وسِیلِه دِست‌دوزِ لایق گُلدوزی کُو. 2 دِرازی هر پرده بِیست و هشت توغَی و بَر شی چار توغَی بَشه؛ تمامِ پرده ها یگ اندازه جور شُنه. 3 پَنج پرده دَ یگدِیگِه خُو دوخته شُنه تاکه یگ تَخته جور شُنه و پَنج پردِه دِیگه یگ تَختِه دِیگه جور شُنه. 4 دَ لبِ پردِه آخِرِ پَنج پردِه اوّل بُتَونی ها از تارِ لاجوَردی رَنگ کوک کُو و دَ لبِ پردِه آخِرِ پَنج پردِه دوّم ام امی رقم کُو: 5 پِنجاه دانه بُتَونی دَ لبِ یگ تَخته و پِنجاه دانه بُتَونی دَ لبِ دِیگه تَخته جور کُو، پِنجاه پِنجاه بُتَونی که رُوی دَ رُوی یگدِیگه بَشه. 6 بعد ازُو پِنجاه چنگَکِ طِلّایی تَیار کُو و دَ وسِیلِه ازوا پَنج پردِه اوّل ره قد پَنج پردِه دوّم وَصل کُو تاکه پرده های جایگاه مِثلِ یگ پرچه جور شُنه.
7 بعد ازُو چند پرده از مُوی بُز بُباف تا اُونا یگ خَیمه دَ بَلِه جایگاهِ مُقَدَّس بَشه. جُمله یازده پرده جور کُو. 8 دِرازی هر پرده سی توغَی و بَر شی چار توغَی بَشه؛ یازده پرده که پگ شی یگ اندازه بَشه. 9 پَنج پرده دَ یگدِیگِه خُو کوک شُنه تاکه یگ پرچه جور شُنه و شَش پردِه دِیگه ام دَ یگدِیگِه خُو کوک شُنه تا یگ پرچِه دِیگه جور شُنه. پردِه شَشُم از پرچِه دوّم دَ پیشِ رُوی خَیمه قت شُنه. 10 پِنجاه بُتَونی دَ لبِ پردِه آخِرِ یگ پرچه و پِنجاه بُتَونی دَ لبِ پردِه آخِرِ پرچِه دِیگه جور کُو. 11 بعد ازُو پِنجاه چنگَکِ برونزی جور کُو و اُونا ره از شِکافِ امزُو پِنجاه بُتَونی تیر کُو تاکه خَیمه مِثلِ یگ پرچه جور شُنه. 12 قِسمَتِ اِضافی، یعنی نِیمِ پرده که از خَیمه باقی مُومَنه، باید دَ پُشتِ سرِ جایگاهِ مُقَدَّس اَوزو شُنه. 13 یگ توغَی از یگ بَغَل و یگ توغَی از دِیگه بَغَلِ خَیمه که از دِرازی یگ پرده اِضافی اَسته، بیل که دَ دُو بَغَلِ جایگاه اَوزو شُنه تا اُو ره بُپوشَنه. 14 یگ پوش دَ بَلِه خَیمه از پوستِ سُرخ شُدِه قُوچ جور کُو و دَ بَلِه ازُو یگ پوشِ دِیگه از پوستِ نَرم-و-قِیمَتی.
15 چیو های چارتراش ره از دِرختِ اَکاسی بَلدِه دیوالای جایگاه جور کُو که اُونا شِیخکی ایسته شُنه. 16 دِرازی هر چیوِ چارتراش دَه توغَی و بَر شی یگ و نِیم توغَی بَشه. 17 دَ هر چیوِ چارتراش دُو زِبونَک بَشه تاکه دَ چیوِ چارتراشِ پالُوی خُو جُفت شُنه. پگِ چیو های چارتراش بَلدِه دیوالای جایگاه باید امی رقم جور شُنه. 18 امزُو چیو های چارتراش بِیست دانِه شی بَلدِه طرفِ جنُوبِ جایگاه باید جور شُنه، 19 و بَلدِه تَینه حِصِّه امزُو بِیست چیوِ چارتراش چِل پایِه نُقره‌یی ام جور کُو. دَ زیرِ هر چیوِ چارتراش دُو پایه بَلدِه امزُو دُو زِبونَک بَشه و دُو پایه دَ زیرِ چیوِ چارتراشِ پالُوی شی بَلدِه دُو زِبونَکِ ازُو. 20 بَلدِه طرفِ دوّمِ جایگاه، یعنی طرفِ شمال شی، بِیست چیوِ چارتراش 21 و چِل پایِه نُقره‌یی جور کُو، دُو پایه دَ زیرِ یگ چیوِ چارتراش و دُو پایه دَ زیرِ چیوِ چارتراشِ پالُوی شی. 22 بَلدِه پُشتِ جایگاه، طرفِ غَرب شَش چیوِ چارتراش جور کُو 23 و دُو چیوِ چارتراش بَلدِه هر کُنج دَ پَسنه حِصِّه جایگاه. 24 امی دُو چیوِ چارتراشِ کُنج باید از زیر تا باله دَ یگدِیگِه خُو چسپِیده بَشه و دَ مَنِه یگ حلقه سخت شُنه. دُو چیوِ کُنجِ دِیگه ام دَ امزی رقم جور شُنه. 25 دَمزی صُورت باید هشت چیوِ چارتراش قد شونزده پایِه نُقره‌یی بَشه: دُو پایه دَ زیرِ هر چیوِ چارتراش. 26 بعد ازُو پُشت‌بَند ها ره از چیوِ دِرختِ اَکاسی جور کُو: پَنج پُشت‌بَند بَلدِه چیو های چارتراش که دَ یگ طرفِ جایگاه اَسته 27 و پَنج پُشت‌بَند بَلدِه چیو های چارتراشِ دِیگه طرفِ جایگاه و پَنج پُشت‌بَند بَلدِه چیو های چارتراش که طرفِ غَرب دَ پَسنه حِصِّه جایگاه یَه. 28 پُشت‌بَندی که دَ غولِ چیو های چارتراش اَسته، باید از سر تا آخِرِ دیوالِ خَیمه تیر شُنه. 29 پگِ چیو های چارتراش ره قد رُوی‌کَشِ طِلّایی بُپوشَن و بَلدِه محکم گِرِفتونِ پُشت‌بَند ها، حلقه های طِلّایی جور کُو و پُشت‌بَند ها ره ام قد رُوی‌کَش طِلّایی بُپوشَن. 30 بعد ازُو جایگاه ره باله کُو و دَ مُطابِقِ نقشِه که دَ سرِ کوه دَز تُو نِشو دَده شُد، اُو ره جور کُو.
31 پردِه داخِلِ خَیمه ره از کتانِ نَرم و مَیده بافت قد چُوغ های لاجوَردی، اَرغَوانی و سُرخ رَنگ جور کُو. عکسِ کِرُوبی ها دَ وسِیلِه دِست‌دوزِ لایق دَ رُوی پرده گُلدوزی شُنه. 32 اُو ره دَ چار چنگَکِ طِلّایی دَ بَلِه چار ستُون اَوزو کُو. اِی چار ستُون ره از چیوِ اَکاسی جور کده قد رُوی‌کشِ طِلّا بُپوشَن و دَ بَلِه چار پایِه نُقره‌یی ایسته کُو. 33 پرده باید دَ قَیتَک ها دَ زیرِچَتِ خَیمه بَند شُنه و صندُوقِ شهادَت ره دَ پُشت امزی پرده بیل و امی پرده بَلدِه شُمو یگ جدایی دَ بَینِ مُقَدَّس و مُقَدَّس‌تَرِین جای خَیمه دَ وجُود میره. 34 بعد ازُو جای کِفاره ره دَ بَلِه صندُوقِ شهادَت دَ مُقَدَّس‌تَرِین جای بیل. 35 میز ره دَ اِی لبِ پرده، یعنی دَ بُرو از مُقَدَّس‌تَرِین جای، دَ طرفِ شمال بیل و چِراغدان رُوی دَ رُوی میز دَ طرفِ جنُوبِ جایگاه بَشه. 36 یگ پرده بَلدِه دَروازِه خَیمه از چُوغ های لاجوَردی، اَرغَوانی و سُرخ رَنگ و از کتانِ نَرم و مَیده بافت دَ وسِیلِه یگ گُلدوزِ لایق جور کُو. 37 بَلدِه امزی پرده پَنج ستُون از چیوِ اَکاسی جور کده قد رُوی‌کشِ طِلّایی بُپوشَن. چنگَک های شی ام از طِلّا بَشه و دَ زیرِ هر ستُون یگ پایه برونزی ریخته شُنه.“