SRAT MEM MBEN
IBRANI
NIHYET GI BIBIE TUT
Tungwagom pas kep Srat Mem Mben Ibrani bipinak bak yo di ingon jo kep nya nimpung gom di tungwatu nya ihwen bit yok apino nahanok ma yoni mikes hon ide niba ningon com Kristusti. No di pas kep srat dini biwin kep yo di mbusyamei mben Ibrani nya ingonti. Tut gima ne noni ndo brei bipia Allah di kei-kau-kei ndo Nonti brei tug hon Yesus Kristus. No di pas kep srat dini mbrap tut mun nyeng ningai. Gi nigom rino Yesus Kristus ne Allah Nipmot di niyaijo kikau ri. Allah Nipmot dima ndo Nide nibit Nicig nihyetti tug hon Nide niba nibou coi mem ninghuisi wei di cut igkep Noni. Yesus ne Allah Nipmot di ninyeng jei dor njiriek nabi di ipas kep tut yok ei Gi Preu Nitimieiti nya rin ba, ninyeng jei dor njiriek malaikati nya kin Musa cem. Gi nican rino Allah ta Yesus nok imam di niyaijo kikau di ninyeng jei dor njiriek imam di ipas kep tut yok ei Gi Preu Nitimieiti. Gi niningai rino tungwatu nya di ingon jo kep Yesus igyai niteu leu sisarti kin ningon ttinti kin nimai nimbicanti. Yesus ne Imam Nibou Ndig rin ba, Noni yai niteu leu sisarti kin niyaijo nijep di kei-kau bak tungwatu nya. Bit bon mben Yahudi ide midut nya yai niteu leu sisarti kin niyaijo nijep bak tungwatu nya kan bi. Ide midut nya ne bindo di ndo tut niteu leu sisar kin niyaijo nijepti di kei-kau dima he.
No di pas kep srat dini ppu hum kin mben Ibrani ingonti leu binhyepo iba ingon com Kristus kikau tug hon nipui sut mben Ibrani idigup-idigai bat nya ide niba ningon comti (pasar 11). Noni ba nipas kepti ei pasar 12 bibiwin kep ingonti leu binhyepo iba ingon com kikau ba, itou kep Yesus Nongkom nggilun. Noni biwin kep ingonti bu leu binhyepo iba ibou coi mem ninghuisi wei di cut igkep yok tug hon yo di ihwen bit yok. Srat ningwigsi pingok mben Ibrani ingonti bisok kep yok.
Nirop Ninda Ndigsi
Allah ndo nikei-kau-keisi brei tug hon Kristus 1:1-3
Kristus ninyeng jei dor njiriek malaikati nya 1:4--2:18
Kristus ninyeng jei dor njiriek Musa kin Yosua 3:1--4:13
Kristus ne Imam Nibou Ndig di bon ninyeng dor njiriek imam nindigsi nya 4:14--7:28
Kristus de gi preu nijep bon ninyeng dor njiriek gi preu nindigsi nya 8:1--9:28
Kristus nimai ei biei salibti bon ninyeng dor njiriek mben Yahudi ide midut nibikos ser sisarti 10:1-39
Niba ningon comti bon ninyeng bibor 11:1--12:29
Nipingok ingonti kin nikes nihyet honti 13:1-25