SRAT GI NICAN DI PAULUS PAS MEM
TIMOTIUS
NIHYET GI BIBIE TUT
Hanjop ndig ei Srat Gi Nican Mem Timotius nibokti pai sut notou Paulus pingok Timotius ningonti. Noni ne Paulus nisut rin bahati tut Paulus cem lo, noni pinjoi pilei he yo. Paulus de nipingok Timotiusti di bon ninyeng pai bipia suar Timotius ta nibou ei nide midyaiti. Nipingok Timotius ningonti dima biwin kep ningonti leu binhyepo tri nihyet tut Tuhan Yesus Kristus bikrau kep Gi Preu Nitimiei ningginau noti kin Paulus ningginau noti tut Nihyet Di Kei. Mbro nok gino Timotius yai ninghuisi di wei ba, tungwatu nya itte tut noni lo, suar ninda jo kep midyai nok guru kin no di tri tut Nihyet Di Kei cem.
Paulus pingok Timotius ningonti leu binhyepo noni bicom yam bit yo di ingon mbum nya di iba ighyet dahat yam hyet tut mun di bon ninyeng bi nya au. Ningat di kei ntun niba nihyet dahat yam hyetti bi noro bindei kinei yo di imiap kep nya ingonti.
Tut mun dima yok hagom lene Paulus pingok Timotius ningonti leu binhyepo noni yai bram Paulus niyai kepti. Paulus yai niyai kepti dima tug hon nide niba ningon com Kristusti kin ningon jo nyahanti kin ningon ngakei tungwatu nyati kin nita nibou ei Allah de midyai nyati kin ninghuisi wei di yai leu yo di ihwen bit noni.
Nirop Ninda Ndigsi
Paulus pigo Timotius 1:1-2
Paulus nggei sut Allah bibiwin kep Timotius ningonti 1:3--2:13
Paulus pingok Timotius ningonti 2:14--4:5
Paulus pui kep mun di pek kep mem noni 4:6-18
Paulus kes nihyet hon 4:19-22