Ma itin ei mem Tuhan nikwei hanyenti
5
1 Disut bat jen, suar nipai sut nituti dima mun dini yok nipek kep mem nyeti bije bi. 2 Lewo jikan mungkun tut Tuhan de njap nikwei hanyenti di mittau kep nye dima midem kep ninggimang mun cig di ttau mem mmun. 3 Mpe dino tungwatu nya mitri tut biyam <<Yahagom ibong kei igwam kei ba, mpia mbum-bra>> lene mun di bindei timek yok micut igkep yok kros noyam kin sop di ninghim dut tut munggwom lene bit bon ingwes ngun kan bi. 4 Noro disut bat jen, nidinditi nggai kep je bi. Gima rino Tuhan de njap nikwei hanyenti dima mitimon je kros noyam kin ninggimang mun cig nitimon tungwatu nya krosti bi. 5 Lewo jahagom jinok munggwom nipigati bijinggre kin yo di imbut mem njap. Inok munggwom nidinditi kin yo di inggre kin nimpung di imbut mem mmun bi. 6 Gima rino ma ibong biei nda dip kep ig hak nok yo di hiter au. Noro ma itindei ser mun nyeng hagom bigyai nggrop nggan. 7 Lewo yo di ibong biei nda dip kep ig kin yo idut mun di pu yok ne gima yok hagom mem himmun. 8 Noro ma nye di munggwom nipigati igyai nggrop nggan. Ma jingon jo kep Yesus Kristus ba, jingon ngakei yam. Ma jiyok jingon mem Allah di miteu nye leu dihyeisi dini biyai niyaijo kikau binye kikau ba, mun dini yok hagom tereu nok sinsun pran di ijuk tirigi ikon pran bit nidinditi. 9 Allah dimig nye leu binhyepo itug ndei hukum leu Noni bi noro teu nye leu sisar biyai niyaijo nijep binye tug hon ide Tuhan Yesus Kristus. 10 Noni mai luei nye leu binhyepo nok gino igyaisi jo e, he imai su mem nikwei hanyenti lo, yahagom igyai niyaijo nijep bigwam bit Noni kikau. 11 Gima rino ma jiwin kep yam ngonti ba, jahati tut yam kikau bit leu nok gi jiyai kep bipek ammani tu.Paulus nipingok yokti ningwigsi nya
12 Disut bat jen, nitigtai je leu binhyepo jibou cut bak jide nibou nya di Tuhan ta mem Nide midyai di igyai ei jikieti lewo Noni dimig yok ei mem midyai nibie tut jeti kin nipingok jeti. 13 Ma jikon inyeng bijingondut yok drek dip midyai nya di igyai ei jikieti. Ma jingon kwes kin yam.
14 Disut bat jen, nitigtai je leu binhyepo jiba jingon di kwes bisok kep yo di inghen nya ba, jibiwin kep yo di ingwes mien ingonti. Ma jimpu yo di isindem bi nya ba, jingon jo nyahan tut yahagom. 15 Ma hi ba nimbuk birop hanyen bak no di yai mun tunggwei sut noni au. Noro ma jita jibou ei gi jiba jingon di kwes birop hanyen biyam ba, birop hanyen bak tungwatu nya yahagom cem.
16 Ma jingon llei bibor bikwop mmun-njap. 17 Ma jingat nadi bidem nituti hagom bijingon cut leu nadi au. 18 Ma jijem sigyo bak Allah tut mun nyeng hagom di pek kep mem je. Ba, gima yok hagom lene Allah ningon kanti mem je di jinok gom kin Kristus Yesus ri.
19 Ma jimu kep Allah Ninnei au. 20 Ma jingwes pri gau nihyet di kwei leu Allah Ninnei au. 21 Ma jibinai sut nihyet hagom bijibit gi hi di kei nya. 22 Lene ma jimbres jenti ei minu ting leu mun di kinei ninyeng hagom.
23 Handei kon ba, Allah di bindei ba, ibong kei igwam kei yai jingon kwes-kwau. Handei kon ba, Noni nyohou jenti njem bitut jinnei kin jingon kin jingut leu binhyepo mun di kinei hi rap je bi ei mpe dino ide Tuhan Yesus Kristus kwei hanyen. 24 Ba, Allah di hig je bidimig je ei miyai midyai dini hagom ei jingonti lewo ningon gom.
25 Disut bat jen, ma jingat nadi tindei nye.
26 Ma jiba ningon di ce yam bi bipigo yo di ingon jo kep nya yahagom.
27 Ditigtai je tug hon Tuhan di sindem bibor ninyeng bipia ma jikwop kep srat bokti dini bak yo di iba ingon com Noni yahagom.
28 Handei kon ba, ide Tuhan Yesus Kristus singat tut je.
Nipigo leu dani, Paulus