Ningginausi tut Kristus nikiju hanyen leu nimai eisi
15
1 Disut bat jen, nogindini dipus kiek jingonti tut Nihyet Di Kei di ditri bije nipou su. Jiyai nihyet dima bijipwoi ei jingonti lene jiba jingom com Kristus tug hon Nihyet Di Kei dima. 2 Gino jikrau kep Nihyet Di Kei di ditri tut bije lene nihyet dima bindei ba, jiyai niteu leu sisarti kin niyaijo nijep. Gi bi ne jingon jo kep nihyet dima mikui-kausi.3 Nihyet di ditri tut bije ne nihyet di bon ninyeng nindig bibor ri. Diyai nihyet dima leu Allah bidipwoi ei dingonti. Bit leu nok gi ipas ei Allah nihyetti bipia Kristus mai drek dip ide sisar ba, 4 itig ningut leu api Allah win Noni hanyen leu nimai eisi mem njap gi niningai bit leu nok gi ipas ei Allah nihyetti. 5 Kristus ndo Nonti bak Petrus leu api bak yo di igya kui Noni ibou simnaibrimigcan bu. 6 Leu api ndo Nonti bak yo di ibit Noni ibou sratus muhwi di induk yam ei gom. Yo dini imang bibor yo rinaha ba, igyaijo kikau kwei bipek ammani kep noro ibou poi imai leu su. 7 Leu api ndo Nonti bak Yakobus leu api bak yo di igya kui Noni nindigsi nya yahagom.
8 Leu api ndo Nonti ningwigsi bak dani lo, dinok munggwom ngwoi di nipmem gwam tut kinei.i 9 Dani ne no di ya kui Yesus di bon ninyeng bi ri. Dem tut gima tungwatu nya ipai bipia dani ne no di ya kui Yesus rin bi. Leu gi po dihwen bit Allah de mbusyamei nya pima. 10 Noro nogindini diya diyati nok no di ya kui Yesus tug hon Allah nisingat tut dati. Diyai nisingat tut dati mikuisi bi. Ningat ne dita dibou ei Allah de midyaiti dor njiriek yo di igya kui Yesus nindigsi nya yahagom. Nisindemti di bindei bidita dibou ei midyai dimati kwei leu danti bi noro kwei leu Allah nisingat tut dati lene ba No bikum da mem midyai dima. 11 Gino no di tri tut Nihyet Di Kei bije dima ninyeng Paulus e, he yo di igya kui Yesus hiter nya e, gima bon ninyeng bi. Noro mun di bon ninyeng rino nahagom nitri tut Nihyet Di Kei bije apino jingon jo kep Kristus.
Ningginausi tut yo di Kresten ide nikiju hanyen leu nimai eisi
12 Gino nitri tut bipia Allah win Kristus hanyen leu nimai eisi tu lene nggon rino jibou poi jisimbot dat bipia Allah win yo di imai nya hanyen leu imai eisi bi i? 13 Gino Allah win nimai nya hanyen leu imai eisi bi lene jo nibreisi bipia Noni win Kristus cem hanyen leu nimai eisi bi. 14 Gino Allah win Kristus hanyen leu nimai eisi bi lene jo nibreisi bipia nihyet tut Kristus di nitri tut bije kin jide niba ningon com Kristusti hacem bon ninyeng bi. 15 Gima he bi lewo ningat ne niris mun ei Allah dip lewo nitri tut bipia Allah win Kristus hanyen leu nimai eisi tu. Noro gino Noni win Kristus hanyen leu nimai eisi bi lene Noni miwin nimai nya cem hanyen leu imai eisi bi! 16 Leu gino Allah miwin nimai nya hanyen leu imai eisi bi lene jo nibreisi bipia Noni win Kristus cem hanyen leu nimai eisi bi. 17 Gino Noni win Kristus hanyen leu nimai eisi bi lene jide niba ningon com Kristusti tereu nok mun di jimumpriem he. Ba, sisar no kri kep je kikau ba, gimbun jingwes ngun kan bi, 18 lene yo di Kresten di imai su nya isar bihigom tu. 19 Gino ide niba ningon com Kristusti mbut mem nijam di igyaijo dini he bingwig hon imaisi lene nyeni miwer yo di indwau bibor dor njiriek tungwatu dihyeisi dini hagom.
20 Noro ningat ne Allah win Kristus hanyen leu nimai eisi tu ba, Noni ngot nikiju hanyen leu nimai eisi nimig mem yo di imai su nya. 21 Bit leu nok tungwagom ngat bindei ba, tungwatu nya itug ndei nimai lene tungwagom ngat bindei ba, tungwatu nya mikiju hanyen leu imai eisi. 22 Bit leu nok tungwatu yahagom itug ndei nimai drek dip gi intun Adam him lene yahagom mikiju hanyen leu imai eisi drek dip gi inok gom kin Kristus. 23 Noro bikwop tungwagom-gom mikiju hanyen sindam ba, Kristus nok mighumbou bibie ug e. Leu api Kristus de limwa nya mikiju hanyen bu nok nipumiap mem Kristus nikwei hanyenti. 24 Njap dima ne njap ningwig honti ri. Mpe dima lene Kristus mibindei timek nibou ndig di inyeng tak kep mpia-bbed him kin nibou ndig di inyeng tak kep dihyeisi dini nya kin nisindemti nya hagom. Leu api Noni mitug Ninyeng Tak Kepti hanyen bak Nicig Allah. 25 Suar Kristus De Ninyeng Tak Kepti mbut kikau bibou Allah bindei cut Kristus de siceu nya boom yahagom ei Kristus nimig him ug e. 26 Kristus de siceu di Allah mibindei cut ei niabiati ngat rino nimai. 27 Bit leu nok gi ipas ei Allah nihyetti <<Allah bindei cut mun nyeng hagom ei Kristus nimig him.>> Jo nibreisi bipia nipas kepti <<Mun nyeng hagom>> dima ne bitut Allah Nonti di bindei cut mun nyeng hagom ei Kristus nimig him bi. 28 Niabiati Allah bindei cut mun nyeng hagom ei Kristus nimig him leu su lene Kristus di Allah Nipmot mikuk Nonti ei No di bindei cut mun nyeng hagom ei nimig him leu api Allah Nongkom ninyeng tak kep mun nyeng hagom.
29 Gino Allah miwin yo di imai su nya hanyen leu imai eisi bi sren ne nggon rino itur tungwatu nya ei minyeiti mem yo di imai su i? Igyaisi dima bibon mindei mem yok i? Gino Allah miwin yo di imai su nya hanyen leu imai eisi bi sren ne nggon rino itur tungwatu di igyaijo ei minyeiti mem yo di imai su nya i? 30 Nggon rino ninggok nimai eisi tut Kristus bikwop njap ngwa hagom i? 31 Disut bat jen, dinggok dimai eisi tut Kristus bikwop njap ngwa hagom lewo dillei ngwig sut je drek dip gi jinok gom kin Kristus Yesus di ide Tuhan. 32 Gino didahat kukwei <<Mindhe di niten-pos nya>> ei minu ndig Efesus dini tereu nok no di yok ningon mem nikiju hanyen leu nimai eisi bi ne dibipek mindei i? Gino Allah win nimai nya hanyen leu imai eisi bi ne nnaba injei bit tungwatu di ipai <<Jikwei ba, igyem njita bidut ndia ngei cem lewo imai mem njap di hyep ug ri.>>
33 Ma jikrau tunggwei puig au. Gino jiba je bipis yo di ibon mun hacican ikieti ne jei bi yahak igyai kepti dima ei jeti hanyen. 34 Joom jingon ba, ma jibon kep sisar bu au. Ma jimmai sut jenti lewo ibou poi di isrig jikieti ingon kwes kin Allah bi.
Ningut nikiju hanyen leu nimai eisi
35 Mpaba tungwa hi hig ser <<Notou yo di imai su nya mikiju hanyen leu imai eisi i? Ikiju hanyen tut ingut dinok mindei i?>> 36 Angon mbum yo! Mpe dino andim njita ngan lene nisina bai mai ei dihyeiti nipou leu api nikioi hei bram bu. 37 Gandum ningan kin njita ngan hiter di andim dima lene njita ngan he rin yo ba, nikioi kin ninjem kin ningat ntun him bigyo. 38 Allah Nonti bindei ba, njita ngan dima bon ninjem kin ningat di ntun him bit leu ningon kanti. Noni bindei ba, njita ngan hagom bon ninjem kin ningat di ntun him bikwop njita nyeng hagom.
39 Mun di Allah pai tes di ninnei hei nuhwap nsi nya hagom noyam bi. Nye di tungwatu ibon ingut ter lene mindhe-ndhe ibon ingut ter. Ha nya ibon ingut ter lene wau nya ibon ingut ter ba, hagom ter leu yam.
40 Mun di jo ei mpia-bbed him kin mun di jo ei dihyeisi dini ter leu yam. Gi hi di jo ei mpia-bbed him bon nuubbuti titer lene gi hi di jo ei dihyeisi dini bon nuubbuti titer. 41 Mpia njap bon nuubbuti titer lene bed mmun bon nuubbuti titer. Ham nya ibon yuubbuti titer bu ba, ham nya hagom bon nuubbuti titer leu yam.
42 Nok gima cem tut nimai nya di ikiju hanyen leu imai eisi. Itig nimai ngut di kroi ei dihyeiti noro Allah bindei ba, nimai kiju hanyen tut ningut di kroi hanyen bi sren. 43 Itig nimai tut nitta cut kin ninghuisi wei lo, ningut kiju hanyen bibon ningut di ubbu ba, sindem cem. 44 Nimai ngut di itig ntun dihyeisi dini him noro niabiati kiju hanyen lene bon ningut di ntun niyaijoti him tug hon Allah Ninnei. Ningat ne ningut di ntun dihyeisi dini him no rinaha. Gima rino ningut di ntun Allah him cem no rinaha. 45 Bit leu nok gi ipas ei Allah nihyetti <<Allah pai tes Adam nok no di nigom di niyaijo ba, ninnei joti.>> Noro Adam di ya nohon keti ne Ninnei di yai niyaijo nijep bak tungwatu nya ri. 46 Gi kwei bibie ne ningut di bitut ninnei rin bi noro ningut di ntun ningut di mipror yon. Ningut di bitut ninnei ya abia kep ningut di ntun ningut di mipror yon. 47 Ei nimbie him ngat ne Allah ba dihyei ndung bipai tes Adam nok no di ya bibie. Noro Adam gi nican nitimieisi leu gwamti. 48 Tungwatu dihyeisi dini inoyam kin Adam gi nigom di Allah ba dihyei ndung bipai tes. Noro yo di intun gwamti him inoyam kin No di kwei leu gwamti. 49 Nogindini ingwes dat no di Allah ba dihyei ndung bipai testi. Noro ei nidipti bu lene ingwes midat No di kwei leu gwamtiti.
50 Disut bat jen, nimbot kepti rinok gini. Bit bon ningut di bon ninghui kin ninggrom nggre kin Allah Ninyeng Tak Kepti kan bi. Ba, bit bon mun di kroi ei dihyeiti nggre kin mun di jo gingga kan bi.
51 Ma jiyok ngon kep mimun dini. Yahagom mimai bi noro Allah miluei yahagom itta. 52 Mun dini mitimon nye kros noyam kin niyai mpau di bingmai mbigom he tirigi pun mbrei ningwigsi nugwei bong. Tirigi pun mbrei nugwei bong rino yo di imai su nya mikiju hanyen biyuum ingut di jo gingga di bit bon kroi hanyen kan bi. Leu api Allah miluei yahagom itta. 53 Suar ba ningut di bit bon kroi hanyen kan bi bijuk ningut di mikroi ei dihyeiti. Suar ba ningut di ntun gwamti him bijuk ningut di ntun dihyeisi dini him. 54 Hammi tirigi ingut di mikroi ei dihyeiti ba ningut di bit bon kroi hanyen kan bi bijuk no ba, ningut di ntun dihyeisi dini him ba ningut di ntun gwamti him bijuk no lene nihyet di ipas ei Allah nipas kepti mipek kep nok gini <<Allah bindei timek nimai de nisindemti bingwig leu su!>>
55 We nimai e, ade nisindemti di bindei timek nye no ritou i?
We nimai e, ade nisindemti di pinggin nye no ritou i?
56 Nimai de nisindemti ntun sisar him ba, sisar de nisindemti ntun Puig Yahudi niggai serti him. 57 Noro jikwei ba, ipai sigyo bak Allah lewo Noni yai nisindemti binye leu binhyepo ibindei timek siceu nya yahagom tug hon ide Tuhan Yesus Kristus!
58 Gima rino disut bat di dingon kieti jen e, ma jiyai nisindemti kin ningon nddongti. Ma jita jibou ei Allah de midyaiti lewo jikan tut bipia midyai di jiyai mem Tuhan nya hagom mikui-kausi bi sren.