NIHYET DI KEI DI
MATIUS
PAS KEP
NIHYET GI BIBIE TUT
Srat Matius tibim tut Nihyet Di Kei ba, ndo binye bipia Yesus ne No di teu tungwatu nya leu ide sisar biyai niyaijo nijep biyok di Allah preu ei mem yok. Allah yai igbit nipreu eisi bak Nide limwa nya ei Gi Preu Nitimiei tug hon Yesus nisrekti. Yesus ne mben Yahudi rin ba, niyaijo ei dihyeisi dini nok mben Yahudi. Noro Nihyet Di Kei dini mem mben Yahudi he bi noro mem tungwatu dihyeisi dini hagom.
Matius nyohou dimig hanjop nsi ei nide sratti hagom nok igbit. Nitriti pui sut Yesus nisrekti kin niyai nitur No ei minyeiti kin Bilis nibingon Noniti kin Nide midyai ei Galilea cem. Noni tri tut nihyet ba, ngginau tungwatu nya lene bindei ba, yo di inggwen ikei hanyen ei mpia dima. Leu api srat dini pui sut Yesus nimbutti tirigi Noni jo leu Galilea buug ei Yerusalem. Lene pui sut mun di pek kep mem Noni tirigi Noni coi ug ei Yerusalem kikau niyaijo ningwig honti kin nikiju hanyenti cem.
Lene Matius pui sut bipia Yesus ne Guru di ninyeng jei rin ba, Noni ngginau tungwatu nya tut Allah di ninyeng tak kep nok nibou dig. Yesus yai nisindemti mem gima tri tut Allah ningon kanti tut Nicukti Nya. Yesus ningginau tungwatu nyati bon nimpung muhwi nok gini: (1) Yesus tri tut yo di icoi bit Allah Ninyeng Tak Kepti igyai munti nya kin ide midyai kin ide nisindemti ei mbigdip di nipieti gom (pasar 5-7). (2) Yesus ningon kanti mem yo di igya kui Noni tirigi imbut tut Nihyet Di Kei (pasar 10). (3) Yesus ba nihyet nibiti nindati bingginau tungwatu nya tut Allah Ninyeng Tak Kepti (pasar 13). (4) Yesus ngginau tungwatu nya tut yo di ibit Noni dima igyai munti nya: (pasar 18). (5) Yesus ngginau tungwatu nya tut nikwei hanyenti kin Allah Ninyeng tak Kepti cem (pasar 24-25).
Nirop Ninda Ndigsi
Yesus Kristus de pung di ntun him nya kin nisrekti 1:1--2:23
Yohanes di tur tungwatu nya ei minyeiti yai kep nide midyai 3:1-12
Yesus yai nitur No ei minyeiti leu api Bilis kwei bingon Noni 3:13--4:11
Yesus yai midyai ei timiei Galilea ikieti 4:12--18:35
Yesus jo leu Galilea buug ei Yerusalem 19:1--20:34
Yesus coi ug ei Yerusalem biyai midyai mem ari gom ei mpia dima 21:1--27:66
Yesus kiju hanyen leu nimai eisi bindo Nonti ningat brei bak tungwatu nya 28:1-20