SRAT NABI MALEAKHI
Nitriti
1
1 Gini ne TUHAN nihyet di sok ei Nabi Maleakhi dip bak mben Israel ri.TUHAN ningon ngakei mben Israel
2 TUHAN pai bak Nide limwa nya <<Dingon ngakei je kikau.>> Noro ibuhup bihig ser Noni <<Notou ando angon ngakei nyeti binye i?>>
TUHAN buhup <<Esau ne Yakub nikindig ri. Dingon ngakei Yakub kin yo di intun noni him. 3 Noro dingon mpo tut Esau bitut yo di intun noni him. Dibindei ba, Esau de minu di bon mbigdip nya timek bingwig ba, dikes minu dima hagom ei mem mindhe-ndhe bigbehei nya ba, ilus-lus nyen eisi.>>
4 Gino yo di intun Esau him icuk yam bipai <<Ide minu dini timek bingwig su noro jikwei ba, iwin hanyen bu.>> Leu api TUHAN buhup <<Nnaba iwin ide minu hanyen hak ug leu api dibindei ba, hagom timek bingwig hanyen bu. Tungwatu nya mijem minu dima <Minu Di Kinei> kin <Mben di itug ndei TUHAN ningon sibui sut yokti bijo ninno bijo kikau.> >>
5 Mben Israel ingat mun dini yok bou igyai him lene ipai <<TUHAN ninyeng jei bibor ba, Nide nisindemti om kep mben di ibong ttai minu Israel nya!>>
TUHAN sok kep imam nya ngkiem
6 TUHAN Di Sindem Bibor pai bak imam nya <<Nipmot kuk no bak nicig lene awak kuk no bak niceu. Dani ne jicig ri. Nggon rino jikuk je biDa bi i? Dani ne jiceu ri. Nggon rino jittin tut Da bi i? Jingwes pri gau Da noro jihig ser Da <Notou ningwes pri gau Na i?> 7 Jiba njita di kinei bibon midut njita nibipai sigyo bak Allahti ei Ditde nimbar hum dokti. Jiyai nok gima lo, jihig ser Da <Nikuk nye biNa haigtu bi notou i?> Jibindei ba, map kui nimbar hum dokti. 8 Gino jibui mindhe di niyai tu kin gi nggwen kin gi lit cem mem Da lene jikan bipia jibon mun tunggwei sut dingon kanti bi e? Gino jibingon niyai mindhe dima bak nibou ndig lene ningon mikei sut je e, he ba ningon di nggriu biyai je e, he notou i?>>
9 Je di imam nya e, nogindini ma jahara Allah leu binhyepo ngondut nye. Noni mibuhup jide nadi bi. Suar jibiang jide nitunggwei sut Noni nibuhunti. 10 TUHAN Di Sindem Bibor pai <<Dijoi sut gima jigom nggam mbou pmem ei Ditde Ig hak nhyema hi ndig hum ariwace ei Ditde nimbar hum dokti bu au. Dijoi sut je bi ba, dikou sut mun di jibikuk je biDa cem. 11 Mben dihyeisi dini nisurti-nipekti hagom inggei sut Da. Yoni indig biei nggrai di ui-gwang kei bibikon dinyeng lene iba mun di ibikuk yok biDa bibon midut igbit bidem minu lewo yahagom ikon dinyenga! 12 Noro jingwes pri gau Da tirigi jikan bipia Ditde nimbar hum dok bon ninyeng bi. Ba, jiba jide njita di kinei di jikon eisi bikuk je biDa. 13 Jipai <Mun dini yok hagom buhun tak nye.> Ba, jikoi jihwap tut Da. Jijem mindhe di jimbrai kin gi lit kin gi nggwen cem kwei mem jibikuk je biDa. Jikan bipia dice tut jiyai munti dima e? 14 Midisigion niris mun cig di nyeng tut nide mindhe di pap-nap kei bibor di noni bet ei mem Da noro ris lene ba mindhe di kinei bibor biluei bu leu api ttei gima mem bikuk no biDa! Lewo Dani ne Nibou Ndig Di Dinyeng Jei ba, mben dihyeisi dini hagom inggei sut Da.>>