Minu ndig Yerusalem de nibon mun kinei biborti
22
1 TUHAN mbrap bit da bipai, 2 <<Na di tungwatu di ayaijo kikau bi e, atin ei mem gima agwam nok nikei mem minu ndig di mpung tut nihwen mun cig dima tu e? Ma ando nide nibon munti di igyai kou ningat nya bak.>>3 TUHAN Di Ninyeng Jei Bibor cuk da biditri tut nisokti dini bak minu ndig Yerusalem <<Njap nimbus angonti dideu kwei su. Lewo abon mun tunggwei nindig bibor tirigi ayai nimai bak ade timiei nya lene abindei ba, map kui nati tug hon gino akuk na bak kwar nya. 4 Ade niyaijoti mingwig hon didiyam. Ba, angon mui drek dip gi ayai nimai bak timiei nya tu ba, map kui jeti tug hon kwar di jibon bou jinda him. Gima rino disindui sut na ba, anok mun di ngkiai nya kin ide minu nya yahagom ikig bipa ndip nyen cem. 5 Minu ngkiai di ting nya kin gi dideu nya iba ighyet bicig na nyen drek dip ade ninjiriek dicukti kin didimigsi nya bijo kikau. 6 Nibou Israel nya yahagom iba ingon com yonti ide nisindemti ba, inok nihwen kep mun cig nya. 7 Ade timiei nya hi di kuk no bibit nide ndigpoi nihyet bi sren. Aris mun bak ngkiai nya lene agingondut kibom nya kin moibihi nya di icut ei mun di buhun tak yokti cem bi. 8 Abindei ba, map kui mpia di ikuk yok biDa eisi nya lene agiya hon nicukti tut Njap Nigwam Kep Ninghuisi cem bi. 9 Ade limwa nya bihi iris mun ei hiterti leu binhyepo ibindei ba, itug ndei nimai hak ug. Lene bihi ijoi sut igyem mikwau di ibui di ibikuk yok bak kwar nya ba, bihi bu ibrim ingkek tut nikrar kep sopti nya. 10 Bihi ibingon ipmem ndrim ingonti bigyem njita tut yok mem nijam di ingkek kan mun cem ba, 11 igyem njita tut hi nitnem kin ignyot bat nya kin ikinjoi di bon nipmem ter cem. 12 Ade limwa nya bihi isindui sut ba, hi ngot kep yok leu binhyepo ihwen nimbiam lene bihi inok adrom lene bihi ibrim mun di kei mem yonti leu yonti di mben gom cem. Yo dima yahagom ibbwe ser Da tu. Da di TUHAN Di Dinyeng Jei Bibor disimbot dat tu.
13 Noro nogindini diyok kep jide nipos mun cig nya kin nihwen nimbiam cig nya cem. 14 Tirigi Dikes hukum ei na dip bingwig leu lo, no abrim angkek ba, asindem mem gima akon anda yo e? Da di TUHAN Di Dinyeng Jei Bibor disimbot dat tu ba, diyai mun bipek kep mun di dipai ei su nya. 15 Midibindei ntek gimahap ade limwa nya yahagom bibong bidem minu ngkiai nya hagom bidibindei ba, abikes hon ade nibon munti di kinei bibor nya. 16 Mben hiter nya mighyet kinei sut na apino mijo nibreisi mem na bipia Dani ne TUHAN ri.>>
Hum di bindei ba, ingon kwes
17 Lene TUHAN pai bida, 18 <<Na di tungwatu di ayaijo kikau bi e, mben Israel dima igibon inyeng mem Da bi. Idem kep ngkimom-tembaga kin ngkimom-timah kin ngkimom nitu kin ngkimom-leben nikenti di hum yem bi tirigi tukan kwen perak bibindei ba, kwes kei. 19-20 Gima rino nogindini Da di TUHAN Di Dinyeng Jei Bibor dipai biyok bipia yoni idem kep ngkimom nitu nya di bon ninyeng bi. Dinduk yok bidem yam ei minu ndig Yerusalem ninggimau yon leu api dibindei bikwes kei tereu nok tukan di kes perak kin ngkimom-tembaga kin ngkimom nitu kin ngkimom-leben nimmun kin ngkimom leben nitiei nindak ei humti. Ditde nigga yokti mibindei jet yok noyam kin hum di bindei jet ngkimom nindak nya. 21 Igbit ri! Midinduk yok bidem yam ei minu ndig Yerusalem leu api midindig Ditde hum nigga yokti ei yeng behei bidibindei ba, ijet bingwig hak. 22 Ijet ningwig ei minu ndig Yerusalem noyam kin perak di ibindei jet bibor bikwes kei ei humti pimo. Apino yoni mikan tut bipia Da di TUHAN dikes Ditde niggati ei yok dip.>>
Nibou mben Israel ide sisar
23 TUHAN mbrap bit da hanyen bu bipai, 24 <<Na di tungwatu di ayaijo kikau bi e, apai bak mben Israel bipia map kui ide dihyeiti tu. Apino diba Ditde nigga biborti bikes hukum ei dip ug a. 25 Nibou mben Israelr idem kep singa di ttem mun di yem leu api yau nyen a. Igyai nimai bak limwa nya ba, ipos ndigban kin mun di inyeng tut nya cem leu yok lene ibindei ba, sop imang bibor iwer kibom cem. 26 Israel de imam nya itunggwei Ditde niggai serti nya lene ibindei ba, niromti rap mun di ikwas pijum tut Da nya cem. Igikwas mun di kwes kin mun di kinei bijo ter leu yam kan bi. Nok gima cem iba Ditde nidimig sutti bingginau limwa nya tut mun di pwoi kin mun di rom niter leu yamti bi. Ba, igiya hon Njap Nigwam Kep Ninghuisi nicukti nya cem bi. Tug hon nisinati dima ne mben Israel ingwes om kep Da. 27 Nibou mben Israel di inyeng tak kep limwa nya idem kep nsien bigbehei di briug-briug nyen mun di yem a. Ihwen mun mem ibinggok tut mun di kei mem yonti. 28 Nabi nya iku-ku nyen ide sisar dima yok ba, idem kep no di ba cet kapur bihwen ngug tig di nirom kuisi. Ide ningat-hi-ngat nya kin mun di itri tut nya hagom nitrowai he. Ipai ei yuhui him bipia nisokti di ipai sut nya ne nisokti di igyai leu TUHAN Di Ninyeng Jei Bibor rin lo, Dani digimbrap bit yok bi sren. 29 Yo di inyeng tut ndigban nya iris mun ba, ipos mun cem. Iba ide nisibutti biyai yo di yuhui mbum nya bipos mun di kei leu ngkiai nya mem yonti. 30 Dinggok no di dem mem gima win ngug tig kan kin gi ya ngkiem ser mpia di ngug tig tti leu su nya cem ei mben Israel ikieti mem gima ya ngkiem ser minu dima ei mpe di dibindei timek ide minu tug hon Ditde nigga bibor nikui mpiati. Noro digingat no dima ei mben Israel ikieti bi. 31 Gima rino nogindini dikes Ditde nigga biborti ei yok dip. Dinok hum ba, dibindei sar yoni drek dip ide nibon munti nya. Da di TUHAN Di Dinyeng Jei Disimbot dat tu.>>