TUHAN de singau simeda
21
1 Lene TUHAN pai bida, 2 <<Na di tungwatu di ayaijo kikau bi e, ma asigion minu ndig Yerusalem. Ma asigion mpia ngot di ikuk yo bak kwar nya eisi ei minu dip dima hagom. Ma asok kep mben Israel ba, 3 apai bipia Da di TUHAN dipai <Dani ne jide nitok ri. Midikus Ditde singau simeda ba, dibiyai nimai bak je di jisibut kin je di jisingat cem jahagom. 4 Midiba Ditde singau simeda bitot yahagom ei nite bei mpia nijjai kikau ug bipek kin mpia nibiho cem. 5 Leu api yahagom mikan tut bipia Da di TUHAN dikus Ditde singau simeda tu ba, midijus hanyen ei nahamti bi.>6 Na di tungwatu di ayaijo kikau bi e, ma ahara niwei-nidut ei mben Israel yoho bei tereu nok angon dahat ba, angon cut leu cem pimo. 7 Gino ihig ser na tut nggon rino ahara-hara nyen i? Lene ma apai biyok bipia angon ngguk tut nihyet di mikwei yo. Nihyet di mikwei yo dima mibiyai ingon digit kin inda jet cem ba, ibiau digit ba, ide mimbri mipren leu yok cem. Tto bou dem tu ba, dideu su. Da di TUHAN Di Dinyeng Jei disimbot dat tu.>>
8 Lene TUHAN pai bida, 9 <<Na di tungwatu di ayaijo kikau bi e, ma atri tut mun di mipek kep ei nidipti bu! Apai bak tungwatu nya bipia Da di TUHAN dipai,
<Singau simeda nipup gom di ibindei ba, nggwen-gwau tu no rinaha.
10 Isien binggwen-gwau leu binhyepo bindei mai ba, idip bidia-diau leu binhyepo njeng-jau nok kigyei di ninjeng srei. Ningon nggei-hi-nggeisi hi jo mem Ditde limwa nya bu bi. Lewo iba ingha bak nisok kepti nya kin hukum di itug ndei tu.
11 Singau simeda nggwen-gwau bijo hak ei mem no di mem ninghat tut leu api singau simeda dima jo ei mem nitot kep tungwatu cig nya.
12 Na di tungwatu di ayaijo kikau bi e, apim nggruet ba, abahara! Lewo singau simeda dima tin ei mem gima hwen Ditde limwa nya bidat Israel ide nibou di ibie tut yok nya bitut ide limwa nya titut yam leu api yahagom misar. Gima rino ma aba angon di ngguk bibor bittem angon him.
13 Lewo dibingon kikep Ditde limwa nya yo. Gino ikou sut ittin ser ide nibon munti nya lene mun dima yok hagom micut igkep yok.>
14 Na di tungwatu di ayaijo kikau bi e, ma atri tut mun di mipek kep ei nidipti bu. Ma attem anda ba, abitto singau simeda dima leu binhyepo kinyon ei niyai nimai bak tungwatuti. Singau simeda dima biyai ningon ttin biborti, 15 bindei ba, mimbri micut leu Ditde limwa nya hak apino indrat bicut hak ei dihyeisi. Diba singau simeda di njeng-jau di dem kep kigyei di ninjeng srei dima bijem kum minu ndig di ide mem gima dibihwen rin ba, singau simeda dima tin ei mem gima yai nimai bak timiei minu ndig nya. 16 Singau simeda di nggwen kei e, atot mun bei anda com kin anda prak cem. Abitot nima ug-nima ug bit leu angon kanti. 17 Dani cem midittem dinda leu api Ditde nigga biborti micut. Da di TUHAN disimbot dat tu.>>
Nibou ndig minu Babel de singau simeda
18 TUHAN mbrap bit da bipai, 19 <<Na di tungwatu di ayaijo kikau bi e, aba wa bindo puig can dima nibou ndig minu Babel mikwei sut nide singau simeda bimbut kak a. Suar puig can dima nitriti hacem mbut kwei leu minu gom. Atas biei sra gom hammi puig hati ba, abindo puig cin di ug ndam minu ndig cin dima. 20 Puig gi nigom bie ug ei mben Amon ide minu ndig nibousi Raba lene puig gi can bie ug ei minu ndig Yerusalem di bon tentara nibousi di igya coi nya. 21 Nibou ndig minu Babel kwei ya dideu biei sra di bindo puig cin dima leu binhyepo kan tut puig dima noni mbut kak a. Noni hara bak nide kwar di kuk no bak bindo igbit binoni lene bikrau nide tibor nya bikit-kit nyen cem ba, yok niyai kep mindhe di sindi ibui bibikuk yok bak ide nung nya nisingau a. 22 Leu api jo nibreisi bipia tibor di ba ninda com bikit bindo tut minu ndig Yerusalem! Gima ne mun di bindo bipia suar noni njei siceu ndam minu ndig dima bihwen. Noni cuk nide limwa nya mem gima imbos-hi-mbos ba, ighyet sra tut pran bicuk nide tentara nya mem gima idimig biei tou ndig di ipindur hammi Yerusalem de dimbou pmem mem gima ibinggek. Lene itig dihyei binjei keyam bikui sur ngug tig niya ndingti mem ibiyon ttai minu ndig ba, ibitig got di bikrop ttai cem. 23 Timiei minu ndig Yerusalem iba ingon com bipia tentara dima minjei siceu ndam yok bihwen yok bi lewo mben Babel kin yoni ikwam minggwen ser tu. Noro ade nipui sut mun di micut igkep yok bipingok ingonti leu binhyepo ikan tut bipia siceu nya mikat yok drek dip ide sisar di ibon nya. 24 Da di TUHAN Di Dinyeng Jei Bibor dipai bipia ide sisar di ibon nya jo nibreisi ba, tungwatu nya yahagom ikan tut bipia ibon mun tunggwei. Ide sisar jo nibreisi tug hon igyai munti nya. Tto bou dem mem gima itug ndei hukum. Midikes yok ei ide nitok nya indati.>>
25 Lene Da di TUHAN dipai bak nibou ndig Israel <<Nani ne nibou ndig di asibut rin ba, anjiriek dihyet! Tto bou mem ade hukum nipekti dideu su. 26 Da di TUHAN Di Dinyeng Jei Bibor disimbot dat tu. Akon ade topi nibou ndig ba, akes leu abou lene abikau minghas di abinggai abou cem hak leu abou a. Nogindini mun nyeng hagom luei nita tu. Akon nuhui mbum nya inyeng ba, ayai ninyeng jei biyok! Acut yo di inyeng jei leu ide ninyeng jeisi hak! 27 Midibindei timek minu ndig dini bibor. Apino miwer ig kum kroi tirima-tirima. Noro mun dima micut igkep yok bi bibou no di dimbus ei mem gima dibikes hukum ei minu ndig dini dip tau kwei ug e.>>
Singau simeda di mitot mben Amon
28 <<Na di tungwatu di ayaijo kikau bi e, ma atri tut mun di mipek kep ei nidipti bu! Apai bak mben Amon di ighyet wer mpiahi tut mben Israel bipia Da di TUHAN Di Dinyeng Jei dipai <Singau simeda nipup gom jo mem niyai nimai bak tungwatu nya. Hi sien singau simeda dima binjeng-jau nok kigyei di ninjeng srei leu binhyepo biyai nimai bak tungwatu nya. 29 Ningat-hi-ngat di jingat dima ne ningat-hi-ngat di nitrowai rin lene jide nimbot kep tut mun di mipek kep ei nidipti bu cem nisuglai he rin ba, jiris mun nitu he. Jisibut bibor ba, jinjiriek dihyet cem. Tto bou mem jide hukum nicut igkep jeti dideu su. Singau simeda dima mikos jikimam.
30 Je di mben Amon e, jijus jide singau simeda hanyen ei nahamti! Midimbus jingonti ei mpia di dipai tes je kin mpia di jisrek eisi cem. 31 Midikes Ditde niggati di cig-cai ei je dip lene midikes je ei nibindei sar mun cig nya indati. 32 Hum miyem je bijingwig. Jinggrom misiber ei jitimieisi hanyen. Hi di miyok ngon kep je bu bi sren. Da di TUHAN disimbot dat tu.> >>