Doia nibwos-bwos nyenti
19
1 Bit leu Allah nicuk dati ne dipai doia nibwos-bwos nyenti dini mem nibou ndig Israel ibou can di igya luei icig bat nya yohoti. Dibipai,2 <<Jipmem dem kep singa niwek di mipbor ngat dor njiriek singa nindigsi nya hagom. Noni bindei mahan nimien bat nya ei singa nikre di mimbri nya ikieti.
3 Noni ngginau nimien gom bipingok mem gima nggok mun di yem. Tirigi noni ndig binok singa di mahan lene ttem tungwatu binok nide mun di yem.
4 Ngkiai nya di imiap tut noni induk yam ei gom mem gima ikat noni. Iris bicut ei juiti leu api ikat bisima. Iba ngkimom nitu nikoisi bikri noni ug ei minu Mesir.
5 Nipmem mem kep ser nimunggwom nikwei hanyenti noro niyok ningon mem nikweisi pren bingwig. Leu api pingok nipmot hiter bu binok singa di niten-pos di mimbri kui ningkek.
6 Singa mien dima ndig bimahan lene bicom yam bit singa nindigsi nya bibingon tut ninggok mun di yemti binok singa di ttem tungwatu mem nide mun di yem.
7 Noni njei bihwen tentara nibousi di igya coi nya binggek bitut minu ndig nya cem. Timiei minu ndig nya dima inghuisi mpig sut mpe di imiap niyau-yau nyenti di bong mpiati.
8 Noro ngkiai di ibong gahai nya injei siceu bihwen noni kros leu nima kwei-nima kwei bicom ide jala kep bibikat noni. Iba ide jala bikat.
9 Ibindei coi noni ei brua nsi di bon kroba nimig ba, ikibou kep leu api ikri ug ei minu Babel buug ya ei nibou ndig noho bei. Igya ser noni bingkiem leu binhyepo niyau-yau nyenti mibong mpiati ei Israel de mbigdip nya bu bi.
10 Apmem dem kep ba anggur di nnum kei di hei ei biei anggur nghousi dideu minyei pmot. Noni hei binimeng nggrou bingat ningat mang bibor lewo mpia dima bon minyei nok gi dem.
11 Ninda di tug ninjem sindem ba, krop mem gima idahat bi. Ba, ninjem dem mem gima irop binok tom ninyeng tak kepti mem nibou ndig. Ninggrupti jo anai bibor ug bipek kin bumbuhui nijunti. Tungwatu nya yahagom inggap leu sut noni lewo jo anai bibor ba, nimeng nggrou cem.
12 Noro nigga kep mun cig nya yohom binjei ug ei dihyeisi. Hou mpia priti kuisi bibindei ba, ninjem di ngun-ngau mui hak. Ninda nya dahat bimui leu api indig kep hum.
13 Tini bu ne yoni ita noni ei iggum ndigsi di bon dihyei ningak-caisi di wer minyei bi.
14 Hum di dwim mpiati su nidwep bicig ninjem kin ninda kin ningat bikinei. Tini bu ne ninda sindem ba, dem mem gima igyai binok tom ninyeng tak kepti mem nibou ndig bu bi sren.
Gima ne doia nibwos-bwos nyenti di limwa nya ikon nyen kikau ri.>>