Yehezkiel 18

1 Lene TUHAN pai bida, 2 <<Nggon rino tungwatu nya ei minu Israel indat-ndat nyen nihyet nibiti ninda dini i?

3 Deheng bitug hon Danti di Allah di niyaijo kin TUHAN Di Dinyeng Jei Bibor cem dinyeng bipia ma je di mben Israel jindat kep nihyet nibiti nindati dima bu au. 4 Dinyeng tak kep bikwop tungwatu dihyeisi dini hagom igyaijoti bitut andigpoi nya kin imunggwom bat nya cem yahagom. No di bon sisar ne nongkom mitug ndei nimai drek dip.

5 Gino tungwagom niyaijoti kei bibor biningon kwes cem ningon sren cem no rinaha ba, 6 kuk no bak mben Israel ide kwar di ibon bou inda him biyem mikwau tug hon midut ei mpia di yo dima ikuk yok bak ide kwar nya eisi bi bicut tut hiter nitnem bi biyem njita tut sop di ningwak ntui bi ba, 7 ris ei tungwatu nyati binggimang ndiyok leu yok cem bi. Noro noni tug mun di bindo hanyen bak no di dahat mun nyeng hi leu noni bingondut yo di yuhui mbum biyai njita biyok cem yai sinsun bak no di nyeng tut sinsun hi bi cem. 8 Noni com mitiei bak tungwatu nya nok ningwam kin gi brim nibittemti leu yok bi. Noni mbres nonti leu sisar nyeng hagom. Gino tungwatu nya ighyet sror kui yam lene noni gwam nok nikei di ningon sren bikos tut mun di srou yok. 9 No dima bit dicuk noti nya biyok ngon kep diggai serti nya ba, nongkom he rino ningon sren binyohou nonti niyaisi cem. Da di TUHAN Di Dinyeng Jei Bibor disimbot dat tu.

10 Noro gino no dima yai nipmot di pos ndiyok leu tungwatu nya bihwen yok cem bita nibou ei niyai munti di mbuk bibor, 11 di nicig yai kep bi sren ba, noni yem mikwau tug hon midut ei mpia di tungwatu nya ikuk yok bak kwar nya eisi bicut tut hiter nitnem cem, 12 ris ei yo di yuhui mbum nyati cem nggimang ndiyok igkei cem tug mun di bindo hanyen bak no di dahat mun nyeng hi leu noni bi cem ba, ug cem kep mpia di yo di ingon tindur nya ipigig ser mem ide kwar di mpiei bibor nya bikuk no bak, 13 lene com mitiei bak tungwatu nya leu binhyepo iba hi bitem hanyen binoni e? No dima hek tut niyaisi e? E bi! Mun di mbuk bibor di noni bibon pima hagom bindei ba, noni mitug ndei nimai drek dip. Noni mibiang nide sisar nibuhunti bitug ndei nimai.

14 Mpaba no dini yai nipmot ba, nipmot ngat nicig nide sisar hagom brei bou niyai him noro yai bram niyai kepti dima bi. 15 Noro kuk no bak mben Israel ide kwar di ibon bou inda him cem bi. Yem mikwau tug hon midut ei mpia di yo dima ikuk yok bak ide kwar nya eisi cem bi bicut tut hiter nitnem cem bi, 16 bico kep tungwatu nya binggimang ndiyok leu yok cem bi. Noni tug mun di bindo hanyen bak no di dahat mun nyeng hi leu noni bingondut yo di yuhui mbum bikwas njita tut yok cem yai sinsun bak no di nyeng tut sinsun hi bi cem, 17 bimbres nonti leu sisar hagom lene com mitiei bak tungwatu nya nok ningwam kin gi brim nibittemti leu yok bi. Ningat ne no dima bit diggai serti nya biyok ngon kep dicukti nya. No dima mitug ndei nimai drek dip nicig nide sisar nya bi lewo noni hek tut niyaisi. 18 Noro nicig ris ei tungwatu nyati binggimang ndiyok leu yok cem mbuk tut yahagom igkei cem ba, no dima mitug ndei nimai drek dip sisar di bon nya.

19 Mpaba tungwagom hig simber Da <Nggon rino no dima tug midut drek dip nicig nide sisar nya bi i?> Lene midibuhup bipia nipmot singat ba, ningon sren cem. Noni ba ningon di gom bibit diggai serti nya. Gima rino noni hek tut niyaisi. 20 No di bon sisar nongkom he rino mitug ndei nimai drek dip. Nipmot mitug midut drek dip nicig de sisar bi ba, nicig cem mitug midut drek dip nipmot de sisar bi. No di ningon kwes mitug ndei mun di kei drek dip niyai munti di kei bibor nya. No di mbuk mitug midut drek dip niyai munti di kinei bibor nya.

21 Gino no di mbuk mbres nonti leu sisar bibit diggai serti nya ba, yai kep niyai munti di kei bibor kin gi igbit cem ne no dima mitug midut bi. 22 Midikos ser nide sisar hagom. Noni mehek tut niyaisi drek dip niyai munti di igbit. 23 Akan bipia Da di TUHAN Di Dinyeng Jei Bibor dingon llei sut gino no di mbuk tug midut e? Nok gima bi sren! Dingon llei sut gino noni ttin ser nide sisar behek tut niyaisi.

24 Gino no di ningon kwes kes hon ba, yai mun di igbit bu bi noro sindi ngkwei hanyen kep mun di mbuk bibor di mpiei bibor biyai bram yo di imbuk bibor nya igyai kepti nya ne no dima hek tut niyaisi e? E bi! Midiyok ngon kep niyai munti di kei bibor nya bu bi leu api noni miyai nimai drek dip ningon di gom bi kin nide sisar nya cem.

25 Mpaba hi pai <TUHAN niyai munti dima igbit bi.> Je di mben Israel e, ma jimiap kep dihyet. Jikan bipia diyai munti nya igbit bi e? Noro jiyai munti nya rino igbit bi a. 26 Gino no di ningon kwes kes hon ba, yai mun di igbit bu bi noro sindi ngkwei hanyen kep mun di mbuk bibor ne noni miyai nimai drek dip niyai munti di mbuk bibor nya. 27 Ne gino no di mbuk mbres nonti leu sisar leu api yai kep niyai munti di kei bibor di igbit cem ne noni hek tut niyaisi. 28 Ningon hukti tut niyai munti di mbuk leu api mbres nonti leu. Gima rino noni tug midut bi noro hek tut niyaisi. 29 Noro je di mben Israel jipai bipia TUHAN niyai munti dima igbit bi. Jikan bipia diyai munti nya igbit bi e? Noro jiyai munti nya rino igbit bi a.>>

30 TUHAN Di Ninyeng Jei Bibor pai <<He je di mben Israel e, midibuhup hanyen bije tut jiyai munti nya noyam kin nikei di ningon sren. Ma jittin ser jide sisar lene ma jisindui sut ba, jide sisar hwen je bijitimek bijingwig au. 31 Ma jimbres jenti leu jiyai munti di mbuk bibor di jita jibou eisi nya leu api jisindui sut ba, jingonti kin jikan-kan nyenti nok nijep bu. Nggon rino jingon llei sut gi jiyai nimai i? 32 Dingon llei sut gino tungwatu nya igyai nimai bi. Ma jittin ser jide sisar ba, jehek tut jiyaisi. Da di TUHAN Di Dinyeng Jei Bibor disimbot dat tu.>>