3
1 Allah pai bida <<Na di tungwatu di ayaijo kikau bi e, ma ayem srat kijum dini bingwig leu api aug mbrap bit mben Israel.>>2 Gima rino dahap diji leu api Noni yai srat kijum dima bida bidiyem. 3 Noni pai bida bu <<Na di tungwatu di ayaijo kikau bi e, ayem srat kijum dini di diyai bina hak ug. Apwoi srat kijum ei anghopti.>> Lene diyem srat dima bingwig lo, nyop bidem ahwei lon ningei ei dinsi.
4 Allah pai bida bu <<Na di tungwatu di ayaijo kikau bi e, ma aug ngat mben Israel ba, atri tut mun di disok ei na dip bak yoni. 5 Lewo dipinak na ndam mben di imbrap ighyet titer di buhun bibor bi. 6 Leu gino dipinak na ndam mben di isindem bibor nya di imbrap ighyet titer di buhun bibor di angon dorti tut bi ne yoni mingig itingou mem ahyet. 7 Noro mben Israel ikou sut gi imiap kep ahyet lewo jo nibreisi bipia inghek Da bingkek ndok bisrep tut Da cem igkei. 8 Nogindini midibindei ba, nani cem angkek ndok ba, ahyet prinder noyam kin yoni. 9 Midibindei ba, angon nddong kei noyam kin tig ba, anggwes bibor noyam kin tig permata intan cem. Ma adigit tut yo di yaham imbuk kep Da dima au.>>
10 Allah binut bu bipai <<Na di tungwatu di ayaijo kikau bi e, ma angig atingou mem dihyet ba, akan kep mun di disok ei na dip hagom. 11 Leu api ma aug ngat asut bat mben Israel di ibong ei ingkiaisi ba, atri tut mun di Da di TUHAN Di Dinyeng Jei Bibor disok ei na dip hagom biyok. Mpaba ingig itingou mem ahyet e, he bi e, dikan tut bi.>>
12 Leu api Allah Ninnei kon da kui lene dimiap nihyet gom ei dinghim dip di nok kru di cut bipai <<Ma jinggei sut TUHAN nikei-kau-keisi ei gwamti.>> 13 Dimiap kerub pima inyehei titem yam kin kroba nimig ninghau di sibui sindem bibor nibimbi noyam kin mun brim nibimbiti. 14 TUHAN de nisindemti coi kwei ei dingonti sindem bibor ba, Ninnei kon da bittei da apino dingon mpo-mpam ba, wam cem. 15 Leu api duug krau minu Tel Abib di mben Israel ibong ser ei ingkiaisi simiak Minyei Kebar. Dibong nyahan ei sirima mem mmun-njap muhwindacan lewo mun po dimiap bidingat bou diyai him cem pima hagom bindei ba, dibou ngwak sibui nindig bibor.
TUHAN ta Yehezkiel nok no di ya ser mben Israel
(Yeh. 33:1-9)
16 Njap muhwindacan ngwig leu lene TUHAN mbrap bit da, 17 bipai <<Na di tungwatu di ayaijo kikau bi e, midita nani nok no di ya ser mben Israel. Ma atri tut mun di disok ei na dip bak yoni. 18 Gino disok dihyet tut no di mbuk igkei ei nani dip bipia jei bi ne no dima mitug midut lo, asok kep no dima leu binhyepo noni ttin ser nide sisar biningwes ngun bi lene noni mimai ei nide sisarti noro suar abiang nimaisi nibuhunti hanyen. 19 Ne gino asok kep no di mbuk igkei tu noro noni ttin ser sisar bi apino noni mitug midut ei nide sisarti noro angwes ngun. Abiang nimaisi nibuhunti hanyen bi.
20 Gino no di ningon kwes-kwau sindi ngkwei hanyen ndam mun di mbuk bibor leu api disindui sut ba, mun di buhun cut igkep noni lo, asok kep noni bi lene noni mitug midut drek dip nide sisar. Midiyok ngon kep niyai munti di kei bibor nya pima bu bi noro suar abiang nimaisi nibuhunti hanyen. 21 Ne gino asok kep no di ningon kwes-kwau pima ser nhyema noni bon sisar bu au leu api noni bit ahyet bimbres nonti leu sisar dima lene midikes hukum ei noni dip bi leu api angwes ngun.>>
Yehezkiel hap niji noro mbrap kan bi
22 TUHAN ningat rin bit da ba, Nide nisindemti pijuk dingonti leu api Noni pai bida <<Ma akiju ba, ambut ug ei mbang briepti leu api midimbrap bit na ei gima jug.>>
23 Gima rino dijuk ug ei mbang briepti leu api dingat TUHAN de nikei-kau-keisi bou diyai him bit leu nok gi po dingat ei Minyei Kebar pima lene dikuk da bidiba dingwak bikik dihyei. 24 Noro TUHAN Ninnei coi kwei ei dingonti bibindei ba, dikiju bidiya pijum. TUHAN pai bida <<Ma angkwei hanyen ug ei ade ig ba, alit dimbou bingkiem. 25 Na di tungwatu di ayaijo kikau bi e, midiba kuk mbrei bingot amig-anda ser nhyepo ambut ug ei nisai ba, angat tungwatu nya bi. 26 Midibindei ba, adwe nggicai leu binhyepo bit bon asok kep yo di yaham imbuk kep Da kan bi. 27 Mpe dino dimbrap bit na hanyen bidibindei ba, ambrap hanyen bu lene suar atri tut mun di Da di TUHAN Di Dinyeng Jei Bibor disok ei na dip biyok. Mpe dima lene ibou poi mingig itingou mem ahyet noro nindigsi nya inghek na lewo jo nibreisi bipia inok mben di yaham imbuk kep Da.>>