SRAT NABI YEHEZKIEL
1. Yehezkiel sok kep mben Israel tut hukum di Allah mikes ei yok dip kin minu ndig Yerusalem di timek bingwig ei nidipti bu cem.2. TUHAN nihyet tut gima Noni migwam nok nikei bikes hukum ei mben dihyeisi dini dip drek dip gi ico kep Nide limwa nya bibindei ba, icut ei sisarti.3. Yehezkiel win kep mben Israel ingonti niabiati minu ndig Yerusalem timek bingwig leusi kin nipreu ei mem yokti tut nidipti bu mpe dino ibong kei igwam kei hanyen bu.4. Noni tri tut nide ningat-hi-ngat tut TUHAN De Ig kin nide limwa nya di TUHAN mipindi yok binok nijep bu.
Yehezkiel ba ningon com Allah nindig bibor bikan huk mun nyeng mang bibor cem. Noni tri tut ningat-hi-ngat di noni ngat bou niyai him mang bibor lene bindo nihyet dima brei bak mben Israel tug hon ningon-mingonti nya. Yehezkiel bidip huk nide limwa nya tut gima suar igyai ingon kin innei di nijep bu ba, bikwop tungwagom-gom buhup hanyen tut nonti nide sisar. Nok gima cem tri tut biyok bipia noni yok ningon mem gima TUHAN mipindi Nide limwa nya ba, ibong kei igwam kei hanyen bu. Noni yai ninyeng imam kin nabi cem bita nibou ei midyai TUHAN De Igti kin nipingok limwa nyati tut gima ibit TUHAN ningon kanti mem yok cem.
Nirop Ninda Ndigsi
Allah hig Yehezkiel nok nabi 1:1--3:27
Nisok kep minu ndig Yerusalemti tut hukum di micut igkep yok 4:1--24:27
Allah mikes hukum ei mben dihyeisi dini hagom dip 25:1--32:32
Allah de nipreu ei mem Nide limwa nyati 33:1--37:28
Nihyet tut hukum di micut igkep nibou ndig Gog 38:1--39:29
Ningat-hi-ngat tut TUHAN De Ig kin minu Israel ei nidipti bu 40:1--48:35
YEHEZKIEL NGAT NINGAT-HI-NGAT GI NIGOM TUT ALLAH
1:1--7:27
Allah de banggo mbrei
1
1 Ug ei hon njap gi nimuhwi ei bed gi nibitai mem ari bingwam gi ningot ningai lene da di Imam Yehezkiel di dicig ninyeng Busi dibong bit mben Yehuda ei ingkiaisi simiak Minyei Kebar ei minu Babel. Mpe dima lene dingat lo, mpia-bbed him kau leu api Allah ndo ningat-hi-ngat gom bida. 2 Mpe dima cem Nibou Ndig Yoyakhin sima ei ig bui nsi ei ningkiaisi mem ari bingwam muhwi tu. 3 Leu api TUHAN mbrap bit da ba, Nide nisindemti kui da tirigi dibong simiak Minyei Kebar ei minu Babel.4 Dikon dibou bidingat lo, hou di nimig ten bibor cut kwei leu nite bei mpia nijjai. Kigyei ninjeng cem srei ei bumbuhui ttou nindig gom bipiga digai mpia-bbed him di gahai nya hagom. Ba, mun di iba ngkimom-tembaga bibon di sieng kei jo hammi kigyei dima nibousi. 5 Dingat lo, kerub di niyaijo di noyam kin tungwatu nya ibou bitai ingat rin ei bumbuhui dima ninggimau. 6 Bikwop kerub dima yahagom ibon iimaisi bitai kin inyehei bitai. 7 Imig sieng kei noyam kin ngkimom-tembaga di tungwatu nya isien ba, itit imig bisren kei. Lene imig ndapijum bon nindungwak noyam kin sapi nikre ninjou a. 8 Ibon iimaisi bitai kin inyehei bitai lo, ibon inda nok tungwatu nya inda di jo bikwop inyehei behei nya. 9 Yahagom ikieng inyehei lene inyehei niyenti nya pek yam sindam ba, nghau bipek yam. Tirigi imbut ne inyehei niyenti nya pek yam kikau ba, imbutti cem ikiek yok bi noro imbut sren hak.
10 Iimaisi dima ter leu yam. Ibon iimaisi di nok tungwatu ei nibiho lene gi nok mindhe singa ei bei anda com lene gi nok sapi nikre ei bei anda prak lene gi nok hacam krubri ei bei ninghim dip. 11 Yahagom ikieng inyehei can bibikwop nok ba, niyenti nya pek yam ba, ikrop inyehei can kin bu bibinggai ingut. 12 Iba iimaisi nya birok nite hi nite hi kin nibiho kin nijjai hagom. Gima rino imbut sren tut yam hak lene gi hi kiek ningut nyen bi.
13 Lene mun di nok hum mbom kin hyem ninjeng di kit-kit nyen bijo kikau ei kerub dima ikieti. Hum dima jek-jek nyen bibindei ba, kigyei di ninjeng srei cut bitot-tot nyen. 14 Imba-mba nyen sindem noyam kin mpia di kieng.
15 Leu api ditou kep yok bidingat lo, mun di nok kroba nimig ninghau bitai jo ei dihyeisi simiak bikwop kerub dima yok yahagom. 16 Mun di nok kroba nimig ninghau dima hagom noyam ba, sieng-siau kei noyam kin tig permata ba, hagom bon kroba nimig ninghau gom kin bu di jo jiti ei ninggimau. 17 Leu binhyepo kroba nimig ninghau titut dima mimbut ndam nite hi nite hi kin nibiho kin nijjai hagom. 18 Kroba nimig ninghau dima hagom bon niyai mang bibor di jo bikwop nitta hagom. 19 Mpe dino kerub pima yok imbut-mbut nyen lene kroba nimig ninghau dima cem mbut-mbut nyen simin yok. Gino kerub nya ikui leu dihyei njek dip lene kroba nimig ninghau cem kui leu dihyei njek dip. 20 Kerub dima yok imbut-mbut nyen bit leu yonti ingon kanti leu api kroba nimig ninghau dima cem bit yok lewo kerub nya isindem tut. 21 Mpe dino kerub nya imbut bigya hak bikui ug ei mpia-bbed him cem lene kroba nimig ninghau cem bit-bit nyen yok.
22 Lene niban nindig krop gom nok kisina di jimjit bibor jo anai kerub nya ibou nggram him. 23 Kerub nya igya hak ei niban dima nibehei ba, ikieng inyehei can ba, niyenti nya pek yam lene ikrop inyehei can kin bu bibinggai ingut. 24 Tirigi imba-mba nyen lene inyehei titem. Dimiap lo, nibimbiti noyam kin muk di tti nindig bibor kin tentara nindig bibor di imbut binok Allah Di Sindem Bibor nihyet cem. Tirigi idwop juk bigya ei dihyeisi lene ikrop inyehei. 25 Noro nibimbi gom jo ninno ba, tibim kwei leu niban di jo anai ibou nggram him dip.
26 Lene dingat mun di iba tig permata nilam bibon nok banggo mbrei di jo anai niban dip ba, mun di nok tungwatu gwam dip. 27 Ninjek hu kwei piga mpia kei dem kep nok ngkimom-tembaga di ikwen ba, jet ei humti. Lene nibehei mu kwei bon nipigati di piga kei. 28 Mun dima bon nisieng hi gom hi gom di noyam kin pwet. Nipigati di jimjit dima ndo tut TUHAN di ningat rin ei sirima.
Allah hig Yehezkiel nok nabi
Tirigi dingat gini bou diyai him lene dikuk da bidiba dingwak bikik dihyei. Lene nihyet gom hig da,