Yeremia pai kep Nabi Hananya
28
1 Ari bingwam dima cemi mem bed gi nimuhwi ei ari bingwam gi nibitai di Nibou Ndig Zedekia ninyeng tak kep minu Yehuda lene nabi Hananya di Azur nipmot di nitimieisi leu minu ndig Gibeon mbrap bit da ei TUHAN De Ig. Noni pai bida ei imam nya kin limwa nya yoho bei, 2 TUHAN Di Sindem Bibor di Allah Israel pai <<Dicut nibou ndig minu Babel nide nisindemti tu. 3 Ba, midingkwei ndigban di Nibou Ndig Nebukadnezar kon leu Ditde Ig buug sut ei minu Babel hanyen kwei mem nijam ari bingwam can bu. 4 Midingkwei Yoyakhin di Yoyakim nipmot di nok nibou ndig mem minu Yehuda bitut limwa Yehuda di ikri yok ug ei minu Babel nya cem yahagom hanyen kwei ri. Dipai nijit bipia midicut minu Babel de nisindemti. Da di TUHAN disimbot dat tu.>>5 Leu api dipai hak bak Hananya ei imam nya kin limwa nya di igya ei TUHAN De Ig dima yoho bei, 6 <<Kei bibor! Handei kon ba, ahyet di atri tut dima mipek kep hak ug ba, TUHAN ngkwei ndigban di ipos leu TUHAN De Ig hagom hanyen kwei leu minu Babel bitut yo di isima ei ingkiaisi ei minu dima yahagom hak ug. 7 Noro na di Hananya kin je di limwa nya jahagom e, ma jingig jitingou mem dihyet. 8 Nabi di igyaijo nipou tirigi nijam di nyeni igyaijo eisi dini bigyo itri tut bipia pran kin mun di buhun bibor kin nsuwer ajar micut igkep mben imang bibor kin ninyeng tak kepti di sindem bibor nya cem. 9 Noro limwa nya ibit nabi di mbot kep tut nibong kei nigwam keisi nihyet bipai sut noni ne nabi di nijit di TUHAN pinak kwei rin gino nimbot kepti dima pek kep bijo nibreisi mem yok he.>>
10 Leu api Hananya brim biei koisi di dibisrou dinggibi dip pima bidahat, 11 bipai hak ei limwa di idem yam ei dima yahagom yoho bei <<TUHAN pai bipia Noni midahat biei koisi di Nibou Ndig Nebukadnezar bisrou mben yahagom inggibi dip noyam kin biei dini. TUHAN mibon mun dima ei nijam ari bingwam can dini.>> Noni pai nok leu lene dimbut.
12 Mun dima pek kep mem da leu api njap poi ser lene TUHAN cuk da ba, 13 duug ngat Hananya bidipai bak bipia Tuhan pai <<Mbro nok gino adahat biei koisi dima lo, midiba ngkimom nitu biluei bu. 14 TUHAN Di Sindem Bibor di Allah Israel pai bipia Noni miba ngkimom nitu nikoisi bisrou ngkiai nya dini hagom inggibi dip apino yoom yok binok awak mem Nebukadnezar di nok nibou ndig mem minu Babel. TUHAN pai bipia mindhe-ndhe di niten-pos nya cem mikuk yok bak Nebukadnezar ba, ninyeng tak kep yok.>>
15 Dindat kep nihyet hagom bak Hananya leu api dipai bu <<Hananya e, angig atingou mem dihyet! TUHAN gipinak na kwei bi. Abindei ba, mben dini yok iba ingon com nihyet nisuglaisi he. 16 Gima rino TUHAN Nonti pai bipia Noni micok tut nani leu dihyei ninjek dip leu api ma amai ei ari bingwam dini drek dip gi acuk mben dini yok ba, yaham imbuk kep TUHAN.>>
17 Lene Hananya mai hak ei bed gi nimbimuhwindacan ei ari bingwam dima.