Yeremia kes biei di iprion ei sapi ninggibi dip gom ei nonti ninggibi dip
27
1 Tirigi Zedekia di Yosia nipmot kui bigwam nok nibou ndig mem minu Yehuda ei nijam di jei bigyo lene TUHAN cuk da, 2 bidiba mindhe ngkek kin biei koisi bibon biei mem gima dibisrou dinggibi dip. 3 Lene Noni cuk da mem gima ditri tut nisokti bak nibou ndig minu Edom kin Moab kin Amon kin Tirus kin Sidon nya tug hon ide nibou niya hacanti di ipinak kwei ei minu ndig Yerusalem ba, imbrap bit Nibou Ndig Zedekia. 4 Suar dipai biyok bipia TUHAN Di Sindem Bibor di Allah Israel pai, 5 <<Diba Ditde nisindem biborti kin dinda di sindem bibor bipai tes dihyeisi dini kin tungwatu nya kin mindhe-ndhe nya hagom. Diyai gima yok hagom bak no di didimig ei bit leu dingon kanti. 6 Dani rino dikes ngkiai nya dini yok hagom ei Ditde awak di Nebukadnezar dinok Nibou Ndig mem minu Babel ninda nsi ba, dibikes mindhe-ndhe di niten-pos nya cem ei ninda nsi bininyeng tak kep. 7 Ngkiai nya yahagom miyoom yonti binok awak mem noni kin nipmot kin nignyon kikau ug bipek mpe dino nide ninyeng tak kepti bicut kep. Leu api mben Babel miyoom yonti binok awak mem mben di isindem bibor nya kin nibou ndig di inyeng jei bibor nya.8 Gino ngkiai nya hi kin nibou ndig hi miyoom yok bak Nebukadnezar bi lene midiba pran kin ninggum kin nsuwer ajar bikes hukum ei yok dip kikau bibou mben dima yoom yok bak ug e. 9 Ma jimiap kep nabi nya kin tungwa hi dino cuon ser je leu binhyepo joom je bak mben Babel bi nya au. Mbro nok gino ipai sut yonti bipia igyai bindo tug hon mumpriem nya kin njungwes di ingat ei igyai him bi nya kin gi iba mimbrei biris mun bou jiyai him nya lo, ma jiyok ngon kep ighyet au. 10 Yo dima iris mun bije bibindei ba, siceu nya mikri je ug ei minu ting leu jitimieisi. Midijji je leu jide minu bidibindei ba, jisar. 11 Noro ngkiai nya di icut bak nibou ndig minu Babel biyoom yonti nok awak mem noni lene midisindui sut yo dima ba, ibong ei itimieisi bigyai ide miai nya. Da di TUHAN disimbot dat tu.>>
12 Da di Yeremia ditri tut nihyet dima yok hagom bak Zedekia di nok nibou ndig mem minu Yehuda cem bidipai bak <<Ma akes nanti ei nibou ndig minu Babel nindati hak ug ba, anok awak mem noni kin nide limwa nya apino na di nibou ndig angwes ngun. 13 TUHAN simbot dat bipia bikwop ngkiai nya di yoom yonti bak nibou ndig minu Babel bi lene imai tug hon pran kin ninggum kin nsuwer ajar. Nggon rima na di anyeng jei kin limwa ade nya jimai tug hon mun di buhun bibor dima yok i? 14 Ma amiap kep nabi di icuon na leu gima aom nanti bak nibou ndig minu Babel bi nya ighyet au. Lewo nabi dima yok iris mun bak na di anyeng jei. 15 Nabi dima yok ipai bipia ide nicuon nati dima tug hon TUHAN ninyeng noro ibicum. TUHAN Nonti pai bipia Noni pinak yok kwei bi. Gima rino Noni mibindei ntek gimahap na di anyeng jei kin nabi di iris mun bina cem ba, bindei sar jahagom.>>
16 Leu api dipai bak imam nya kin limwa nya yahagom TUHAN pai <<Ma jimiap kep nabi nya di ipai bipia jei bi ne mben Babel mipian ndigban di jo ei Ditde Ig hanyen kwei rin au. Nabi dima yok ibicum. 17 Ma jimiap kep ighyet au! Ma jikes jenti ei nibou ndig minu Babel ninda nsi hak ug leu binhyepo jingwes ngun. Nggon rino jibindei ba, minu ndig dini micut binok ig kum kroi i? 18 Gino yoni ne nabi di nijit di igyai nisokti dima leu Dani rin lene nnaba yahara bak Da di TUHAN Di Disindem Bibor leu binhyepo dibindei ba, siceu nya ipos ndigban nya niken di jo ei Ditde Ig kin nibou ndig de ig ei minu ndig Yerusalem bittei ug ei minu Babel au. 19 Lewo Da di TUHAN Di Disindem Bibor dipai bipia ndigban di jo ei Ditde Ig yo rino cou dihim nya kin bokor di iba ngkimom-tembaga bibon kin kroba nitu nya kin ndigban hiter poi bu di didimig ei mem Ditde Ig nya cem no jo yo.>> ( 20 Mpe di po Nibou Ndig Nebukadnezar nya ikat Yoyakhin di Yoyakim nipmot di nibou ndig minu Yehuda kin timiei minu Yehuda kin nibou minu ndig Yerusalem nya di ikri yahagom ug ei minu Babel pima ne igipos ndigban dima yok bittei ug ei minu Babel bi.) 21 Ma jimiap kep mun di Da di TUHAN Di Disindem Bibor di Allah Israel dikos tut tu. Tut ndigban di jo ei Ditde Ig kin gi jo ei nibou ndig minu Yehuda de ig kin gi jo ei minu ndig Yerusalem ne, 22 mben Babel mipos hagom bittei ug ei minu Babel bijo kikau ei minu dima bibou dingig diyai kep hanyen ug e. Mpe dima lene midittei hagom hanyen leu minu Babel kwei ei mpia dini. Da di TUHAN disimbot dat tu.