Hukum di micut igkep timiei Yehuda nya drek dip ide sisar
17
1 TUHAN pai <<Je di timiei Yehuda e, jikilis kep jide sisar ei jingonti kin jide nimbar hum dok nuhuisi nya dem kep nok no di ba buk nika di ba ngkimom nitu bibon bicim tig permata intan ei niyenti. 2 Limwa jide nya ikuk yok bak nimbar hum dok kin cou dihim nya di itas mem gima ibikuk yok bak Kwar Sop Asyera cem. Mun dima jo bidem biei di nimeng nggrou nibehei hagom kin mbigdip ninggram him hagom, 3 kin nungug dip di jo ttai jide minu ndig nya cem. Midibindei ba, jide siceu nya migya kep jide ndigban kin mun di jinyeng tut nya hagom bimbut tut leu je drek dip gi jiwin mpia di mem jikuk je bak kwar nya eisi bidem jide minu nisurti-nipekti lene drek dip sisar nyeng hagom di jibon nya cem. 4 Suar jikes jidihyei di diyai bije ei leu api dibindei ba, joom jenti nok awak mem jide siceu nya ei jingkiaisi di jingat bou jiyai him bigyo. Gima hagom nok lewo digga biborti dem kep hum di sror di bit bon hi mu kep kan bi.>>Ningginausi hi gom hi gom
5 TUHAN pai <<Disigion no di kes Da di nide TUHAN ei leu ba, ba ningon com tungwatu di mipror yon nya kin yonti ide nisindemti nya.
6 No dima dem kep biei mon di hei ei ningoi-ngati kin iggum ndigsi cem kin ha ngunti di wer nsim bousi cem ba, mun nyeng di kei hi pek kep mem noni bi sren.
7 Noro midinjei mun di kei bijo ninno bak no di ba ningon com Da.
8 Noni dem kep nok biei ndig di hei simin minyei pmem di biam ba, nigau huk kikau ug bipek kin minyei ngeisi. Noni ttin tut ngei-ndung bi. Nimeng ngun-ngau bijo kikau. Mbro nok gino ngei-ndung tot nide minu bibindei ba, hagom mui bingwig lo, ningon giku no tut bi lewo ngat ningat bijo kikau.
9 Tou riningon dorti tut mun di jo ningon bei i? Ningon ki tut niris mun igkeisi dor njiriek mun nyeng hagom ba, ninggwenti buhun bibor.
10 Da di TUHAN rino diput ser tungwatu ingonti nya. Dibingon mun di jo ingon bei cem. Dibirop bak tungwatu nya bit leu igyaijoti. Dibibon yoni bit leu igyai munti di igyai kep nya.>>
11 No di ba ningon di sren bi bitug ndei ndigban noyam kin ha di bong kep ha hiter nidinggwei. Nide njap ug ei nahacanti he apino nide ndigban di nyeng tut nya sar ningwig leu no. Mpe di nide njap ngwig hon lene mijo nibreisi bipia ningon mbum bibor.
12 Ide TUHAN De Ig dem kep nibou ndig de banggo mbrei di dia-diau kei di iwin ei nungug dip di anai habiei nimbie him kwei su.
13 TUHAN e, Ade limwa di mben Israel iba ingon com Nani. Yo di iba inghim bak Nani yahagom migwam nimmaiti. Hi mingat yok ei dihyeisi dini bu bi lewo yuug ei minu nimai nya ide leu su. TUHAN e, Nani ne minyei niyaijo nibousi di yo dima ikes ei su ri.
Yeremia hara TUHAN mem gima mpu noni
14 TUHAN e, ma angget da leu binhyepo dikei hanyen. Ateu da bidingwes ngun. Dikon Nangkom he anyeng bijo nai! 15 Ditde limwa nya ipai bida <<TUHAN ningon kanti di bihwen bit nye pima ritou i? Nnaba Noni bindei mbut ningon kanti di bihwen bit nye dima nogindini hak ug!>> 16 Noro TUHAN e, dibidip huk Na tut gima akes hukum kwei ei yok dip bi sren yo. Dijoi sut gima itug ndei mun di buhun bibor cem bi. TUHAN e, akan tut gini ba, akan tut mun di tibim ei duhui him. 17 Mpe dino mun di buhun bibor cut lene Nani ne mpia di dinang coi ri. Gima rino ma abon Nanti nok mun di biyai ningon di ttin bida au. 18 Handei kon ba, ayai nimmai bak yo di yuhuk-huk nyen da bico kep da. Abindei ba, ingon ttin bibor. Noro TUHAN e, ma ayai nok gima tut dani au. Akes mun di buhun bibor ei yok dip bibou isar bingwig hak ug e.
Ningginausi tut Njap Nigwam Kep Ninghuisi
19 TUHAN pai bida <<Yeremia e, aug ei Dimbou Pmem Limwa Nya di nibou ndig minu Yehuda nya icoi-coi nyen kak nuhui ei minu ndig dini ba, aug ei dimbou pmem gi nindigsi nya hagom nuhui ei minu ndig Yerusalem cem. 20 Atri tut Ditde nisok kep yokti bak nibou ndig nya kin timiei Yehuda nya bitut timiei minu ndig Yerusalem nya yahagom di icoi-coi nyen kak dimbou pmem dima yok. 21 Apai biyok <Gino jikou sut gima jitug ndei nimai lene ma jikon ndigban jide bijimbut tut mem Njap Nigwam Kep Ninghuisi au. Ma jikon ndigban jide ba, jibicoi kak dimbou pmem nya ei minu ndig Yerusalem mem Njap Nigwam Kep Ninghuisi cem au. 22 Ma jiyai midyai cem jittei ndigban nyeng gom cem ba, jibehei sut leu jide ig mem Njap Nigwam Kep Ninghuisi au. Ma jidimig njap dima pijum ei mem Da bit leu nok gi dicuk jidigup bat-jidigai bat nya. 23 Noro jidigup bat-jidigai bat nya imiap kep dihyet ba, yahati tut Ditde nicuk yokti dima cem bi. Ingkek ndok ba, ikou sut gima ibit dihyet cem ikou sut Ditde nipingok yokti cem.
24 Ma jibit Ditde nicuk jeti nya hagom. Ma jikon ndigban nyeng gom cem mem Njap Ningwam Kep Ninghuisi ba, jibicoi kak dimbou pmem kwei ei minu ndig dini cem au. Ma jidimig Njap Nigwam Kep Ninghuisi pijum hak ei mem Da lene ma jiyai midyai nyeng gom mem njap dima au. 25 Gino jibindei mbut Ditde nicuk jeti dima yok hagom mungkun kei lene nibou ndig nya kin yo di igya kui yok nya noyam kin Daud ba, icoi kak dimbou pmem nya kwei ei minu ndig Yerusalem. Mpe dima lene yoni migya tut timiei Yehuda kin timiei minu ndig Yerusalem nya bikrau kroba di kuda kri bimbut tut yok kwei ba, minu ndig Yerusalem mpung tut tungwatu nya kin ighyet di bong yam dip. 26 Tungwatu nya mikwei leu minu ndig ngot di jo ei minu Yehuda kin minu mien ngot di jo ttai minu ndig Yerusalem kin keret Benyamin ide hanjop kin mbigdip nimig kin nungug him kin minu Yehuda nite bei mpia nibiho cem kwei. Ba, ijem ide mindhe-ndhe mem nibon midut nindig mindhe titut kep humti kin mindhe-ndhe nindigsi nya cem kwei ei Ditde Ig. Lene ibittei munkwas gandum ngan kin biei nggrai di ui-gwang kei kin munkwas nibijem sigyoti cem. 27 Mun dima yok hagom mimbut bipek kep mem je gino jibit dihyet ba, jidimig Njap Nigwam Kep Ninghuisi pijum ei mem Da. Ma jikon ndigban nyeng gom mem njap dima ba, jibicoi kak dimbou pmem kwei ei minu ndig Yerusalem au. Gino jitunggwei Ditde nicukti dima yok ne midindig dimbou pmem minu ndig Yerusalem nya kin ig nibou ndig nya hagom bitimek bingwig hak. Bit bon jimu hum dima kan bi.> >>