TUHAN ningon kanti mem Yeremia
16
1 TUHAN mbrap bit da hanyen bipai, 2 <<Ma awak atnem ba, ayai munggwom ei mpia dini au. 3 Midipai bina tut mun di micut igkep munggwom di isrek ei mpia dini kin ide ndigpoi nya cem yo. 4 Ninggwen di buhun bibor mihwen yok bimai ba, imai nimbiam ei pranti cem imai ninggum cem. Tungwa hi dima pim tut yok ba, tig yok cem bi. Ingut jo sinsiou ei dihyei ninjek dip bidem kep mun di kroi di hwen dihyei ba, inok mun di ha nya kin mindhe di niten-pos nya igyem.5 Yeremia e, ma acoi ug ei yo di ipim di ibikiek nimai ide ig au. Lene ma apim tut nimai bit yok au. Dinjei mun di kei bak Ditde limwa nya tug hon nibong kei nigwam keisi bi ba, dingon nggriu sut yok bidingondut yok cem bu bi. 6 Yo di inyeng kin yo di yuhui mbum mimai ei minu dini noro tungwa hi dima mitig yok bipim tut yok cem bi. Tungwahi dima yai nibok binonti ba, kak nibou nta leu cem nok bindo tut ningon di ngguk tut yok bi sren. 7 Tungwa hi dima migwam ser yo di ingon ngguk pima ingon ba, ngei njita mem yok cem bi. Tungwa hi miningon ngguk bit yo di icig kin ipmem imai leu yok cem bi.
8 Ma acoi ug ei yo di ibon pesta ide ig au. Ma ayem njita ba, adut ndia ngei bit yok au. 9 Ma amiap kep mun di Da di TUHAN Di Disindem Bibor di Allah Israel dipai bina. Midibindei ntus ningon nggei-hi-nggeisi kin ningon lleisi bitut pesta ninggei ngwig sut niwak yamti nya hagom. Yo di igyaijo ei nijam di ayaijo eisi dini mingat mun dima yok hagom bou igyai him.
10 Gino atri tut mun dini yok hagom biyok lene mpaba mihig ser nani tut nggon rino dikes hukum di buhun bibor dima ei yok dip i? Yoni mihig ser bipia igyai mun tunggwei bibon sisar mindei tut Da di ide TUHAN Allah cem i? 11 Lene ma apai biyok bipia Da di TUHAN disimbot dat <Jidigup bat-jidigai bat nya iba inghim biDa. Leu api ikuk yok bak ngkiai nya ide nung nya cem. Iba ikou yai Dani ba, igibit Ditde nidimig sutti nya cem bi. 12 Noro tut jeni ne jibon munti kinei bibor bidor njiriek yok. Jingkek ndok ba, jibit jingon kanti di kinei bibor. Jigibit dihyet bi. 13 Gima rino midicok tut je leu minu dini bidicom je ug ei jingkiaisi di jeni kin jidigup bat-jidigai bat nya jingat bou jiyai him bigyo. Mijikuk je bak mbrei nya ide nung nya mem mmun-njap ei minu dima noro midingondut je bi.> >>
TUHAN de limwa nya mingkwei hanyen leu ingkiaisi
14 TUHAN pai <<Ei nijam gi nidipti bu lene tungwatu yeheng bitug hon Da di Allah di diyaijo di dibuwak mben Israel kwei leu minu Mesir bu bi. 15 Noro yeheng bitug hon Da di Allah di diyaijo di dibuwak yok kwei leu minu gom ei nite bei mpia nijjai kin minu nindigsi nya di dibindei bintek gimahap ug eisi nya hagom. Midibuwak yok hanyen kwei ei idihyei di dikes bak idigup bat-idigai bat nya nipou su.>>
TUHAN mikes hukum ei Nide limwa nya dip
16 TUHAN pai <<Dihig nipos kep wau cig nya imang-mang kwei leu binhyepo ipos yo dini. Leu api midijem ningim kan cig nya imang-mang kwei mem gima yuhuk bram yok ug ei bikwop nungug dip kin nungug tou nya kin hak mihyeti di jo nungug tig nya sindam. 17 Dingat mun nyeng hagom di ibon nya bou diyai him. Hi di jo nding leu Da bi. Dingat ide sisar nya tu. 18 Midiba hukum mbican bram yam bibuhup biyok drek dip ide sisar kin ide nibon mun di kinei biborti lewo ibindei ba, map kui Ditde minu dini tug hon kwar mang bibor tu. Ninnei jo kwar dimati bi noro hagom noyam kin nimai ngut.>>
Yeremia pai brei sut nide niba ningon com TUHANti
19 TUHAN e, Nani rino anyohou da. Ayai nisindemti bida ba, ampu da mem nijam di mun di buhun cut igkep da cem. Ngkiai nya di ikwei leu dihyei nohon keti mikwei ngat Na bipai <<Nidigup bat-nidigai bat nya ide kwar nya ibon inyeng bi bibor. 20 Bon tungwatu hi heu kwar di nonti kuk no bak e? Nok gima bi sren! Ningat ne mun di bon dima ne Allah nijit rin bi.>>
21 TUHAN pai <<Gima rino midingginau ngkiai nya leu binhyepo ikan tut Ditde nisindemti bigyok ngon kep bijo ninno-bijo kikau bipia Dani ne TUHAN ri.>>