SRAT NABI YEREMIA
1. Yeremia tri tut mun di micut igkep timiei Yehuda nya kin ide nibou nya mem nijam di Nibou Ndig Yosia kin Yoyakim kin Yoyakhin kin Zedekia yahagom inyeng tak kep ide limwa nya.2. Barukh di Yeremia de sekertaris pas kep tut mun di mipek kep ei nidipti di Yeremia tri tut biyok kin mun di bon ninyeng di mipek kep mem Yeremia cem ei srat gomti.3. Yeremia tri nihyet tut TUHAN ningon kanti mem mben dihyeisi dini hagom.4. Nindat kepti tut minu ndig Yerusalem di tug ndei nitimek bingwigsi kin timiei Yehuda nya di yuug sima ei ingkiaisi.
Yeremia ningkek nggriu sut nide limwa nya bingondut yok nindig bibor. Noni ba nikou bitri tut hukum di micut igkep yok biyok. Noni ba ningon bisrip hukti bipas tut ayat mang bibor di pai sut ninghuisi wei di cut igkep noni drek dip Allah nidimig noni ei nok nabiti. TUHAN nihyet nok hum di cig-cai ei ningonti ba, bit bon noni mu hum dima kan bi. Suar noni tri tut nihyet dima bak nide limwa nya.
Ayat di bon ninyeng ei srat dini pai sut nijam di nidipti bu di TUHAN ndo ei mem yok. Ei nijam dima ne Allah kin Nide limwa nya miba nipreu di nijep bu bipreu ei mem yam. Mpe dima lene yoni mikrau kep nipreu ei mem yamti dima apino isuar ide guru hi di mipus kiek yok tut bu bi. Lewo TUHAN mipas Nide nipreu ei mem yamti dima ei ingonti (31:31-34).
Nirop Ninda Ndigsi
Allah hig Yeremia 1:1-19
Nide nitri tut nihyetti mem nijam di Yosia kin Yoyakim kin Yoyakhin kin Zedekia inyeng tak kep timiei Yehuda nya 2:1--25:38
Mun di pek kep mem Yeremia nonti 26:1--45:5
Noni tri tut Allah nihyet mem mben dihyeisi dini 46:1--51:64
Yerusalem nitimek bingwigsi 52:1-34
TUHAN nimbrap kep bit Yeremiati
1
1 Srat dini pai sut Yeremia nihyet. Nicig rino Imam Hilkia di bong ei minu ndig Anatot ei hanjop Benyamin. 2 TUHAN mbrap bit Yeremia mem nijam di Yosia di Amon nipmot nok nibou ndig mem minu Yehuda ba, ninyeng tak kep limwa nya ei ari bingwam simnaibrimigningai su. 3 TUHAN cuk noni mbirimang mem nijam di Yoyakim di Yosia nipmot ya luei nohoti nok nibou ndig kikau ug bipek nijam di Zedekia di Yosia nipmot nok nibou ndig mem ari bingwam simnaibrimiggom tu. Noro ide siceu nya ikat timiei minu ndig Yerusalem nya ug ei ingkiaisi mem bed nimuhwi ei ari bingwam nisimnaibrimiggom dima.TUHAN dimig Yeremia
4 TUHAN pai bida, 5 <<Nipou tirigi dipai tes na ei apmem ninghopti ba, noni srek tut na bigyo lene didimig na bidikon anyeng nok nabi mem mben dihyeisi dini hagom.>>
6 Lene dibuhup <<Na di TUHAN Di Anyeng Jei Bibor e, diji nggan bi lewo dimahan bigyo.>>
7 Noro TUHAN buhup <<Ma apai sut nanti bipia amahan bigyo nok au. Gino dipinak na ndam tungwatu nya lene ma ambut hak ug ba, atri tut nihyet di disok ei nani dip hagom biyok. 8 Ma attin tut yok au. Midingat rin bit na leu binhyepo dinyohou na. Da di TUHAN disimbot dat tu!>>
9 Gima ngwig lene TUHAN su ninda bingget duhui ngkek lene pai bida <<Ma amiap kep dihyet lene ma atri tut hagom hanyen bak tungwatu nya. 10 Njap di ammani dipinak na leu binhyepo aba ahyet buhun bisok kep mben dihyeisi dini kin ninyeng tak kep limwa nyati hagom. Aba ahyet buhun dima bisrep tut nibou ndig nya ba, abinggek tut inyeng di tak kep ide limwa nya bingwig cem. Abindei sar yok cem leu api awin minu jep ba, ayai miai cem.>>
Yeremia ngat-hi-ngat bingat mun nyeng can
11 TUHAN hig ser da <<Yeremia e, angat mindei i?>>
Dibuhup <<Dingat biei badam ninda gom.>>
12 Lene Noni pai bida <<Igbit ri. Ditou kep dihyeisi mu leu binhyepo dihyet di disok ei na dip mipek kep mem tungwatu nya.>>
13 TUHAN hig ser da mbigom kin bu <<Angat mindei bu i?>>
Dibuhup <<Dingat yeng di kiak ei nite bei mpia nijjai lo, mbigom kin bu ne yeng dima mitti ba, nirai com gau kwei ndam da.>>
14 TUHAN pai bida <<Nirai dima bindo tut mun di buhun di mikwei leu nite bei mpia nijjai dima bindei sar timiei minu dini yahagom ri. 15 Midipinak ngkiai nya di ibong ei nite bei mpia nijjai nya yahagom kwei leu api inyeng mitak kep minu ndig Yerusalem. Yoni minggek ngug tig kin dimbou pmem nya ei minu ndig dini kin minu ndig nindigsi ei minu Yehuda hagom cem bingwig. 16 Midikes hukum ei Ditde limwa nya dip drek dip ide sisar. Yoni iba inghim bak Dani ba, ibon midut bak nung di ikuk yok bak cem ibon kwar bou inda him bikuk yok bak cem tu. 17 Yeremia e, ma atin ei! Aug ngat yok ba, atri tut dicuk nati nya hagom biyok. Ma attin tut yok au. Leu binhyepo dibindei ba, attin yok nindig bibor bu tirigi aya ei yoho bei bi. 18-19 Amiap e! Timiei minu dini bitut nibou ndig nya kin yo di igya kui noni kin imam nya kin ide limwa nya mite tut nani. Noro njap di ammani dibindei ba, anok minu ndig di bon tentara nibousi kin cou nipmem ngkimom nitu kin ngug ngkimom-tembaga. Bit bon ibindei cut nani kan bi lewo midingat rin bit na bidiya srak ko hagau na cem. Da di TUHAN disimbot dat tu.>>