Minu Moab sindem biyai no nyen kan bi
16
1 Mben Moab ipinak domba pmot kwei leu minu ndig Sela ei iggum ndigsi nok munkwas di injei bak nibou nya ei minu ndig Yerusalem.2 Igwam bimem kep ser ei Minyei Arnon nipimat ba, iba ingon di tai-tai bou biya-ya nyen ba, idem kep ha di yuhuk leu naham pimo. 3 Ipai bak timiei Yehuda nya <<Ma jipai binye tut mun di suar nibon. Ma jinyohou nye bijinok biei di nimeng nggrou ninghousi di bon nohousi di nigwam nding ei mpia ngket di mpia wam nye. Ma jisindui sut ba, nigwam coi je nok biei behei dima. Ninang leu nitimieisi kwei biningwes ngun. Ma jiku nye nyahan. Jibakilak nye au. 4 Ma jisindui sut ba, nibong nok ngkiai ei jide minu. Ma jingkiem ser nye leu yo di ijoi sut ibindei sar nye.>>
(Nico kep yamti kin nibindei sar hiterti mikes hon rin ba, yo di ibindei di mben Israel itimek bico kep yok cem mingwig krebou. 5 Leu api tungwagom di ntun Daud him mikui bigwam nok nibou ndig. Noni miba ningon ngakeisi bininyeng tak kep limwa nya ba, ningon gom tut yok cem. Noni mibrim ningkek mem gima bon mun di kei ningkom lene bindei ba, nikei nikos tutti di sren kei nya mikieng kep nide ninyeng tak kepti nisurti-nipekti.)
6 Timiei Yehuda nya ipai biyam <<Nimiap tut minu Moab nikon nontiti tu. Nikan tut bipia yoni ingon jei ba, ikon yonti. Ighyet nok bu tan ba, ipaisi nya isuglai mun he.>>
7 Gima rino nnaba mben Moab ipim kui jei sut yam. Gino ingon kan njita di kei di igyem kep ei minu ndig Kir-Hareset bingon ngguk tut lene nnaba ipim bibikiek ug. Nnaba ingon ku yonti ba, inso-nso nyen hak ug.
8 Siceu nya ibindei sar miai di jo dideu minu ndig Hesybon kin miai ba anggur nghousi ei minu ndig Sibma tu. Miai dima yok ne miai ba anggur nghousi di yai ningat di kei bibor kei bak ide nibou ndig nya bibindei di ibou ngwak sibui ri. Nipou yo ne miai ba anggur dima yok nindigsi ug ninno bipek kin minu ndig Yaezer buug ndam nite bei mpia nipriti bimbut kikau bipek kin iggum ndigsi ba, nite bei mpia nicutti mbut bipek kin Igpong Nsim nite dini kwei. 9 Noro tini bu ne dipim tut ba anggur nghousi ei Sibma noyam kin gi dipim tut minu ndig Yaezer. Diyai nggwei kibor tut minu ndig Hesybon kin Eleale lewo ide siceu nya igyem ba anggur ngat bingwig leu su. 10 Hi dima ningon nggei-hi-nggei ei miaisi di nnum kei dima bi. Hi dima mbos-hi-mbos ba, pai doia cem ei miai ba anggur nghousi dima bi. Hi dima pot ba anggur ngat mem gima bibon ba anggur ngei bi. Ide nimbos-hi-mbosti kin ide ningon di nggei-hi-nggeisi ntus tu. 11 Tirigi dingig diyai kep mun di cut igkep minu Moab kin minu ndig Kir-Heres lene dingon hara kot bidingon nnirwap cem tu. 12 Mben Moab igruap nikui mbigdip ug ei ide mpia di ibon midut bingat nadi bak ide kwar di ikuk yok bak eisi. Noro nadi di ide dima hi gi miap bi.