Allah mibindei timek minu Moab
15
1 Gini ne TUHAN nisokti tut mben Moab ri.Siceu nya ibindei sar minu ndig Ar kin Kir mem mmun gom ngat leu api mpia mbum-brati minggai kep minu Moab bram. 2 Timiei minu ndig Dibon nya ikui ug ei mbigdip mem gima ipim ei mpia di ikuk yok bak kwar nya eisi a. Timiei minu Moab iba ingon di ngguk bipim nggruet tut minu ndig Nebo kin Medeba. Ikak ibou nta kin yuhui nta leu nok bindo tut gi yuum ningon nggukti. 3 Tungwatu di igya-ya nyen kak simpak nya ijuk sinsun kron di bindo tut gi yuum ningon nggukti. Ipim nggruet ei biyati kin ig ninjek hu kwei cem. 4 Timiei minu ndig Hesybon kin minu mien Eleale ipim kui jei ba, ighyet ug ninno bipek kin minu ndig Yahas. Tentara di ide nya cem igyai nidigit ei yamti ba, mimbri di kui ingkek cut hak leu yok tu.
5 Dingon ngguk tut minu Moab! Timiei nya icat ndigban binang tut ug ei minu ndig Zoar kin Eglat-Selisia. Bihi inang bikui puig di ug ei minu ndig Luhit ba, ibipim kak imbutti. Bihi inang ug ei minu mien Horonaim ba, ibahara inghuisi di wei lewo mun di buhun cut igkep yok. 6 Minyei Nimrim ningei pingge hak leu ba, minta di hei ei nintig dip mui bingak-cai tu. Minta di nimeng ngun hi jo bu bi. 7 Tungwatu nya isigon minyei pmot Haarabim ba, ibipian ndigban di ide nya hagom ug ei dihyei nddongti. 8 Naharati jo bidem minu Moab de minu niya kwas yamti tirima-tirima. Gi ipim kui jei dima tibim ba, imiap ei minu ndig Eglaim kin Beer-Elim. 9 Minyei ningei ngwoi lewo nimbiam nggrom srigsi ei minu ndig Dibon. Allah mikes mun di buhun bibor di dor njiriek gima bu ei yo di ibong ei sirima dip. Nidigo kep mikwau kukiau cig nya migyai nimai bak mben Moab nindigsi di ingat rin ei minu dima yahagom.