Ningon kwes kin yamti mikieng kep dihyeisi dini hagom
11
1 Nibou Ndig Daud de nintun him yamti di bram yam nya midem kep nok biei di iwim tu. Bit leu nok nibiop ntun ningwam him hanyen ne nibou ndig nijep bu di ntun Daud him mikiju kwei.2 TUHAN ninnei micoi ug ei ningonti leu binhyepo ningon ki. Nintin kimbo cem ba, nikos tutti nya hagom mipek kep mem tungwatu nya. Noni miba ningon com Allah bikuk no ei Noho bei.
3 Ningon millei sut gi bit TUHAN nihyet. Noni mimbus tungwatu nya ingonti drek dip ingkek dip di ngat ei niyai him kin ighyet di tibim ei nitingou nsi bi.
4 Noni migwam nok nikei di ningon sren-srau mem yo di yuhui mbum nya bimbrap gau yo di isindem bi nya. Noni mibindei ba, yo di ibon mun di tunggwei mitug ndei hukum tug hon nide nicukti ba, yo di imbuk bibor nya mitug ndei nimai.
5 Noni miba ningon sren-srausi kin ningon gomti bibie tut nide limwa di ninyeng tak kep yok.
6 Ningon di kwes kin yamti dima mibindei ba, nsien mbrei di iten-pos nya yaham domba nya bu bi. Mindhe macan tutul nya kin kambir nya ibong simiak yam ba, sapi mien nya kin singa mien nya igyem minta bit yam cem ba, munggwom mien nya mihyen kep yok.
7 Sapi nya kin mindhe beruang nya mitai minta bit yam ba, sapi nimien nya kin beruang nimien nya mibong simiak yam lene singa nya mitai njita noyam kin sapi nya.
8 Mbro nok gino munggwom ngwoi gom kek-kek nyen bit wou piet lo, wou dima maham noni bi.
9 Mun di mbuk kin nirom ndok mijo ei Allah De Nungug Di Kwes-Kwau ei Nungug Sionti bu bi. Nintin di kimbo tut Allahti mikieng kep minu dima hagom dem kep nok muk ndigsi di mpung tut minyei.
Mben di icom yok ug ei ingkiaisi mingkwei hanyen
10 Njap ngon bou midem leu api nibou ndig di ntun Daud him mindo bindo tut nibiyok ngon kepti mem mben yahagom. Yoni minduk yam kwei ndam noni bikon nide minu ndig ninyeng bijo anai. 11 Ei mpe dima lene TUHAN miba Nide nisindemti bibuwak Nide limwa niken-ken nya di ibong ei minu Asyur kin minu Mesir kin minu Patros kin minu Sudan kin minu Elam kin minu Babel kin minu Hamat kin mios nya di ting ba, yahagom ikwei hanyen bu. 12 Noni mibindei kui kendera gom di nok mun di bindo tut gi Noni mibuwak mben Israel kin timiei Yehuda nya di intek gimahap di igya bidem dihyei nisurti-nipekti di ingkwei ba, iba yok bicom yam hanyen ri. 13 Minu Israel ningon mikinei sut minu Yehuda bi, Minu Yehuda miba nitok bak minu Israel bu bi. 14 Yahacem minjei siceu ndam mben Filistin di ibong nite bei mpia nicutti ba, ihwen bipos mben di ibong bei mpia nipriti nya ide ndigban cem. Yoni mibindei timek mben Edom kin mben Moab ba, mben Amon ibou micut biyoni. 15 TUHAN mibindei ba, muk nuhuisi Suez pingge leu api hou di dut kui bibindei ba, Minyei Efrat nok minyei pmot muhwindacan di jut bi. Ba, tungwagom-gom ba srop he bisigon ug ei nite hi. 16 Puig ndig di noyam kin puig di mben Israel ikak mpe di po yehei leu minu Mesir pima miningat rin mem TUHAN De limwa di niken-ken nya di yehei kwei leu minu Asyur yo.