10
1 Buhun bibor mem je di jitri tut niggai serti di igbit bi nya mem gima jibico kep Ditde limwa nya. 2 Tug hon nisinati dima lene jibigen ser yo di yuhui mbum nya leu ba, igitug ndei mun di idem mem gima itug ndei nya kin nikei nikos tutti di sren kei nya mem yonti cem bi. Jibipos kibom nya kin moibihi nya ide mun di inyeng tut leu yok cem. 3 Mijibon mindei mem njap di Allah kes hukum ei je dip i? Mpe di Noni kes mun di buhun leu minu ting kwei ei je dip ne jindei mihwen i? Mijahara tou rimem gima mpu je i? Mijiku jide mun di jinyeng tut nya ei hantou i? 4 Mun di micut igkep je rino jimai ei pranti ba, ikat je nok yo di isima cem he. Noro TUHAN gga je bikes hukum ei je dip bijo kikau yo.Nibou ndig Asyur nok minggwen di TUHAN krau ei ninda him
5 TUHAN pai <<Buhun bibor mem minu Asyur! Minu Asyur nok kuk di dikrop kin yam kin biei nibibui ba, dibimbas yo di itug ndei Ditde nigga yoti. 6 Dinduk mben Asyur mem gima ikwei hwen Ditde limwa nya di ingkwei hanyen leu ide niba ningon com Dati kin gi ibindei bidigga yok. Dinduk mben Asyur kwei mem gima ipos binggimang mun di Ditde limwa nya inyeng tut nya hagom bico kep yok nyen-nyen nok dihyei ndung di ico kep nyen kak puigsi.>>
7 Noro nibou ndig Asyur tin ei ningon kanti binonti ba, joi sut ba nisibut biborti bibindei sar mben imang bibor, 8 bikon nonti bipai <<Ditde nibou pran nya yahagom ne nibou ndig ri! 9 Diyai minu ndig Kalno kin Karkemis kin minu ndig Hamat kin Arpad bidiyati tu. Diyai minu ndig Samaria kin Damsyik bidiyati tu. 10 Dibindei timek nibou nya kin ide minu ninyeng tak kepti nya di ikuk yok bak kwar di isindem bibor dor njiriek gi ingat rin ei minu ndig Yerusalem kin Samaria nya. 11 Dibindei sar minu Samaria kin nide kwar di ikuk yok bak nya tu. Midiyai nok gima tut minu ndig Yerusalem bitut kwar di ikuk yok bak cem hagom.>>
12 Noro TUHAN pai <<Tirigi diyai midyai di dijoi sut dibon ei Nungug Sion kin minu ndig Yerusalem biput tu ne midikes hukum ei nibou ndig Asyur dip cem drek dip gi kon nonti biningon jei.>>
13 Nibou ndig Asyur ba ningon di jei bipai <<Diba ditde nisindemti bibon mun dima yok hagom tu. Dikan tut mun di dibon nya bidingon ki. Didip tut mben nya ide minu niya kwas yamti lene dipos ide mun di inju ei ide minu nya hagom leu yok. Dico kep nibou di inyeng tak kep ide limwa nya nyen-nyen noyam kin sapi banteng nikre. 14 Mben ngot di dihyeisi dini idem kep ha naham ba, krop kei mem gima dipos ide ndigban. Dem kep nok no di kikam ha dunggwei di nipmem mbut leu ei nahamti. Ha hi di kieng ninyehei di tittem nyen bi. Hi di hap niji ba, hara nyen cem bi.>>
15 Noro TUHAN pai <<Apo ma oi bon ninyeng jei dor njiriek no di krau oi dima ei nindati e? Apo ma sigigi bon ninyeng dor njiriek no di ba sigigi dima biyai midyai e? Biprip rino krau tungwatu bi noro tungwatu rino krau biprip a.>>
16 Mben Asyur ikon yonti. Gima rino TUHAN Di Ninyeng Jei Bibor miba nsuwer ajar bihwen ide nibou tentara di isindem nya. Ningkek di dut bibor mihwen yok bidem kep hum di yem tungwatu bijo kikau. 17 Allah di kwes-kwau di ninyeng Nipigati Israel dem kep hum njeng di yem mun nyeng hagom bitut war nggig-nggwen nya cem bingwig hak ei njap ngom ngat. 18 Noni mibindei sar baham nitindurti nya kin miai di nnum kei nya bisar ningwig hak ug ba, dem kep nok no di nggwen di cut ei nikineiti bimai kep a. 19 Biei njem nya mijo poi mien he ba, bon munggwom mien gom kwop nimangti.
TUHAN miteu tungwatu poi mien he bingwes ngun
20 Njap ngon bou midem leu api mben Israel niken-ken di ingwes ngun nya iba ingon com mben ngkiai di inyeng jei di mbigom mibindei sar yok ningwig bu bi. Noro iba ingon com TUHAN di mben Israel ide Allah di kwes-kwau a. 21 Mben Israel niken poi mien di ingwes ngun mittin ser ide sisar leu ba, ikiek hanyen bak Allah di sindem bibor. 22 Mbro nok gino nogindini mben Israel idem kep iggum ndung ei muk nipimat lo, ibou poi he rima ingkwei hanyen a. TUHAN de hukum dideu kwei su ba, nibindei sar mben dimati ne suar dem igbit. 23 Igbit ri! TUHAN Di Ninyeng Jei Bibor mibindei timek minu Israel titut yam. Gima ne TUHAN nikos tutti rin ba, bit bon luei ningonti tut kan bi.
TUHAN mikes hukum ei minu Asyur dip
24 TUHAN Di Ninyeng Jei Bibor pai bak Nide limwa nya di ibong ei Sion <<Mbro nok gino mben Asyur ico kep je ba, igyai ninghuisi di wei bije cem noyam kin gi po mben Mesir ibibon je nipou pima lo, ma jittin yok au. 25 Ditde nigga jeti mikes hon ei nituti di jei bi ri. Gi kes leu lene midibindei sar yoni. 26 Da di TUHAN Di Dinyeng Jei Bibor midiba na mbrei ngkek bimbas yok noyam kin gi dimbas mben Midian ei nungug Oreb. Midikes hukum ei minu Asyur dip noyam kin hukum po dikes ei minu Mesir dip. 27 Mpe dima lene miditeu je leu mben Asyur ide nico kep jeti leu api inyeng tak kep je bu bi.>>
Siceu injei bihwen
28 Tentara Asyur igyai minu ndig Ayatg bigyati tu. Injei siceu binjiriek minu ndig Migron tu! Inju ide njita di itin ei nya keyam ei minu ndig Mikhmas! 29 Injiriek nisigon kep minyeisi tu ba, mmun dima ibong ei minu ndig Geba! Timiei minu ndig Rama igwam nidigitti ba, timiei minu ndig Nibou Ndig Saul de di Gibea yonti ikiju binang tu. 30 Timiei minu ndig Galim e, ma jahara! Timiei minu ndig Laisya e, ma jimiap! Timiei minu ndig Anatot e, ma jibuhup! 31 Timiei minu ndig Madmena kin Gebim inang leu itimieisi biyuug ei mpia ttou nsi hiter. 32 Njap di ammani ne siceu nya ingat rin ei minu ndig Nob tu. Ba, ikimut inda bitug mpia ndam Nungug Sion kin minu ndig Yerusalem.
33 TUHAN Di Ninyeng Jei Bibor mibindei timek yoni bidem kep biei di ikui ba, iti ninda leu ninjem pimo. Gi hi di ingon jei bibor kin gi inyeng jei bibor ei ikieti miti yok binjei yok hak. 34 TUHAN mibindei yok bitti noyam kin biei di ya baham di dimbunti di iba oi biwim. Mbro nok gino isindem noyam kin biei di sindem bibor ei Libanon rin lo, yoni cem mitti. TUHAN Di Sindem Bibor mikrau kep niyai munti dini yok hagom!