No di pinai mbrap
4
1 <<Nani ne ditde sop ubbu ngat di nisieng hwen ri. Ningat ne nani sop ubbu ngat ri. Ayai di jo nding ei minyahas nibinggai behei ade di abinggai aimaisi dima dem kep hakimoi nya. Abou nta dem kep kambir nimpung gom di juk kwei leu mbigdip Gilead. 2 Akwai tiei kei bidem kep domba tiei nimpung gom di sindi niceu ba minyei bipiap di tiei kei mem gima kak ninta leu. Akwai di jo nggre tiei kei bidem kep domba pmot di ya nggre ba, gom pror leu bi cem.3 Ahui ngkek ngwoi kei bidem bang ngwoi ninghas a. Lene ahui cem dia-diau kei. Angyoi dem kep biei delima ngat nisra di jo nding ei minyahas di abinggai ser aimaisi.
4 Anggibi dem kep Daud de ig di bon ninggre di jo-jo yam dip anai mem gima kes nide minggwen nya hagom ei niti. Ade mbrawin komti di andei ei akimam dem kep mun di tentara nya ibipukep tibor ninggwenti nimien ningat sribu gom ri.
5 Ado hacem dem kep andai pmot can kin rusa pmot can di igyem minta ei bakung tou nghousi ri.
6 Midigwam ei nungug mur kin mbigdip biei nggrai di ui-gwang kei bibou hou njap tekti cut bico kep mmun nidinditi bipren ug e.
7 Nani ne ditde sop ubbu ngat di ninjei hwen rin ba, mun di kinei hi rap nani bi.
8 Ninyan e, ma akwei ba, sijuk leu Nungug Libanon. Akwei ba, sikes Amana ninggram him kin Senir-Hermon ninggram him ei o. Lewo gima ne mindhe macan tutul kin singa ide mpia di ibongti ri.
9 Dikinjoi e, abrim dingon leu ug. Ninyan e, atou kep dati brim dingon leu ug. Tig permata di kei bibor di jo ei miep komti di andei dima brim dingon leu ug.
10 Dikinjoi ninyan e, ade ningon ngakei dati kei-kau-kei leu ug. Kei-kau-kei dor njiriek ba anggur ngei cem. Ade mini nuui tun kei ba, nuui di tun kei dor njiriek biei nggrai di ui-gwang kei hagom nuui nitunti.
11 Ditde ninyan e, ahyet mmau kei bidem ahwei lon di pimbai kei kin sapi do ngei nimmausi a. Ade sinsun nuui tun kei bidem Nungug Libanon nuui nitunti a.
12 Dikinjoi ninyan di dingon ngakei ne miai kin minyei yaisi niku di ngug tig bikrop ttai ri.
13 Biei delima nya hei ei biei nghousi dima biya tut ningat di nyop kei ba, noyam kin biei pacar ningat kin mitou narwastu,
14 kin puk kin nghai di ui-gwang kei kin biei ngkek di ui-gwang kei hi gom hi gom cem hei ei mpia dima. Mur ngei kin biei gaharu ngei bitut biei ngat di ui-gwang kei hi gom hi gom hei ei miai dimati.
15 Nani ne minyei yaisi ei ditde miaisi di bindei hei minyei di biam kikau di biam kwei leu Libanon ri.>>
No di sop mbrap
16 <<Hou di cut kwei leu mpia nijjai e, ma akiju, hou di cut kwei leu mpia nibiho e, ma akwei! Jicut bijikui ditde miaiti leu binhyepo nuui tun bikieng kep mpia. Nnaba no di dingon ngakei kwei ei nide miaisi biyem biei ngat di nyop kei nya ug.>>