3
1 Sibong sibongti ba, siba mmun di simumpriem bisinggok-nggok nyen no di singon ngakei. Singgok lo, singat ningat bi.2 Sikos tut bipia sikiju bisiya bidem minu ndig cem bidem simpak ndig kin puig nya cem hagom. Singgok singon kieti lo, singat ningat bi.
3 Leu api niya ser minu ndig mem mmun cig nya itau kep sa bisihig ser yok <<Apo jingat no di dingon kieti e?>>
4 Sindi dikes yok bidimbut leu yok lene duum no di dingon kieti. Disu dinda bidikat ninda bidikes hanyen bi ba, nuug kikau ug ei dipmem de ig. Dibuwak ug ei no di srek tut da nide ninsi.
5 Je di sop gwam nitta pilei minu ndig Yerusalem e, ma jipreu ei tug hon rusa nitu kin andaic di igya iggum ndigsi nya inyeng bipia mijiwaisi nye bi bibou niyem njita tut yam bingwig ug e.>>
Diun Gi Niningai
No di sop mbrap
6 <<Mindei rikwei leu iggum ndigsi dima di kui bidem bumbuhui nggop ei mpia-bbed him i? Nuui di tun dem kep mur kin biei nggrai di ui-gwang kei nuui di ttun ba, noyam kin bedak di nuui tun kei di nitri-nipek mun cig nya ittei kwei bitri.
7 Jingat i! Gima ne lat ig jibei di ibittei Salomo di gwam dip ri. Nihwen kep mun cig ibou ningot muhwindagom igya ttai ba, yoni ne mben Israel ide tentara di mimbri kui ingkek ri.
8 Nihwen kep mun cig dima yok yahagom ijus singau simeda ei intig bou noyam. Itindei ser siceu di micut igkep bihwen yok mem mmuna.
9 Salomo ba buom di nghai kei bibindei ba, ibon lat ig jibei mem noni gwam dip.
10 Iba perak binggai kep nidihim nya lene iba mas bibon banggo mbrei di gwam dip. Sop gwam nitta pilei minu ndig Yerusalem nya iba ingon di kei bibien ban di wer nghei nta di noni gwam dip cem.
11 Je di sop gwam nitta pilei minu ndig Yerusalem e, jehei kwei bijitou kep Nibou Ndig Salomo di su no tut topi nibou ndig di nipmem bijuk nibou ei njap di nitnem yoni iwak yamti. Njap dima ne ningon llei nindig bibor!>>