Mun nyeng hagom bon nituti
3
1 Mun di pek kep mem nya ei dihyeisi dini hagom bon nituti dem igbit Allah nikos tutti ba,2 nituti mem isrek kin nituti mem imai cem ba, nituti mem indim ningan kin nituti mem yohom mun di ita nya cem ba,
3 nituti mem igyai nimai bak kin nituti mem ibindei ba, nibok jut hanyen cem ba, nituti mem inggek mun kin nituti mem ingot mun cem ba,
4 nituti mem ipim kin nituti mem ipa cem ba, nituti mem ingon ngguk kin nituti mem ipri-pri nyen cem ba,
5 nituti mem igyem njita tut yam kin nituti mem gima yoom nye leu niyem njita tut yam cem ba, nituti mem inggriou yam kin nituti mem yom nye leu ninggriou yamti cem ba,
6 nituti mem inggok mun di cut kin nituti mem ikes hon binggok bu bi cem ba, nituti mem ibet mun ei kin nituti mem icom mun ug cem ba,
7 nituti mem ibindei rik kin nituti mem inap kep hanyen cem ba, nituti mem ikimut yuhui kin nituti mem imbrap cem ba,
8 nituti mem ingon ngakei yam kin nituti mem ingon mpo tut yam cem ba, nituti mem ikon pran kin nituti mem ibong kei igwam kei cem.
9 Ide niyai kepti pima hagom bindei ba, mitug ndei mindei i? 10 Dikan tut bipia Allah kes mun di buhun bibor ei nyeni inghat dip. 11 Noni bon nituti di kei mem mun di pek kep nya hagom. Noni bindei ba, illei sut gino ikan bidem tut mun di mipek kep ei nidipti bu noro bit bon nyeni ingon dorti tut Nide niyai kepti nya ei nimbie him kikau ug bipek ningwigsi kep kan bi. 12 Gima rino dikan tut bipia gino nyeni ingon llei ba, ibon mun di igbit mem nijam di igyaijo lene gini kei bibor dor njiriek mun nindigsi nya hagom. 13 Ma yahagom igyem njita bidut ndia ngei ba, ijoi sut ide midyai di ningat ntun him nya lewo Allah njei mun dima yok bak nyeni.
14 Dikan tut bipia Allah niyai munti nya hagom jo ninghig-niker. Bit bon nye di tungwatu ikum ei niyai munti nya bicut nittou nsi bihi leu cem kan bi. Lene Allah yai nibou tut gima leu binhyepo ittin tut Noni bikuk nye bak. 15 Mun di pek kep nogindini kin mun di mipek kep ei nidipti bu hagom pek kep nipou su. Allah bindei ba, mun di pek kep nipou su mipek kep hanyen bu lene nok gima kikau.
Dihyeisi dini mpung tut nisibut biborti
16 Dingat mun nyeng gom kin bu bou diyai him ei dihyeisi dini. Nisibut biborti om kep nikei nikos tutti di sren kei kin mun di igbit nya. 17 Lene di kan <<Allah migwam nok nikei bimbus yo di ingon sren nya kin yo di isibut bibor nya ingonti. Lewo Noni bon nituti mem mun di pek kep nya kin tungwatu nya igyai munti nya cem hagom.>> 18 Nirop ninda ndigsi ne Allah sigbou nye leu binhyepo bibindo bipia nye di tungwatu nya ter leu mindhe-ndhe nya bi. 19 Ningat ne mun di pek kep mem tungwatu nya noyam kin mun di pek kep mem mindhe-ndhe nya. Yahacem imai bram yam ba, ingat kin innei di dihip ihwap nsi cem noyam. Gima rino tungwatu nya igyai mun di kei dor njiriek mindhe-ndhe nya bi. Bit bon dingon dorti tut gini cem kan bi. 20 Yahacem idor ug ei mpia gom ngat. Intun dihyei ndung him habiei su leu api ingkwei hanyen binok dihyei ndung hanyen bu. 21 Bit bon ikan tut bipia tungwatu nya innei ug ei ginyo kug e, he mindhe-ndhe nya innei juk ug ei dihyei jou mo juug e, ikan tut bi. 22 Gima rino jo nibreisi mem da bipia gino ingon llei sut mun di ntun him ide midyai nya ne gini kei bibor dor njiriek mun nindigsi nya hagom. Ter leu gima ne bit bon igyai kep midyai nya kan bi. Bit bon ikan tut mun di mipek kep mem nye ei niabiati tirigi itug ndei nimai leu su kan bi.